Ermaeziadeg 34 - Bibl Koad 21: Ar Bibl e Brezhoneg evit ar Vretoned

Pennad 34 An div daolenn nevez. An emglev adnevezet

¹ An AOTROU a lavaras da Voizez: Gra div daolenn vaen evel ar re gentañ, hag e skrivin war an daolenn-se ar c'homzoù a oa war an taolennoù kentañ ac'h eus torret.

² Bez prest a-benn beure; pign adalek ar beure war Venez Sinai, en em zalc'h dirazon war-lein ar menez.

³ Ra ne bigno den ganit, ha zoken ra n'en em ziskouezo den war ar menez holl. Ra ne beuro na deñved na ejened zoken tost d'ar menez.

⁴ Moizez a reas div daolenn vaen evel ar re gentañ, a savas beure-mat hag a bignas war Venez Sinai, evel m'en doa gourc'hemennet an AOTROU dezhañ. Hag e kemeras en e zorn an div daolenn vaen.

⁵ An AOTROU a ziskennas er goabrenn, en em zalc'has gantañ hag a grias anv an AOTROU .

⁶ An AOTROU a dremenas dirazañ hag a grias: An AOTROU , an AOTROU! An Doue trugarezus ha truezus, gorrek da gounnariñ, fonnus e madelezh hag e fealded,

⁷ a vir e drugarez betek ar milvet rumm, a bardon an direizhder, an disentidigezh hag ar pec'hed, met na zalc'h ket an hini kablus evit didamall, hag a gastiz fazioù an tadoù war o mibien ha war vibien o mibien betek an trede hag ar pevare rumm.

⁸ Moizez a stouas hag a azeulas.

⁹ Lavarout a reas: AOTROU , da bediñ a ran, mar em eus kavet trugarez dirak da zaoulagad, ra gerzho an AOTROU en hon touez, rak ur bobl eo a c'houzoug reut, pardon hon direizhder hag hor pec'hed, hon dalc'h evel da hêrezh.

¹⁰ Eñ a respontas: Setu e ran un emglev. Ober a rin dirak da holl bobl burzhudoù n'int ket bet graet war an douar holl ha nag e-touez pobl ebet. An holl bobl a welo oberenn an AOTROU , rak ar pezh ez an d'ober ganit a vo un dra spontus.

¹¹ Laka evezh d'ar pezh a c'hourc'hemennan dit hiziv. Setu, ez an da gas kuit dirazout an Amoreaned, ar Gananeiz, an Hitited, ar Ferezianed, an Hevianed hag ar Jebuziz.

¹² En em vir d'ober emglev gant tud ar vro emaout o vont enni, gant aon na vint ur stign evidout.

¹³ Er c'hontrol e tiskarot o aoterioù, e torrot o delwennoù hag e troc'hot o Asheraoù.

¹⁴ Ne stoui ket dirak un doue all rak an AOTROU en em c'halv un Doue gwarizius; un Doue gwarizius eo.

¹⁵ Ne ri ket a emglev gant tud ar vro, gant aon pa en em roint d'ar gasterezh gant o doueoù ha pa aberzhint d'o doueoù, na bedo unan bennak anezho ha na zebri eus o aberzhoù.

¹⁶ Ne gemeri eus e verc'hed evit da vibien, gant aon e verc'hed, oc'h en em reiñ d'ar gasterezh gant o doueoù, na lakaint da vibien d'en em reiñ d'ar gasterezh gant o doueoù.

¹⁷ Ne ri ket dit doueoù teuzet.

¹⁸ Mirout a ri gouel ar bara hep goell; debriñ a ri bara hep goell e-pad seizh devezh evel ma em eus gourc'hemennet dit en amzer miz Abib, rak ennañ ez out aet kuit eus an Ejipt.

¹⁹ Kement a zigor ar mammog a zo din, ha da holl loened par kentañ-ganet, loened bras pe loened bihan.

²⁰ Dasprenañ a ri gant un oan pep kentañ-ganet eus an azen, ha ma ne zasprenez ket anezhañ, e torri dezhañ ar gouzoug. Dasprenañ a ri ivez pep kentañ-ganet eus an dud e-touez da vibien, ha ne zeuior ket en goullo dirak va dremm.

²¹ Labourat a ri c'hwec'h devezh, met d'ar seizhvet deiz e tiskuizhi, zoken en amzer an douar-labour hag an eost.

²² Lidañ a ri gouel ar sizhunioù en amzer ar frouezh kentañ eus eost ar gwinizh, ha gouel an eost e dibenn ar bloaz.

²³ Teir gwech ar bloaz en em ziskouezo an holl wazed ac'hanoc'h dirak an Aotrou, an AOTROU Doue Israel.

²⁴ Rak kas a rin kuit ar pobloù dirazout hag ec'h astennin da harzoù. Den ne c’hoantaio da vro pa bigni evit en em ziskouez teir gwech ar bloaz dirak an AOTROU da Zoue.

²⁵ Ne ginnigi ket gwad va aberzh gant bara goet. Aberzh gouel ar Pask ne dremeno ket an noz betek ar beure.

²⁶ Degas a ri frouezh kentañ an douar e ti an AOTROU da Zoue. Ne boazhi ket ar menn-gavr e laezh e vamm.

²⁷ An AOTROU a lavaras da Voizez: Skriv ar c'homzoù-mañ, rak hervez dalc'had ar c'homzoù-mañ em eus graet un emglev ganit ha gant Israel.

²⁸ Eñ a voe eno gant an AOTROU daou-ugent devezh ha daou-ugent nozvezh, ha ne zebras ket bara ha ne evas ket dour. Hag e skrivas war an taolennoù komzoù an emglev, an dek komz.

Dremm skedus Moizez

²⁹ Moizez a ziskennas a-ziwar Menez Sinai; an div daolenn eus an Testeni a oa e dorn Moizez pa ziskennas a-ziwar ar menez, ha ne ouie ket penaos kroc'hen e zremm a oa deuet da vezañ skedus e-pad ma komze gant Doue.

³⁰ Aaron hag holl vibien Israel a welas Moizez ha setu, kroc'hen e zremm a lugerne, hag o doa aon o tostaat outañ.

³¹ Moizez o galvas, Aaron hag holl re gentañ ar vodadenn a zeuas d'e gavout ha Moizez a gomzas outo.

³² Goude-se, holl vibien Israel a dostaas hag e c'hourc'hemennas dezho kement en doa lavaret an AOTROU war Venez Sinai.

³³ Moizez a echuas da gomz outo; hag e lakaas ur ouel war e zremm.

³⁴ Pa'z ae Moizez dirak an AOTROU evit komz outañ, e lame ar ouel betek ma'z ae kuit, neuze ez ae er-maez hag e lavare da vibien Israel ar pezh a veze bet gourc'hemennet dezhañ.

³⁵ Mibien Israel a wele penaos dremm Moizez, kroc'hen dremm Moizez, a lugerne. Ha Moizez a adlakae ar ouel war e zremm betek ma'z ae evit komz gant an AOTROU .