Ester 6 - Bibl Koad 21: Ar Bibl e Brezhoneg evit ar Vretoned

Pennad 6

¹ En noz-se ar roue ne c'hellas ket kousket, hag e c'hourc'hemennas degas levr an eñvorioù: an Danevelloù. Hag e voent lennet dirak ar roue.

² Hag e voe kavet skrivet en doa disklêriet Mardoke diwar-benn Bigtan ha Teresh, daou eus spazhidi ar roue a-douez gwarded an treuzoù, o doa klasket lakaat o dorn war ar roue Asueruz.

³ Ar roue a lavaras: Peseurt enor ha peseurt bri a zo bet kinniget da Vardoke evit kement-se? Ha tud ar roue a servije anezhañ a respontas: N'eus bet graet netra evitañ.

⁴ Ar roue a lavaras: Piv a zo el leurenn? Haman a oa deuet e leurenn an diavaez eus ti ar roue, evit lavarout d'ar roue krougañ Mardoke d'ar post-kroug en doa prientet evitañ.

⁵ Tud ar roue a lavaras dezhañ: Setu Haman a zo el leurenn; hag ar roue a lavaras: Ra zeuio-tre!

⁶ Haman eta a zeuas, hag ar roue a lavaras dezhañ: Petra a vo graet evit un den a fell d'ar roue enoriñ? Haman a lavaras en e galon: Da biv e fellfe d'ar roue ober muioc'h a enor eget din-me?

⁷ Hag Haman a lavaras d'ar roue: Diwar-benn an den a fell d'ar roue enoriñ,

⁸ ra vo degaset dezhañ dilhad roueel en deus gwisket ar roue, hag ur marc'h en deus aet ar roue warnañ, ra vo lakaet ur gurunenn roueel war e benn,

⁹ ra vo roet an dilhad-se hag ar marc'h-se da unan eus priñsed uhelañ ar roue, ra vo gwisket an den a fell d'ar roue enoriñ, ra vo graet dezhañ mont war varc'h dre straedoù kêr, ra vo huchet dirazañ: Evel-se e vez graet d'an den a fell d'ar roue enoriñ!

¹⁰ Neuze ar roue a lavaras da Haman: Hast buan, kemer an dilhad hag ar marc'h evel m'ec'h eus lavaret, ha gra evel-se da Vardoke ar Yuzev, a zo azezet ouzh dor ar roue. Na vank d'ober netra eus ar pezh ac'h eus lavaret.

¹¹ Hag Haman a gemeras an dilhad hag ar marc'h, a wiskas Mardoke hag a lakaas anezhañ da vont war varc'h dre straedoù kêr, en ur huchal dirazañ: Evel-se e vez graet d'an den a fell d'ar roue enoriñ!

¹² Goude-se, Mardoke a zistroas da zor ar roue, hag Haman en em dennas buan d'e di, gwall c'hlac'haret, goloet e benn.

¹³ Hag Haman a gontas da Zeresh e wreg ha da e holl vignoned kement a oa c'hoarvezet. Neuze e re fur ha Zeresh e wreg a lavaras: Mard eo Mardoke, ha te a grogas da gouezhañ dirazañ, eus gouenn ar Yuzevien, ne drec'hi ket warnañ, met kouezhañ a ri dirazañ.

¹⁴ Hag evel ma komzent c'hoazh gantañ, spazhidi ar roue a zeuas hag a hastas degas Haman d'ar fest aozet gant Ester.