Ermaeziadeg 8 - Bibl Koad 21: Ar Bibl e Brezhoneg evit ar Vretoned

Pennad 8 Gwalenn ar raned

¹ An AOTROU a lavaras da Voizez: Kae da gavout Faraon ha lavar: Evel-henn en deus lavaret an AOTROU: Lez va fobl da vont kuit, evit ma servijo ac'hanon.

² Ma ne fell ket dit o lezel da vont kuit, setu, ez an da skeiñ war da holl zouar gant raned.

³ Ar stêr a vervo a raned a bigno hag a yelo ez ti, ez kambr e-lec'h ma kouskez, war da wele, e ti da servijerien, e-touez da bobl, ez fornioù, ez irc'hier.

⁴ Ar raned a bigno warnout, war da bobl ha war da holl servijerien.

⁵ An AOTROU a lavaras da Voizez: Lavar da Aaron: Astenn da zorn gant da wialenn war ar stêrioù, war ar gwazhioù-dour ha war al lennoù, ha laka ar raned da bignat war vro Ejipt.

⁶ Aaron a astennas e zorn war doureier an Ejipt, hag ar raned a bignas hag a c'holoas bro Ejipt.

⁷ Met ar strobinellerien a reas an hevelep traoù dre o strobinelloù, o lakaat raned da bignat war vro Ejipt.

⁸ Faraon a c'halvas Moizez hag Aaron, hag a lavaras: Pedit evidon an AOTROU , evit ma pellaio ar raned diouzhin ha diouzh va fobl, hag e lezin ar bobl da vont evit aberzhiñ d'an AOTROU .

⁹ Moizez a lavaras da Faraon: Dit-te an enor da lavarout din a-benn pegoulz e tlein pediñ evidout, evit da servijerien hag evit da bobl, evit ma vo lamet ar raned pell diouzhit ha diouzh da diez, ha ne chomint nemet er stêr.

¹⁰ Eñ a respontas: A-benn warc'hoazh. Ha Moizez a lavaras: Graet e vo hervez da gomz, evit ma ouezi penaos n'eus hini ebet heñvel ouzh an AOTROU hon Doue.

¹¹ Ar raned eta a bellaio diouzhit ha diouzh da diez, da servijerien ha da bobl; er stêr nemetken e chomint.

¹² Moizez hag Aaron a yeas kuit a-zirak Faraon. Ha Moizez a grias d'an AOTROU diwar-benn ar raned en doa lakaet da zont war Faraon.

¹³ An AOTROU a reas hervez komz Moizez, hag ar raned a varvas en tiez, er c'hêriadennoù hag er parkeier.

¹⁴ Dastumet e voent a-wrac'helladoù, hag e flaerias an douar.

¹⁵ Faraon, o welout e oa un ehan, a galetaas e galon, ne selaouas ket anezho evel m'en doa lavaret an AOTROU .

Gwalenn al laou

¹⁶ An AOTROU a lavaras da Voizez: Lavar da Aaron: Astenn da wialenn ha sko war boultr an douar, hag e teuio da vezañ laou war holl vro Ejipt.

¹⁷ Hag e rejont evel-se: Aaron a astennas e zorn gant e wialenn hag a skoas war boultr an douar, hag e teuas da vezañ laou war an dud ha war al loened. Holl boultr ar vro a zeuas da vezañ laou war holl vro Ejipt.

¹⁸ Ar strobinellerien a reas an hevelep traoù dre o strobinelloù evit produiñ laou, met ne c'helljont ket. Al laou a voe eta war an dud ha war al loened.

¹⁹ Neuze ar strobinellerien a lavaras da Faraon: Biz Doue eo. Met kalon Faraon a galetaas, ne selaouas ket anezho evel m'en doa lavaret an AOTROU .

Gwalenn ar c'helien

²⁰ An AOTROU a lavaras da Voizez: Sav beure-mat hag en em zalc'h dirak Faraon. Setu ez aio etrezek an dour, hag e lavari dezhañ: Evel-henn en deus lavaret an AOTROU: Lez va fobl da vont kuit, evit ma servijo ac'hanon.

²¹ Ma ne lezez ket va fobl da vont kuit, setu, ez an da gas kelien warnout, war da servijerien, war da bobl ha war da diez; tiez an Ejipsianed a vo leuniet gant kelien, ha zoken an douar emaint warnañ.

²² Met disheñvelout a rin en deiz-se bro C'hosen, e-lec'h emañ va fobl o chom, ha ne vo ket eno a gelien, evit ma ouezi penaos me, an AOTROU , a zo e-kreiz ar vro.

²³ Lakaat a rin un diforc'h etre va fobl ha da bobl. Warc'hoazh en em gavo ar sin-se.

²⁴ An AOTROU a reas evel-se, hag e teuas kelien en niver bras e ti Faraon hag e ti e servijerien. War holl vro Ejipt, an douar a voe glac'haret gant ar c'helien.

²⁵ Faraon a c'halvas Moizez hag Aaron, hag a lavaras: Kit, aberzhit d'ho Toue er vro.

²⁶ Moizez a lavaras: N'eo ket dereat ober kement-se, rak ar pezh a aberzhfemp d'an AOTROU hon Doue a vefe un euzhusted dirak an Ejipsianed. Setu, mar kinnigfemp dirak o daoulagad aberzhoù a zo un euzhusted dirak an Ejipsianed, ha ne veinataint ket ac'hanomp?

²⁷ Ni a raio ur veaj a dri devezh er gouelec'h da aberzhiñ d'an AOTROU hon Doue, evel ma lavaro deomp.

²⁸ Faraon a lavaras: Me ho lezo da vont da aberzhiñ d'an AOTROU ho Toue er gouelec'h, nemet ned eot ket pell. Pedit evidon.

²⁹ Moizez a lavaras: Pa vin aet kuit eus da gichen, e pedin an AOTROU ; warc'hoazh, ar c'helien a bellaio diouzh Faraon, diouzh e servijerien ha diouzh e bobl. Nemet na zalc'ho ket Faraon da dromplañ en ur herzel ouzh ar bobl da vont da aberzhiñ d'an AOTROU .

³⁰ Moizez a yeas kuit eus kichen Faraon hag a bedas an AOTROU .

³¹ An AOTROU a reas hervez komz Moizez, ar c'helien a bellaas diouzh Faraon, diouzh e servijerien ha diouzh e bobl: ne chomas ket unan anezho.

³² Met Faraon a galetaas e galon c'hoazh ar wech-mañ, ne lezas ket ar bobl da vont kuit.