Ezekiel 20 - Bibl Koad 21: Ar Bibl e Brezhoneg evit ar Vretoned

Pennad 20

¹ D'ar seizhvet bloaz, d'ar pempvet miz, d'an dekvet eus ar miz, hiniennoù eus henaourien Israel a zeuas da c'houlennata an AOTROU hag a azezas dirazon.

² Komz an AOTROU a voe disklêriet din o lavarout:

³ Mab an den, komz ouzh henaourien Israel ha lavar dezho: Evel-henn e komz an Aotrou AOTROU: Evit va goulennata eo oc'h deuet? Me a zo bev, ne vin ket goulennataet ganeoc'h, eme an Aotrou AOTROU.

⁴ Ha ne varni ket anezho, mab an den, ha ne varni ket anezho? Ro da anavezout dezho euzhusterioù o zadoù,

⁵ ha lavar dezho: Evel-henn e komz an Aotrou AOTROU: An deiz ma em eus dibabet Israel, ma em eus savet va dorn dirak lignez ti Jakob, ma'z on en em roet da anavezout dezho e bro Ejipt, ha ma em eus savet va dorn dirazo o lavarout: Me eo an AOTROU ho Toue,

⁶ en deiz-se em eus savet va dorn dirazo, evit tennañ anezho eus bro Ejipt etrezek ur vro am boa klasket evito, ur vro a zever gant laezh ha mel, ar gaerañ eus an holl vroioù,

⁷ hag em eus lavaret dezho: Ra vo taolet kuit gant pep hini ac'hanoc'h an traoù euzhus a zo dirak e zaoulagad, n'en em saotrit ket gant idoloù an Ejipt. Me eo an AOTROU ho Toue.

⁸ Met en em savjont a-enep din ha ne fellas ket dezho va selaou. Hini anezho ne daolas kuit an traoù euzhus a oa dirak e zaoulagad ha ne zilezas idoloù an Ejipt. Neuze em eus soñjet skuilhañ va fulor warno ha seveniñ va c'hounnar a-enep dezho e-kreiz bro Ejipt.

⁹ Koulskoude em eus graet abalamour da'm anv, evit na vefe ket disakret dirak daoulagad ar broadoù en em gave en o zouez, hag e oan en em roet dezho da anavezout dirazo, evit o zennet eus bro Ejipt.

¹⁰ O zennet em eus eta eus bro Ejipt, hag o degaset em eus d'ar gouelec'h.

¹¹ Roet em eus dezho va reolennoù ha diskouezet va barnedigezhioù, ha ma ra hervezo an den e vevo drezo.

¹² Roet em eus dezho ivez va deizioù sabad da vezañ un arouez etrezon-me hag int, evit ma oufent ez on me an AOTROU a santela anezho.

¹³ Met ti Israel en em savas a-enep din er gouelec'h, ne gerzhjont ket hervez va reolennoù, taolet o deus kuit va barnedigezhioù, ha ma ra hervezo an den e vevo drezo, disakret o deus va deizioù sabad en un doare dreistmuzul. Neuze em eus soñjet skuilhañ va fulor warno er gouelec'h, evit o c'has da netra.

¹⁴ Koulskoude em eus graet abalamour da'm anv, evit na vefe ket disakret dirak daoulagad ar broadoù em boa o zennet dirazo.

¹⁵ Savet em eus va dorn dirazo er gouelec'h, na gasfen ket anezho d'ar vro am boa roet dezho, ur vro a zever gant laezh ha mel, ar gaerañ eus an holl vroioù,

¹⁶ peogwir o doa taolet kuit va barnedigezhioù, n'o doa ket kerzhet hervez va reolennoù, disakret o doa va deizioù sabad, rak o c'halon a yae war-lerc'h o idoloù.

¹⁷ Met va lagad a espernas anezho evit tremen hep o distrujañ, ha ne'm eus ket o c'haset da netra er gouelec'h.

¹⁸ Lavaret em eus d'o mibien er gouelec'h: Na gerzhit ket hervez kustumoù ho tadoù, na virit ket o gizioù, n'en em saotrit ket gant o idoloù.

¹⁹ Me eo an AOTROU ho Toue, kerzhit em reolennoù, mirit va barnedigezhioù evit ober diouto.

²⁰ Santelait va deizioù sabad, a vint un arouez etrezon-me ha c'hwi, evit ma ouiot ez on me an AOTROU ho Toue.

²¹ Met ar vibien en em savas a-enep din, ne gerzhjont ket hervez va reolennoù, ne virjont ket va barnedigezhioù evit ober diouto, ha ma ra hervezo an den e vevo drezo, disakret o deus va deizioù sabad. Neuze em eus soñjet skuilhañ va fulor warno ha seveniñ va c'hounnar a-enep dezho er gouelec'h.

²² Koulskoude em eus tennet va dorn, ha graet em eus-se abalamour da'm anv, evit na vefe ket disakret dirak daoulagad ar broadoù, em boa o zennet dirak o daoulagad.

