Ermaeziadeg 38 - Bibl Koad 21: Ar Bibl e Brezhoneg evit ar Vretoned

Pennad 38 Aoter al loskaberzhoù

¹ Ober a reas aoter al loskaberzhoù e koad kasia, e hirder a oa pemp ilinad hag e ledander pemp ilinad. Karrezek e oa hag e uhelder a oa tri ilinad.

² Ober a reas ouzh he fevar c'horn kerniel a zeue er-maez eus an aoter, hag o goloas gant arem.

³ Ober a reas holl draoù an aoter, ar podoù, ar palioù, an hanafoù, ar fourchetezioù, ar podoù-glaou-bev; hag e reas hec'h holl draoù gant arem.

⁴ Ober a reas evit an aoter ur gael evel un dreilh, en arem, a lakaas dindan bardell an aoter, adalek an traoñ, hag an dreilh a save betek kreiz an aoter.

⁵ Teuziñ a reas peder lagadenn a lakaas ouzh pevar c'horn ar gael en arem, da zegemer ar barrennoù.

⁶ Ober a reas ar barrennoù e koad kasia hag o goloas gant arem.

⁷ Lakaat a reas ar barrennoù el lagadennoù a oa ouzh kostezioù an aoter evit he dougen ganto. Hec'h ober a reas kleuz, gant plenk.

Al laouer arem

⁸ Ober a reas al laouer arem gant he foñs arem, gant melezourioù ar merc'hed a servije, a rae ar servij ouzh digor teltenn an engalv.

Al leurenn

⁹ Ober a reas al leurenn. Evit kostez ar su, war-zu ar c'hreisteiz, e oa evit al leurenn lienoù e lin fin plañsonet, eus kant ilinad a hirder,

¹⁰ hag ugent kolonenn hag o ugent sichenn arem. Tachoù ar c'holonennoù hag o zriklennoù a oa en arc'hant.

¹¹ Evit kostez an norzh, war-zu an hanternoz, e oa kant ilinad a lienoù, hag ugent kolonenn hag o ugent sichenn arem, ha tachoù ar c'holonennoù hag o zriklennoù en arc'hant.

¹² Evit kostez ar c'hornôg, war-zu ar c'huzh-heol, e oa hanter-kant ilinad a lienoù, gant o dek kolonenn hag o dek sichenn, ha tachoù ar c'holonennoù hag o zriklennoù en arc'hant.

¹³ Evit kostez a-ziaraok, war-zu ar sav-heol, e oa hanter-kant ilinad,

¹⁴ pemzek ilinad a lienoù evit ur gazel, gant o zeir c'holonenn hag o zeir sichenn,

¹⁵ pemzek ilinad a lienoù evit an eil kazel, a oa en tu all eus dor al leurenn, gant o zeir c'holonenn hag o zeir sichenn.

¹⁶ Holl lienoù al leurenn, tro-war-dro, a oa e lin fin plañsonet.

¹⁷ Sichennoù ar c'holonennoù a oa en arem, tachoù ar c'holonennoù hag o zriklennoù a oa en arc'hant, o zogennoù a oa goloet gant arc'hant. Holl golonennoù al leurenn a oa staget gant triklennoù arc'hant.

¹⁸ Rideoz dor al leurenn a oa un oberenn broderezh e limestra, tane ha ruz-mouk, e lin fin plañsonet; e hirder a oa ugent ilinad hag e uhelder, evel ledander lienoù al leurenn, a oa pemp ilinad.

¹⁹ O feder c'holonenn hag o feder sichenn a oa en arem, o zachoù a oa en arc'hant, o zogennoù a oa goloet gant arc'hant, o zriklennoù a oa en arc'hant.

²⁰ An holl beulioù evit an tabernakl hag evit al leurenn tro-dro a oa en arem.

Danvezioù implijet

²¹ Setu kontoù an tabernakl, tabernakl an Testeni, a voe graet war urzh Moizez gant al Levited, dindan renerezh Itamar mab Aaron an aberzhour.

²² Bezaleel mab Uri mab Hur eus meuriad Juda a reas kement en doa gourc'hemennet an AOTROU da Voizez,

²³ ha gantañ Oholiab mab Ahizamak eus meuriad Dan, engraver, ijiner ha broder e limestra, e tane, e ruz-moug hag e lin fin.

²⁴ An holl aour a oa implijet evit al labour, en holl labourioù ar santual, hag a oa aour ar profoù, a oa nav zalant warn-ugent ha seizh kant tregont sikl, hervez sikl ar santual.

²⁵ Arc'hant ar vodadenn a voe niveret a oa kant talant ha mil seizh kant pemzek sikl ha tri-ugent, hervez sikl ar santual,

²⁶ un hanter sikl dre benn, an hanter eus ur sikl, hervez sikl ar santual, evit kement a dremenas dre an niveradeg, adalek ugent vloaz ha dreistoc'h, da lavarout eo evit c'hwec'h kant tri mil pemp kant hag hanter-kant den.

²⁷ Bez' e voe eta kant talant arc'hant evit teuziñ sichennoù ar santual ha sichennoù ar ouel, kant sichenn evit kant talant, un talant dre sichenn.

²⁸ Gant ar mil seizh kant pemzek sikl ha tri-ugent, e voe graet an tachoù evit ar c'holonennoù, goloet e voe o zogennoù, hag e voent staget dre driklennoù.

²⁹ Arem ar profoù a voe dek talant ha tri-ugent ha daou vil pevar c'hant sikl.

³⁰ Graet e voe ganto sichennoù digor teltenn an engalv, an aoter arem, he c'hael, holl draoù an aoter,

³¹ sichennoù al leurenn tro-dro, sichennoù dor al leurenn, holl beulioù an tabernakl hag holl beulioù al leurenn tro-dro.