Ermaeziadeg 39 - Bibl Koad 21: Ar Bibl e Brezhoneg evit ar Vretoned

Pennad 39 Gwiskamantoù an aberzhour-meur

¹ Gant limestra, tane ha ruz-moug e rejont gwiskamantoù evit ar servij, evit ober ar servij er santual, hag e rejont ar gwiskamantoù santel evit Aaron, evel m'en doa gourc'hemennet an AOTROU da Voizez.

An efod

² Ober a rejont an efod gant aour, limestra, tane, ruz-moug ha lin fin plañsonet.

³ Astennet e voe laonennoù aour, hag e voent troc'het e neudennoù da gemmeskañ gant al limestra, gant an tane, gant ar ruz-moug ha gant al lin fin, evel un oberenn arzour.

⁴ Graet e voe dezhañ skoazgennoù evit e stagañ; en em stagañ a rae evel-se dre e zaou benn.

⁵ Lakaet e voe ur gouriz dreist an efod, hag e oa eus an hevelep pezh hag eus an hevelep labour, graet gant aour, limestra, tane, ruz-moug ha lin fin plañsonet, evel m'en doa gourc'hemennet an AOTROU da Voizez.

⁶ Mein oniks a voe kelc'hiet gant lagadoù aour, hag anvioù mibien Israel a voe engravet warno, evel ma labour an engraver-sielloù.

⁷ Lakaet e voent war skoazgennoù an efod evel mein-eñvor evit mibien Israel, evel m'en doa gourc'hemennet an AOTROU da Voizez.

Ar gwisk-bruched

⁸ Graet e voe ar gwisk-bruched evel un oberenn arzour, eus an hevelep labour hag an efod, gant aour, limestra, tane, ruz-moug ha lin fin plañsonet.

⁹ Karrezek e oa; graet e voe ar gwisk-bruched doubl, e hirder a oa ur rahouennad hag e ledander ur rahouennad; doubl e oa.

¹⁰ Sterniet e voe ennañ peder renkad vein; ar renkad kentañ: un agatenn-ruz, un topaz, un emrodez;

¹¹ an eil renkad: ur skarbouklenn, ur safirenn, un diamant;

¹² an deirvet renkad: un opalenn, un agatenn, un ametist;

¹³ ar bedervet renkad: ur c'hrizolit, un oniks, ur yalp. Ar mein-se a voe sterniet gant aour en o gwarnisadur.

¹⁴ Ar vein a oa, hervez anvioù mibien Israel, daouzek anezho, hervez o anvioù. Engravet e oant evel sielloù, pep hini hervez e anv evit an daouzek meuriad.

¹⁵ Graet e voe war ar gwisk-bruched chadennoùigoù aour glan, tortiset e-doare kordennoùigoù.

¹⁶ Graet e voe daou lagad aour ha div lagadenn aour, hag e voe lakaet an div lagadenn ouzh daou benn ar gwisk-bruched.

¹⁷ Lakaet e voe an div gordennig aour en div lagadenn e pennoù ar gwisk-bruched.

¹⁸ Daou benn an div gordennig a voe lakaet en daou lagad lec'hiet war skoazgennoù an efod, war an diaraog.

¹⁹ Graet e voe div lagadenn aour, a voe lakaet ouzh daou benn all ar gwisk-bruched, war ar vevenn a oa ouzh kostez an efod, en diabarzh.

²⁰ Graet e voe div lagadenn aour, a voe lakaet ouzh div skoazgenn an efod, en traoñ, war an diaraog, a-geñver d'ar junt, dreist gouriz an efod.

²¹ Staget e voe ar gwisk-bruched dre e lagadennoù ouzh lagadennoù an efod gant ur gordennig limestra, evit ma talc'hje war gouriz an efod ha na zistagje ket ar gwisk-bruched diouzh an efod, evel m'en doa gourc'hemennet an AOTROU da Voizez.

Sae an efod

²² Graet e voe sae an efod e gwiadenn, en he fezh gant limestra.

²³ Bez' e oa e-kreiz ar sae un digor evel digor ur jakoun, hag e oa ur vevenn d'an digor tro-war-dro evit na fregje ket.

²⁴ Lakaet e voe ouzh he gouremoù greunadez limestra, tane ha ruz-mouk, e neud plañsonet,

²⁵ graet e voe kleierigoù aour glan, hag e voe lakaet ar c'hleierigoù etre ar greunadez ouzh gouremoù ar sae tro-war-dro etre ar greunadez,

²⁶ ur c'hloc'hig aour hag ur c'hreunadezenn, ur c'hloc'hig aour hag ur c'hreunadezenn, ouzh gouremoù ar sae tro-war-dro, evit ober ar servij, evel m'en doa gourc'hemennet an AOTROU da Voizez.

An tonegoù hag an talgen a santelezh

²⁷ Graet e voe an tonegoù e lin fin, e gwiadenn, evit Aaron hag evit e vibien,

²⁸ an diarenn e lin fin, ar mintroù e lin fin evit o c'haerder, ar brageier e lin, lin fin plañsonet,

²⁹ ar gouriz e lin fin plañsonet, limestra, tane ha ruz-mouk, en oberenn broderezh, evel m'en doa gourc'hemennet an AOTROU da Voizez.

³⁰ Graet e voe gant aour glan an talgen, ar gurunenn santel, hag e voe skrivet warnañ evel labour engraver-sielloù: SANTELEZH D'AN AOTROÙ.

³¹ Lakaet e voe ennañ ur gordennig limestra; eñ a oa war an diarenn, ouzh krec'h, evel m'en doa gourc'hemennet an AOTROU da Voizez.

Moizez a wel an tabernakl

³² Evel-se e voe echuet holl labour an tabernakl, teltenn an engalv. Mibien Israel a rejont evel m'en doa gourc'hemennet an AOTROU da Voizez; ober a rejont evel-se.

³³ Hag e tegasjont an tabernakl da Voizez, an deltenn hag hec'h holl draoù, ar c'hlochedoù, ar plenk, ar barrennoù, ar c'holonennoù, ar sichennoù,

³⁴ ar golo e krec'hin tourzed livet e ruz, ar golo e krec'hin a liv hiasint, ar ouel a zisparti,

³⁵ arc'h an Testeni gant he barrennoù, al lec'h-a-drugarez,

³⁶ an daol gant hec'h holl draoù, ar baraoù a ginnig,

³⁷ ar c'hantolor glan gant e lampoù, al lampoù kempennet, e holl draoù, an eoul evit ar c'hantolor,

³⁸ an aoter aour, eoul an oleviadur, an ezañs a c'hwezh-vat, ar rideoz evit digor an deltenn,

³⁹ an aoter arem gant he c'hael arem, he barrennoù, hec'h holl draoù, al laouer gant he foñs,

⁴⁰ lienoù al leurenn, he c’holonennoù, he sichennoù, rideoz dor al leurenn gant e gerdin, e beulioù, an holl draoù evit servij an tabernakl, evit teltenn an engalv,

⁴¹ gwiskamantoù ar servij evit ober ar servij er santual, ar gwiskamantoù santel evit Aaron an aberzhour, gwiskamantoù e vibien evit ar servij evel aberzhourien.

⁴² Mibien Israel o doa graet an holl labour hervez kement en doa gourc'hemennet an AOTROU da Voizez.

⁴³ Moizez a welas an holl labour ha setu: graet o doa al labour evel m'en doa gourc'hemennet an AOTROU ; graet o doa evel-se. Ha Moizez o bennigas.