Ermaeziadeg 35 - Bibl Koad 21: Ar Bibl e Brezhoneg evit ar Vretoned

Pennad 35 Ar sabad meneget a-nevez

¹ Moizez a zastumas holl vodadenn mibien Israel hag a lavaras: Setu amañ an traoù en deus gourc'hemennet an AOTROU d'ober.

² Al labour a vo graet e-pad c'hwec'h devezh, met ar seizhvet devezh a vo evidoc'h un dra santel, ar sabad-diskuizh evit an AOTROU . Piv bennak a raio ul labour en deiz-se a vo lakaet d'ar marv.

³ Ne vo ket enaouet a dan en hini eus ho tiez da zeiz ar sabad.

Profoù evit an tabernakl

⁴ Moizez a gomzas da holl vodadenn mibien Israel hag a lavaras: Setu amañ ar pezh en deus gourc'hemennet an AOTROU . Lavaret en deus:

⁵ Kemerit eus ho traoù ur prof evit an AOTROU . Pep den a galon vat a zegaso profoù d'an AOTROU , aour, arc'hant, arem,

⁶ limestra, tane, ruz-moug, lin fin, blev givri,

⁷ krec'hin tourzed livet e ruz ha krec'hin a liv hiasint, koad kasia,

⁸ eoul evit ar c'hantolor, louzoù-frondus evit eoul an oleviadur hag evit an ezañs a c'hwezh-vat,

⁹ mein oniks ha mein evit sterniañ an efod hag ar gwisk-bruched.

¹⁰ An holl dud skiantek en ho touez a zeuio hag a raio kement en deus gourc'hemennet an AOTROU ,

¹¹ an tabernakl, e deltenn hag e c'holo, e glochedoù, e blenk, e varrennoù, e golonennoù, e sichennoù,

¹² an arc'h hag e varrennoù, al lec'h-a-drugarez, ar ouel evit goleiñ,

¹³ an daol hag he barrennoù, hec'h holl draoù, ar baraoù a ginnig,

¹⁴ ar c’hantolor hag e draoù, e lampoù, an eoul evit ar c'hantolor,

¹⁵ aoter an ezañs hag he barrennoù, eoul an oleviadur, an ezañs a c'hwezh-vat, rideoz an nor evit digor an tabernakl,

¹⁶ aoter al loskaberzhoù, he c'hael arem, he barrennoù hag hec'h holl draoù, al laouer gant he foñs,

¹⁷ lienoù al leurenn, he c'holonennoù, he sichennoù ha rideoz dor al leurenn,

¹⁸ peulioù an tabernakl, peulioù al leurenn hag o c'herdin,

¹⁹ gwiskamantoù ar servij evit ober ar servij er santual, ar gwiskamantoù santel evit Aaron an aberzhour, gwiskamantoù e vibien evit ar servij evel aberzhourien.

²⁰ Holl vodadenn mibien Israel a zeuas er-maez a-zirak Moizez.

²¹ Ar re holl a gase o c'halon anezho a zeuas, ar re holl a lakae o spered anezho d'henn ober a zegasas ur prof d'an AOTROU evit oberenn teltenn an engalv, evit hec'h holl servijoù hag evit ar gwiskamantoù santel.

²² Ar wazed a zeuas gant ar gwragez. Ar re holl a oa a galon vat a zegasas kelc'hioù-brec'h, lagadennoù, gwalinier, kelc'hennoù, pep seurt traoù kaer en aour; pep hini a ginnigas ur prof aour bennak d'an AOTROU .

²³ Ar re holl o doa en o ziez limestra, tane, ruz-moug, lin fin, blev givri, krec'hin tourzed livet e ruz ha krec'hin a liv hiasint o degasas.

²⁴ Ar re holl o doa peadra evit reiñ ur prof arc'hant pe arem o degasas evit o c'hinnig d'an AOTROU . Ar re holl o doa en o ziez koad kasia evit labour ar servij en degasas.

²⁵ An holl wragez skiantek a nezas gant o daouarn hag a zegasas ar pezh o doa nezet, al limestra, an tane, ar ruz-moug hag al lin fin.

²⁶ An holl wragez a oa douget o c'halon di hag a oa skiantek a nezas blev givri.

²⁷ Re gentañ ar bobl a zegasas mein oniks ha mein evit sterniañ an efod hag ar gwisk-bruched,

²⁸ louzoù-frondus hag eoul evit ar c'hantolor, evit eoul an oleviadur hag evit an ezañs a c'hwezh-vat.

²⁹ Mibien Israel a zegasas d'an AOTROU profoù a volontez vat, ar wazed hag ar gwragez a lakae o c'halon anezho da lodenniñ el labour holl en doa gourc'hemennet an AOTROU dre c'henoù Moizez.

Artizaned leuniet gant ar Spered

³⁰ Moizez a lavaras da vibien Israel: Sellit, an AOTROU en deus galvet dre e anv Bezaleel mab Uri mab Hur eus meuriad Juda.

³¹ Leuniet en deus anezhañ gant Spered Doue, e skiant, en ijin hag e gouiziegezh, evit pep seurt labourioù,

³² evit ijinañ traoù, evit labourat war an aour, war an arc’hant ha war an arem,

³³ evit benañ hag ensterniañ mein talvoudus, evit kizellañ ar c’hoad, evit ober pep seurt labourioù.

³⁴ Roet en deus dezhañ ivez ar c'houestoni da zeskiñ, dezhañ ha da Oholiab mab Ahizamak eus meuriad Dan.

³⁵ Lakaet en deus ijin enno evit ma raint pep seurt labourioù a vicherour, a vroder hag a wiader e livioù disheñvel, e limestra, e tane, e ruz-mouk, e lin fin, e gwiaderezh; ober a reont pep seurt labour hag int ampart e traoù nevez.