Ermaeziadeg 40 - Bibl Koad 21: Ar Bibl e Brezhoneg evit ar Vretoned

Pennad 40 An tabernakl a zo savet

¹ An AOTROU a gomzas da Voizez o lavarout:

² D'an deiz kentañ eus ar miz kentañ, e savi an tabernakl, teltenn an engalv.

³ Lakaat a ri arc'h an Testeni hag e c'holoi an arc'h gant ar ouel.

⁴ Degas a ri an daol hag e lakai warni ar pezh a dle bezañ lakaet. Degas a ri ar c'hantolor hag ec’h enaoui e lampoù.

⁵ Lakaat a ri an aoter aour evit an ezañs dirak arc'h an Testeni, hag e lakai ar rideoz ouzh digor an tabernakl.

⁶ Lakaat a ri aoter al loskaberzhoù dirak digor an tabernakl, teltenn an engalv.

⁷ Lakaat a ri al laouer etre teltenn an engalv hag an aoter, hag e lakai dour enni.

⁸ Lakaat a ri al leurenn tro-dro, hag e lakai ar rideoz ouzh dor al leurenn.

⁹ Kemer a ri eoul an oleviadur hag ec'h olevi an tabernakl ha kement a zo ennañ, hag e santelai anezhañ gant e holl draoù. Hag e vo santel.

¹⁰ Oleviñ a ri aoter al loskaberzhoù hag hec'h holl draoù, hag e santelai an aoter. Hag an aoter a vo santel-meurbet.

¹¹ Oleviñ a ri al laouer gant he foñs, hag e santelai anezhi.

¹² Lakaat a ri Aaron hag e vibien da dostaat ouzh digor teltenn an engalv, hag e walc'hi anezho gant dour.

¹³ Gwiskañ a ri Aaron gant ar gwiskamantoù santel hag ec'h olevi anezhañ, hag e santelai anezhañ, evit ma servijo ac'hanon evel aberzhour.

¹⁴ Lakaat a ri e vibien da dostaat, hag e wiski anezho gant an tonegoù,

¹⁵ hag ec'h olevi anezho evel ma ez po olevet o zad, evit ma servijint ac'hanon evel aberzhourien. O oleviadur a roio dezho da vezañ aberzhourien da viken, a rummadoù da rummadoù.

¹⁶ Moizez a reas hervez kement en doa gourc'hemennet an AOTROU dezhañ; ober a reas evel-se.

¹⁷ D'an deiz kentañ eus ar miz kentañ eus an eil bloaz, e voe savet an tabernakl.

¹⁸ Moizez a savas an tabernakl, hag e lakaas e sichennoù, hag e lakaas e blenk, hag e lakaas e varrennoù, hag e savas e golonennoù.

¹⁹ Astenn a reas an deltenn war an tabernakl, hag e lakaas golo an deltenn dreist, evel m'en doa gourc'hemennet an AOTROU da Voizez.

²⁰ Kemer a reas an Testeni hag en lakaas en arc'h, hag e lakaas ar barrennoù d'an arc'h, hag e lakaas al lec'h-a-drugarez war an arc'h, dreist.

²¹ Degas a reas an arc'h en tabernakl, hag e lakaas ar ouel a zisparti evit goleiñ arc'h an Testeni, evel m'en doa gourc'hemennet an AOTROU da Voizez.

²² Lakaat a reas an daol e teltenn an engalv ouzh kostez an tabernakl a oa war-zu an hanternoz, en diavaez d'ar ouel,

²³ hag e fichas warni ar baraoù kempenn-mat dirak an AOTROU , evel m'en doa gourc'hemennet an AOTROU da Voizez.

²⁴ Lakaat a reas ar c'hantolor e teltenn an engalv, a-dal d'an daol, ouzh kostez an tabernakl a oa war-zu ar c'hreisteiz.

²⁵ Enaouiñ a reas al lampoù dirak an AOTROU , evel m'en doa gourc'hemennet an AOTROU da Voizez.

²⁶ Lakaat a reas an aoter aour e teltenn an engalv dirak ar ouel,

²⁷ hag e lakaas eno da vogediñ an ezañs a c'hwezh-vat, evel m'en doa gourc'hemennet an AOTROU da Voizez.

²⁸ Lakaat a reas ar rideoz ouzh digor an tabernakl.

²⁹ Lakaat a reas aoter al loskaberzhoù dirak digor an tabernakl, teltenn an engalv, hag e kinnigas warni al loskaberzh hag ar brofadenn, evel m'en doa gourc'hemennet an AOTROU da Voizez.

³⁰ Lakaat a reas al laouer etre teltenn an engalv hag an aoter, hag e lakaas dour enni evit ar walc'hidigezh.

³¹ Moizez hag Aaron hag e vibien a walc'he enni o daouarn hag o zreid.

³² Pa'z aent da deltenn an engalv ha pa dostaent ouzh an aoter, en em walc'hent, evel m'en doa gourc'hemennet an AOTROU da Voizez.

³³ Fichañ a reas al leurenn en-dro d'an tabernakl ha d'an aoter, hag e lakaas ar rideoz ouzh dor al leurenn. Evel-se Moizez a echuas al labour.

Gloar an AOTROU a leugn an tabernakl

³⁴ Hag ar goabrenn a c'holoas teltenn an engalv, ha gloar an AOTROU a leunias an tabernakl,

³⁵ e doare na c'hellas ket Moizez mont e teltenn an engalv, rak ar goabrenn en em zalc'he warni ha gloar an AOTROU a leunie an tabernakl.

³⁶ A-hed o c'herzhadegoù, pa save ar goabrenn a-ziwar gorre an tabernakl, mibien Israel a yae kuit;

³⁷ met pa ne save ket ar goabrenn, ned aent ket betek an deiz ma save.

³⁸ Koabrenn an AOTROU a oa war an tabernakl e-pad an deiz, hag an tan a oa e-pad an noz, dirak holl di Israel a-hed o c'herzhadegoù.