Ezdra 10 - Bibl Koad 21: Ar Bibl e Brezhoneg evit ar Vretoned

Pennad 10

¹ Evel ma pede Ezdra ha ma rae an anzav-se o ouelañ, stouet dirak ti Doue, un engroez bras, gwazed, maouezed ha bugale, en em zastumas davetañ, hag ar bobl a ouelas a-boullad.

² Neuze Shekania mab Jehiel, eus mibien Elam, a gomzas o lavarout da Ezdra: Pec'het hon eus a-enep hon Doue o kemer gwragez estren a-douez pobloù ar vro-mañ. Met bremañ ez eus c'hoazh un esperañs evit Israel diwar-benn kement-se.

³ Ha bremañ greomp un emglev gant hon Doue, da gas kuit an holl wragez-se hag ar re a zo ganet diouto, hervez kuzul an Aotrou hag ar re a gren da gomzoù hon Doue. Ra vo graet hervez al lezenn.

⁴ Sav, rak an afer-mañ a sell ouzhit. Ni a vo ganit. Bez kreñv ha gra!

⁵ Neuze e savas Ezdra, hag e reas touiñ pennoù an aberzhourien, al Levited hag Israel a-bezh d'ober hervez ar c'homz-se. Hag e toujont.

⁶ Hag e savas Ezdra a-zirak ti Doue, hag ez eas da gambr Jokanan mab Eliashib, hag ez eas enni. Ha ne zebras ket bara, ne evas ket dour, rak e oa e kañv en abeg da bec'hed re an harlu.

⁷ Neuze e voe embannet e Juda hag e Jeruzalem, ma vefe ret da holl vibien an harlu en em zastum e Jeruzalem.

⁸ Piv bennak na zeufe ket dindan tri deiz, hervez ali ar pennoù hag an henaourien, e vefe lakaet da verz e holl vadoù, hag eñ e-unan lamet diouzh bodadeg re an harlu.

⁹ Neuze holl dud Juda ha Benjamin en em zastumas e Jeruzalem dindan tri deiz. Kement-mañ a voe d'an navet miz, d'an ugentvet deiz eus ar miz. An holl bobl en em zalc'has war leurenn ti Doue, o krenañ gant an afer-se ha gant ar glav.

¹⁰ Hag Ezdra an aberzhour a savas hag a lavaras dezho: Pec'het hoc'h eus o kemer gwragez estren, ha kresket hoc'h eus kablusted Israel.

¹¹ Ha bremañ anzavit ho pec'hed d'an AOTROU, Doue ho tadoù, ha grit e youl. En em zispartiit diouzh pobloù ar vro ha diouzh ar gwragez estren.

¹² Hag an holl vodadenn a respontas o lavarout a vouezh uhel: Ya, ret eo deomp ober evel ma lavarez.

¹³ Met ar bobl a zo niverus, hag amzer c'hlav eo, ha ne c'heller ket en em zerc'hel er-maez. N'eo ket afer un devezh na daou, rak kalz ez omp, ni ar re o deus pec'het en afer-se.

¹⁴ Ra en em zalc'ho nemet hor pennoù evit an holl vodadenn, hag an holl re, en hor c'hêrioù, o deus kemeret gwragez estren, a zeuio d'an deiziadoù divizet, gant henaourien ha barnerien pep kêr, ken na vo distroet diouzhimp kounnar entanet hon Doue diwar-benn an afer-se.

¹⁵ Jonatan mab Asael ha Jakzia mab Tikva nemetken a enebas ouzh kement-se. Meshullam ha Shabtai al Levit a harpas anezho.

¹⁶ Met mibien an harlu a reas evel-henn: Dibabet e voe Ezdra an aberzhour ha pennoù tadoù hervez tiez o zadoù, holl dre o anvioù. Azezañ a rejont en deiz kentañ eus an dekvet miz evit ober war-dro an afer.

¹⁷ D'an deiz kentañ eus ar miz kentañ o doe echu gant an holl re o doa kemeret gwragez estren.

¹⁸ E-touez mibien an aberzhourien, e voe kavet hiniennoù hag o doa kemeret gwragez estren: a-douez mibien Jezua mab Jozadak hag a-douez e vreudeur, Maaseja, Eliezer, Jarib, Gedalia,

¹⁹ ar re-mañ a reas gouestl da gas kuit o gwragez ha da ginnig un tourz evel aberzh a gablusted;

²⁰ a-douez mibien Immer, Hanani ha Zebadia;

²¹ a-douez mibien Harim, Maaseja, Elia, Shemaja, Jehiel, Ozia;

²² a-douez mibien Pashur, Eljoenai, Maaseja, Ismael, Netaneel, Jozabad, Eleaza;

²³ a-douez al Levited, Jozabad, Shimei, Kelaja pe Kelita, Petakja, Juda, Eliezer;

²⁴ a-douez ar ganerien, Eliashib; a-douez ar borzhierien, Shallum, Telem, Uri.

²⁵ Hag e-touez re Israel: a-douez mibien Parosh, Ramia, Jizija, Malkija, Mijamin, Eleazar, Malkija, Benaja;

²⁶ a-douez mibien Elam, Matania, Zakaria, Jehiel, Abdi, Jeremod, Elia;

²⁷ a-douez mibien Zatu, Eljoenai, Eliashib, Matania, Jeremod, Zabad, Aziza;

²⁸ a-douez mibien Bebai, Jokanan, Hanania, Zabbai, Atlai;

²⁹ a-douez mibien Bani, Meshullam, Maluk, Adaja, Jashub, Sheal, Ramod;

³⁰ a-douez mibien Pakad-Moab, Adna, Kelal, Benaja, Maaseja, Matania, Bezaleel, Binnui, Manase;

³¹ a-douez mibien Harim, Eliezer, Jishija, Malkija, Shemaja, Simeon,

³² Benjamin, Maluk, Shemaria;

³³ a-douez mibien Hashum, Matnai, Matata, Zabad, Elifeled, Jeremai, Manase, Shimei;

³⁴ a-douez mibien Bani, Maadai, Amram, Uel,

³⁵ Benaja, Bedia, Keluhu,

³⁶ Vania, Meremod, Eliashib,

³⁷ Matania, Matnai, Jaasai,

³⁸ Bani, Binnui, Shimei,

³⁹ Shelemia, Natan, Adaja,

⁴⁰ Maknadbai, Shashai, Sharai,

⁴¹ Azareel, Shelemia, Shemaria,

⁴² Shallum, Amaria, Jozef;

⁴³ a-douez mibien Nebo, Jeiel, Matitia, Zabad, Zebina, Jadai, Joel, Benaja.

⁴⁴ An holl re-se o doa kemeret gwragez estren, ha meur a hini o doa bet bugale eus ar gwragez-se.