²³ Savet em eus va dorn dirazo er gouelec'h, evit o stlabezañ e-touez ar broadoù hag o strewiñ e meur a vro,

²⁴ dre ma n'o doa ket graet diouzh va barnedigezhioù, dre m'o doa taolet kuit va reolennoù, dre m'o doa disakret va deizioù sabad, ha dre ma oa aet o daoulagad war-lerc'h idoloù o zadoù.

²⁵ Evel-se ivez em eus roet dezho reolennoù divat ha barnedigezhioù ne c'hellent ket bevañ drezo.

²⁶ O saotret em eus en o frofoù, pa lakaent da dremen dre an tan o holl re gentañ-ganet, evit o gwastañ hag evit ma oufent ez on me an AOTROU.

²⁷ Setu perak, mab an den, komz ouzh ti Israel ha lavar dezho: Evel-henn e komz an Aotrou AOTROU: Ho tadoù o deus dismegañset ac'hanon c'hoazh, diskouezet o deus disentidigezh ouzhin.

²⁸ Derenet em eus anezho d'ar vro am boa savet va dorn he reiñ dezho, ha sellet o deus ouzh pep krec'hienn uhel hag ouzh pep gwezenn vodennek, graet o deus eno o aberzhoù, kinniget o deus eno o frofoù evit va c'hounnariñ, lakaet o deus eno o c'hwezoù-mat, skuilhet o deus eno o sparfadurioù.

²⁹ Lavaret em eus dezho: Petra eo an uhellec'hioù-se ma'z it dezho? Uhellec'h a vez graet anezho betek hiziv.

³⁰ Setu perak, lavar da di Israel: Evel-henn e komz an Aotrou AOTROU: Hag en em saotrit war hent ho tadoù? Hag e c'hastaouit gant o euzhadennoù?

³¹ Pa ginnigit ho profoù, pa lakait ho mibien da dremen dre an tan, en em saotrit gant hoc'h holl idoloù betek hiziv. Hag e vin goulennataet ganeoc'h, ti Israel? Me a zo bev, eme an Aotrou AOTROU, ne vin ket goulennataet ganeoc'h.

³² Netra ne c'hoarvezo eus ar pezh a zeu d'ho spered pa lavarit: Bez' e vimp evel ar broadoù hag evel tiegezhioù ar broioù, o servijout ar c'hoad hag ar maen.

³³ Me a zo bev, eme an Aotrou AOTROU, hag e renin warnoc'h gant un dorn kreñv, ur vrec'h astennet, ur fulor skuilhet.

³⁴ Hag e tennin ac'hanoc'h a-douez ar pobloù, hag e tastumin ac'hanoc'h eus ar broioù oc'h bet stlabezet enno gant un dorn kreñv, ur vrec'h astennet, ur fulor skuilhet.

³⁵ Ho tegas a rin da c'houelec'h ar pobloù, hag eno ez in e barnedigezh ganeoc'h, dremm ouzh dremm.

³⁶ Evel ma'z on aet e barnedigezh gant ho tadoù e gouelec'h bro Ejipt, evel-se ez in e barnedigezh ganeoc'h, eme an Aotrou AOTROU.

³⁷ Hag e lakain ac'hanoc'h da dremen dindan ar walenn, hag e tegasin ac'hanoc'h e ereoù an emglev.

³⁸ Hag e pellain diouzh ho touez ar re zisent hag ar re en em sav a-enep din. O zennin diouzh ar vo emaint o chom, met ned aint ket war zouar Israel, hag e ouiot ez on me an AOTROU.

³⁹ Ha c'hwi, ti Israel, evel-henn e komz an Aotrou AOTROU: Kit, servijit pep hini e idoloù! Met goude-se e selaouot, ha ne zisakrot ken anv va santelez dre ho profoù ha dre hoc'h idoloù.

⁴⁰ Met war va menez, war venez uhel Israel, eme an Aotrou AOTROU, eno holl di Israel ha kement a vo er vro am servijo. Eno e kemerin plijadur ganto, eno e klaskin ho profoù, frouezh kentañ ho tonezonoù, gant hoc'h holl draoù santel.

⁴¹ Kemer a rin plijadur ennoc'h evel en un ezañs a c'hwezh-vat, pa em bo ho tennet a-douez ar pobloù hag ho tastumet eus ar broioù oc'h bet stlabezet enno. Hag e vin santelaet ennoc'h dirak daoulagad ar pobloù.

⁴² Hag e ouiot ez on me an AOTROU, pa em bo degaset ac'hanoc'h en-dro war zouar Israel, ar vro am boa savet va dorn he reiñ d'ho tadoù.

⁴³ Eno ho po soñj eus hoc'h hentoù hag eus hoc'h holl oberoù hoc'h eus en em saotret ganto. Heug ho po ouzhoc'h dirak ho taoulagad hoc'h-unan abalamour d'hoc'h holl fallagriezhoù ho po graet.

⁴⁴ Hag e ouiot ez on me an AOTROU, pa labourin ganeoc'h abalamour da'm anv, ha nann hervez hoc'h hentoù fall hag hoc'h oberoù hudur, o ti Israel, eme an Aotrou AOTROU.