Ermaeziadeg 36 - Bibl Koad 21: Ar Bibl e Brezhoneg evit ar Vretoned

Pennad 36 Oberiadur an tabernakl: ar goloioù

¹ Bezaleel, Oholiab hag an holl dud skiantek en doa lakaet an AOTROU ijin ha gouiziegezh enno da c'houzout ober pep tra evit servij ar santual, a reas kement en doa gourc'hemennet an AOTROU .

² Moizez a c'halvas Bezaleel, Oholiab hag an holl dud skiantek en doa lakaet an AOTROU ijin en o c'halon, ar re holl a lakae o c'halon anezho da dostaat evit ober al labour,

³ hag e kemerjont a-zirak Moizez an holl brofoù o doa degaset mibien Israel d'ober pep tra evit servij ar santual. Hag e voe degaset dezhañ c'hoazh bep beure profoù a volontez vat.

⁴ Neuze an holl dud skiantek a rae holl labour ar santual a guitaas pep hini anezho al labour a rae,

⁵ hag a zeuas da lavarout da Voizez: Ar bobl a zegas kalz muioc'h eget n'eus ezhomm evit servij al labour en deus gourc'hemennet Doue ober.

⁶ Dre urzh Moizez e voe kriet dre ar c'hamp: Ra ne raio na gwaz na gwreg labour ebet ken evit prof ar santual. Evel-se e voe miret ouzh ar bobl degas tra ebet.

⁷ Hag e voe a-walc'h a draoù evit an holl labourioù da ober. Bez' e voe zoken a re.

⁸ An holl dud skiantek a rae labour an tabernakl a reas dek pallenn lin fin plañsonet, limestra, tane ha ruz-mouk, gant cherubined a voe graet evel un oberenn arzour.

⁹ Hirder ur pallenn a oa eizh ilinad warn-ugent ha ledander an hevelep pallenn a oa pevar ilinad. An holl ballennoù o doa an hevelep ment.

¹⁰ Pemp pallenn a voe staget an eil ouzh eben, hag ar pemp all a voe ivez staget an eil ouzh eben.

¹¹ Graet e voe ivez lasoù limestra war vord ar pallenn kentañ, e penn an dastum, hag e voe graet an hevelep tra da vord ar pallenn diwezhañ, en eilvet dastum.

¹² Graet e voe hanter-kant las d'ar pallenn kentañ, hag e voe graet hanter-kant las da vord ar pallenn a vo en eilvet dastum. Al lasoù a voe an eil a-dal d'egile.

¹³ Graet e voe hanter-kant kloched aour, hag e voe unanet an eil pallenn d'egile gant ar c'hlochedoù, evit ma vefe an tabernakl en ur pezh hepken.

¹⁴ Graet e voe pallennoù blev girvi, evit servijañ da deltenn war an tabernakl. Graet e voe unnek pallenn evel-se.

¹⁵ Hirder ur pallenn a oa tregont ilinad ha ledander an hevelep pallenn a oa pevar ilinad. An unnek pallenn o doa an hevelep ment.

¹⁶ Unanet e voe pemp eus ar pallennoù-se a-du, hag ar c'hwec'h pallenn all a-du.

¹⁷ Graet e voe hanter-kant las war vord ar pallenn diwezhañ eus an dastum, hag hanter-kant las war vord ar pallenn eus an eilvet dastum.

¹⁸ Graet e voe hanter-kant kloched arem evit dastum an deltenn, evit ma raje ur pezh hepken.

¹⁹ Graet e voe evit an deltenn ur golo krec'hin tourzed livet e ruz, hag ur golo krec'hin a liv hiasint dreist.

Ar plenk hag o sichennoù

²⁰ Graet e voe evit an tabernakl plenk koad kasia a voe lakaet da zerc'hel en o sav.

²¹ Hirder ur plankenn a oa dek ilinad ha ledander an hevelep plankenn a oa un ilinad hanter.

²² Bez' e oa daou zalc'h da bep plankenn, da stagañ an eil ouzh egile. Graet e voe en hevelep doare evit holl blenk an tabernakl.

²³ Graet e voe eta ar plenk evit an tabernakl: ugent plankenn evit kostez ar su, war-zu ar c'hreisteiz.

²⁴ Dindan an ugent plankenn e voe graet daou-ugent sichenn arc'hant, evit e zaou zalc'h, ha div sichenn dindan ur plankenn all, evit e zaou zalc'h.

²⁵ Graet e voe ugent plankenn evit kostez all an tabernakl, war-zu an hanternoz,

²⁶ hag o daou-ugent sichenn arc'hant, div sichenn dindan ur plankenn ha div sichenn dindan ur plankenn all.

²⁷ Graet e voe c'hwec'h plankenn evit foñs an tabernakl, war-zu ar c'huzh-heol.

²⁸ Graet e voe daou blankenn, evit kognoù an tabernakl, er foñs;

²⁹ doubl e oant adalek an traoñ, ha doubl e oant, staget mat, ouzh krec'h, betek al lagadenn gentañ. Evel-se e voe graet evito o-daou, evit an daou gogn.

³⁰ Bez' e oa eta eizh plankenn hag o c'hwezek sichenn arc'hant, div sichenn dindan ur plankenn ha div sichenn dindan ur plankenn all.

³¹ Graet e voe pemp barrenn koad kasia evit ar plenk eus ur c'hostez d'an tabernakl,

³² ha pemp barrenn evit plenk ar c'hostez all d'an tabernakl, ha pemp barrenn evit kostez an tabernakl a oa er foñs, war-zu ar c'huzh-heol.

³³ Graet e voe barrenn ar c'hreiz a oa e-kreiz ar plenk hag a yae eus ur penn d'ar penn all.

³⁴ Goloet e voe ar plenk gant aour, hag e voe graet o lagadennoù gant aour evit lakaat ar barrennoù, hag e voe goloet ar barrennoù gant aour.

Ar ouel hag ar rideoz

³⁵ Graet e voe ur ouel limestra, tane ha ruz-mouk, e lin fin plañsonet; graet e voe evel un oberenn arzour gant cherubined.

³⁶ Graet e voe dezhi peder c'holonenn kasia goloet gant aour. O zachoù a oa en aour, hag e voe teuzet dezho peder sichenn arc'hant.

³⁷ Evit digor an deltenn, e voe graet ur rideoz limestra, tane ha ruz-mouk, e lin fin plañsonet; un oberenn broderezh e oa.

³⁸ Graet e voe e bemp kolonenn hag o zachoù, hag e voe goloet gant aour o zogennoù hag o zriklennoù; o femp sichenn a oa en arem.