Ermaeziadeg 9 - Bibl Koad 21: Ar Bibl e Brezhoneg evit ar Vretoned

Pennad 9 Gwalenn ar vosenn vras war al loened

¹ An AOTROU a lavaras da Voizez: Kae da gavout Faraon ha lavar: Evel-henn en deus lavaret an AOTROU , Doue an Hebreed: Lez va fobl da vont kuit, evit ma servijo ac'hanon,

² rak ma ne fell ket dit o lezel da vont ha mar he dalc'hez c'hoazh,

³ setu, dorn an AOTROU a vo war da loened a zo er parkeier, war ar c'hezeg, war an ezen, war ar c'hañvaled, war an ejened ha war an deñved: bez' e vo ur vosenn vras-meurbet.

⁴ An AOTROU a zisheñvelo etre loened Israel ha loened an Ejipsianed, ha ne varvo netra eus ar pezh holl a zo da vibien Israel.

⁵ An AOTROU a lakaas an amzer o lavarout: Warc'hoazh e raio an AOTROU kement-se er vro.

⁶ An AOTROU a reas eta kement-se adalek an deiz war-lerc'h, hag holl loened an Ejipsianed a varvas, met eus loened mibien Israel ne varvas ket ul loen zoken.

⁷ Faraon a gasas da welout ha setu, ne oa marvet loen ebet eus loened Israel. Met kalon Faraon a galetaas, ne lezas ket ar bobl da vont kuit.

Gwalenn ar goulioù bev

⁸ An AOTROU a lavaras da Voizez ha da Aaron: Kemerit leizh ho taouarn a ludu-forn, ha ra daolo Moizez anezhañ etrezek an neñvoù dirak daoulagad Faraon.

⁹ Dont a raio da vezañ poultr war holl vro Ejipt, hag e vo war an dud ha war al loened goulioù goret e breinadur en holl vro Ejipt.

¹⁰ Kemer a rejont eta ludu-forn hag en em zalc'hjont dirak Faraon. Moizez en taolas etrezek an neñvoù hag e vo war an dud ha war al loened goulioù goret e breinadur.

¹¹ Ar strobinellerien ne c'helljont ket en em zerc'hel dirak Moizez en abeg d'ar goulioù. Rak ar goulioù a oa war ar strobinellerien evel war an holl Ejipsianed.

¹² An AOTROU a galetaas kalon Faraon, n'o selaouas ket evel m'en doa lavaret an AOTROU da Voizez.

Gwalenn ar grizilh

¹³ An AOTROU a lavaras da Voizez: Sav beure-mat, en em zalc'h dirak Faraon ha lavar: Evel-henn en deus lavaret an AOTROU , Doue an Hebreed: Lez va fobl da vont kuit, evit ma servijo ac'hanon,

¹⁴ rak ar wech-mañ e kasin va holl c'houlioù war da galon, war da servijerien ha war da bobl, evit ma ouezi penaos n'eus hini ebet heñvel ouzhin war an douar holl.

¹⁵ Rak bremañ, mar em bije astennet va dorn ha mar em bije skoet warnout dre ar marv, te ha da bobl, e vijes skubet a-ziwar an douar.

¹⁶ Met evit kement-mañ em eus da lakaet da chom: evit ma weli va galloud hag evit ma vo embannet va anv dre an douar holl.

¹⁷ Mar en em savez c'hoazh a-enep va fobl evit e herzel da vont kuit,

¹⁸ setu, me a lakaio warc'hoazh, d'an eur-mañ, da gouezhañ ur grizilh ken bras, ken n'en deus bet netra heñvel outañ en Ejipt adalek an deiz m'eo bet diazezet betek bremañ.

¹⁹ Bremañ eta, kas da lakaat da loened e surentez, ha kement ac'h eus er parkeier. Ar grizilh a gouezho war an dud holl ha war al loened a vo er parkeier ha ne vo ket en em dennet en tiez, hag e varvint.

²⁰ E-touez servijerien Faraon, an hini a zouje komz an AOTROU a lakaas raktal d'en em dennañ en e di e servijerien hag e loened.

²¹ Met an hini na lakae ket evezh ouzh komz an AOTROU a lezas e servijerien hag e loened er parkeier.

²² An AOTROU a lavaras da Voizez: Astenn da zorn war-zu an neñvoù, evit ma vo grizilh war holl vro Ejipt, war an dud, war al loened ha war holl c'heot ar parkeier e bro Ejipt.

²³ Moizez a astennas eta e wialenn etrezek an neñvoù, hag an AOTROU a gasas tarzhioù-kurun ha grizilh, hag an tan a rede war an douar. An AOTROU a lakaas grizilh da gouezhañ war vro Ejipt.

²⁴ Hag e voe grizilh hag un tan dalc'hus e-kreiz ar grizilh. Bez' e oa ken kreñv ken ne oa ket bet kemend-all war holl vro Ejipt abaoe ma oa deuet da vezañ ur bobl.

²⁵ Ar grizilh a skoas, en holl vro Ejipt, war gement a voe er parkeier, adalek an dud betek al loened. Ar grizilh a skoas ivez war holl c'heot ar parkeier hag a dorras holl wez ar parkeier.

²⁶ E bro C'hosen, a oa enni mibien Israel, ne voe ket a c'hrizilh.

²⁷ Faraon a gasas da c'hervel Moizez hag Aaron, hag a lavaras: Pec'het em eus ar wech-mañ, an AOTROU a zo reizh, ha me ha va fobl a zo fallakr.

²⁸ Pedit an AOTROU , ha ma ne vo ken na kurunadoù na grizilh; me ho lezo da vont ha c'hwi ne chomot ket pelloc'h.

²⁹ Moizez a lavaras: Adalek ma vin aet kuit eus kêr, ec'h astennin va daouarn etrezek an AOTROU , ar c'hurunadoù a baouezo ha ne vo ken a c'hrizilh, evit ma ouezi penaos an douar a zo d'an AOTROU .

³⁰ Met gouzout a ran penaos te ha da servijerien ne zoujot ket c'hoazh an AOTROU Doue.

³¹ Al lin hag an heiz a oa bet skoet, rak an heiz a oa o tañvouezennañ hag a lin a oa e bleuñv.

³² Met ar gwinizh hag ar yell ne oant ket bet skoet, dre ma oant diwezhatoc'h.

³³ Moizez a guitaas Faraon, a yeas kuit eus kêr hag a astennas e zaouarn war-zu an AOTROU . Ar c'hurunadoù hag ar grizilh a baouezas, hag ar glav ne voe ken skuilhet war an douar.

³⁴ Faraon, o welout penaos e oa ar glav, ar grizilh hag ar c'hurunadoù paouezet, a gendalc'has c'hoazh da bec'hiñ hag a galetaas e galon, eñ hag e servijerien.

³⁵ Kalon Faraon a galetaas, ne lezas ket mibien Israel da vont kuit evel m'en doa lavaret an AOTROU dre c'henoù Moizez.