Ermaeziadeg 31 - Bibl Koad 21: Ar Bibl e Brezhoneg evit ar Vretoned

Pennad 31 Artizaned leuniet gant ar Spered

¹ An AOTROU a gomzas da Voizez o lavarout:

² Sell, galvet em eus dre e anv Bezaleel mab Uri mab Hur eus meuriad Juda.

³ Leuniet em eus anezhañ gant Spered Doue, e skiant, en ijin hag e gouiziegezh, evit pep seurt labourioù,

⁴ evit ijinañ traoù, evit labourat war an aour, war an arc’hant ha war an arem,

⁵ evit benañ hag ensterniañ mein talvoudus, evit kizellañ ar c’hoad, evit ober pep seurt labourioù.

⁶ Setu, roet em eus dezhañ ur skoazeller, Oholiab mab Ahizamak eus meuriad Dan. Lakaet em eus ijin e kalon pep den skiantek, evit ma raint kement am eus gourc’hemennet dit ober:

⁷ teltenn an engalv, arc’h an Testeni, al lec’h-a-drugarez a vo warni hag holl draoù an deltenn,

⁸ an daol hag he zraoù, ar c’hantolor aour glan hag e holl draoù,

⁹ aoter an ezañs, aoter al loskaberzhoù hag he holl draoù, al laouer gant he foñs,

¹⁰ ar gwiskamantoù evit ar servij, ar gwiskamantoù santel evit Aaron an aberzhour, gwiskamantoù e vibien evit ar servij evel aberzhourien,

¹¹ eoul an oleviadur hag an ezañs a c'hwezh-vat evit al lec’h santel. Ober a raint hervez kement am eus gourc’hemennet dit.

Ar sabad degaset da soñj

¹² An AOTROU a gomzas da Voizez o lavarout:

¹³ Komz da vibien Israel ha lavar: Mirout a reot va deizioù sabad. Rak un arouez a vo etrezon-me ha c'hwi a rummadoù da rummadoù, ma vo gouezet ez eo me, an AOTROU a santela ac'hanoc'h.

¹⁴ Mirit eta ar sabad, rak un deiz santel e vo evidoc'h. Ar re a dorro anezhañ a vo lakaet d'ar marv. Mar gra neb ul labour en deiz-se, e vo dilamet a-douez e bobl.

¹⁵ Al labour a vo graet e-pad c'hwec'h devezh, met er seizhvet devezh e vo ar sabad-diskuizh santelaet evit an AOTROU . Piv bennak a raio ul labour e deiz ar sabad a vo lakaet d'ar marv.

¹⁶ Mibien Israel a viro ar sabad evit lidañ ar sabad a rummadoù da rummadoù, evel un emglev peurbadus.

¹⁷ Un arouez e vo etrezon-me ha mibien Israel da viken, rak an AOTROU en deus graet e c'hwec'h devezh an neñvoù hag an douar, met er seizhvet devezh en deus paouezet hag en deus diskuizhet.

Div daolenn an Testeni

¹⁸ Pa en deus echuet Doue da gomz gant Moizez war Venez Sinai, e roas dezhañ div daolenn an Testeni, taolennoù maen skrivet gant biz Doue.