Ezekiel 21 - Bibl Koad 21: Ar Bibl e Brezhoneg evit ar Vretoned

Pennad 21

¹ Komz an AOTROU a voe disklêriet din o lavarout:

² Mab an den, tro da zremm war-zu ar c'hreisteiz, prezeg etrezek ar c'hreisteiz, hag e profedi a-enep koadeg maezioù ar c'hreisteiz.

³ Lavar da goadeg ar c'hreisteiz: Selaou komz an AOTROU: Evel-henn e komz an Aotrou AOTROU: Setu ez an da enaouiñ un tan en da ziabarzh, a zebro en da greiz pep gwezenn c'hlas ha pep gwezenn sec'h. Ar flamm o teviñ ne varvo ket, an holl ziwar c'horre a vo devet eus ar c'hreisteiz d'an hanternoz.

⁴ Ha pep kig a welo ez eo me an AOTROU am eus e enaouet; ha ne varvo ket.

⁵ Neuze e lavaris: A! Aotrou AOTROU! Lavarout a reont ac'hanon: An den-mañ ne ra nemet komz dre barabolennoù!

⁶ Komz an AOTROU a voe disklêriet din o lavarout:

⁷ Mab an den, tro da zremm ouzh Jeruzalem, prezeg etrezek al lec'hioù santel, hag e profedi a-enep bro Israel.

⁸ Lavar da vro Israel: Evel-henn e komz an AOTROU: Setu em eus droug ouzhit, hag e tennin va c'hleze diouzh e c'houin, hag e tilamin eus da greiz an den reizh hag an den fall.

⁹ Dre ma tilamin eus da greiz an den reizh hag an den fall, e tennin va c'hleze diouzh e c'houin a-enep pep kig, eus ar c'hreisteiz d'an hanternoz.

¹⁰ Ha pep kig a ouezo ez eo me an AOTROU am eus tennet va c'hleze diouzh e c'houin, ha ned aio ken en-dro ennañ.

¹¹ Ha te, mab an den, hirvoud gant da zivgroazell brevet; en ur glac'har c'herv, hirvoud dirak o daoulagad.

¹² Ha pa lavarint dit: Perak e hirvoudez? neuze e lavari: abalamour d'ar c'heloù; pa en em gavo, an holl galonoù a deuzo, an holl zornioù a zinerzho, an holl speredoù a vo mantret, an holl c'hlinoù a zeuio da vezañ dour. Setu erru eo! Eno emañ! eme an Aotrou AOTROU.

¹³ Ha komz an AOTROU a voe disklêriet din o lavarout:

¹⁴ Mab an den, ro da brofediezh ha lavar: Evel-henn e komz an AOTROU: Lavar: Ar c'hleze, ar c'hleze a zo bet lemmet ha lufret.

¹⁵ Lemmet eo bet evit lazhadegañ, lufret eo bet evit luc'hediñ. Hag e laouenaimp? Gwalenn va mab eo, a zispriz pep koad.

¹⁶ Roet eo bet da lufrañ evit bezañ kemeret en dorn, lemmet eo, levnaet eo, evit bezañ lakaet e dorn al lazher.

¹⁷ Kri ha yud, man an den, rak a-enep va fobl eo tennet, a-enep holl briñsed Israel. Roet int d'ar c'hleze, ha va fobl ganto, sko eta war da vorzhed.

¹⁸ Ya, an amprouenn a zegouezho; ha petra a c'hoarvezfe hag e vefe kaset da netra ar walenn zisprizus? eme an Aotrou AOTROU.

¹⁹ Te eta, mab an den, ro da brofediezh, sko dorn ouzh dorn, ra vo daougementet taolioù ar c'hleze d'an deirvet gwech, kleze al lazhadeg. Kleze al lazhadeg vras eo, mont a ra d'o gwaskañ a bep tu,

²⁰ evit ma teuzo ar c'halonoù ha ma kresko ar c'houzañverien e-kichen an holl zorojoù. Kemeret em eus ar c'hleze gourdrouzus. A! Graet eo evit luc'hediñ, lemmet eo evit lazhadegañ.

²¹ Dastum da nerzh, sko a-zehoù, tro ha sko a-gleiz, ha da bep tu ma troi.

²² Ha me ivez, me a skoio dorn ouzh dorn, hag e sevenin va c'hounnar, eme an AOTROU.

²³ Evel-henn e komz an AOTROU:

²⁴ Te, mab an den, tres daou hent evit an tremen eus kleze roue Babilon, o tont o-daou eus un hevelep bro. Merk un arouez, merk penn an hent a ya betek kêr.

²⁵ Tres unan eus an hentoù ma teuio ar c'hleze drezañ da Rabbad eus mibien Ammon, hag egile ma teuio da Juda, da Jeruzalem ar c'hêr greñvaet.

²⁶ Rak roue Babilon en em zalc'h e kroashent, e penn an daou hent, evit ober divinerezh. Hejañ a ra ar biroù, goulennata a ra an terafim, sellout a ra ouzh an avu.

²⁷ En e zorn dehou emañ ar sord o verkañ Jeruzalem, evit sevel tourterezioù, embann al lazhadeg, leuskel kriadennoù a vrezel, renkañ an tourterezioù a-enep an dorojoù, sevel tosennoù hag ober kreñvlec’hioù.

²⁸ Dirak o daoulagad eo un arouez touellus, int hag o deus le al leoù. Hag eñ a zegaso soñj eus o drougiezh pa vint tapet.

²⁹ Setu perak evel-henn e komz an Aotrou AOTROU: Peogwir hoc'h eus degaset soñj eus ho tireizhder, en ur lakaat ho tisentidigezh en noazh, en ur tiskouez ho pec'hedoù en hoc'h holl oberoù, peogwir hoc'h eus bet soñj anezho, e viot tapet gant an dorn-mañ.

³⁰ Ha te, den disakr ha drouk, priñs Israel, deuet eo da zeiz, bremañ hag eo kaset d'e zibenn an direizhder.

³¹ Evel-henn e komz an Aotrou AOTROU: Ra vo lamet an diarenn ha tennet ar gurunenn, cheñchet e vo an traoù, ar pezh a zo izel a vo uhelaet, ar pezh a zo uhel a vo izelaet.

³² A-dammoù, a-dammoù, a-dammoù, me a lakaio anezhi. Met kement-se ne c'hoarvezo nemet pa zeuio an hini en deus ar varnedigezh am bo roet dezhañ.

³³ Ha te, mab an den, ro da brofediezh ha lavar: Evel-henn e komz an Aotrou AOTROU diwar-benn mibien Ammon hag o dismegañs: Lavar: Ar c'hleze, ar c'hleze a zo tennet, lufret eo bet evit lazhadegañ, evit kas da netra, evit luc'hediñ,

³⁴ e-pad ma vez gwelet gweledigezhioù touellus evidout ha ma vez divinet gevier evidout, evit da lakaat war c'houzoug ar re zrouk lazhet, rak deuet eo o deiz, bremañ hag eo kaset d'e zibenn an direizhder.

³⁵ Laka da gleze en e c'houin en-dro! El lec'h ma'z out bet krouet, e bro da orin e varnin ac'hanout.

³⁶ Hag e skuilhin warnout va ernez, hag e c'hwezhin warnout tan va gounnar, hag e lakain ac'hanout etre daouarn tud garv, micherourien an distruj.

³⁷ Dont a ri da vezañ preizh an tan, da wad a vo e-kreiz ar vro, ne vo ken soñj ac'hanout, rak me an AOTROU am eus komzet.