Ermaeziadeg 21 - Bibl Koad 21: Ar Bibl e Brezhoneg evit ar Vretoned

Pennad 21 Lezennoù diwar-benn ar sklaved

¹ Setu al lezennoù a ginnigi dezho.

² Mar prenez ur sklav hebreat, e servijo ac'hanout c'hwec'h vloaz, met d'ar seizhvet ez aio kuit frank hep reiñ netra.

³ Mard eo deuet e-unan-penn, ez aio kuit e-unan-penn. Mar en doa ur wreg, e wreg a yelo kuit gantañ.

⁴ Mar en deus roet e vestr dezhañ ur wreg ha mar he deus ganet dezhañ mibien ha merc'hed, ar wreg hag ar vugale a vo d'ar mestr, hag eñ a yelo kuit e-unan-penn.

⁵ Mar lavar ar sklav: Karout a ran va mestr, va gwreg ha va bugale, ne fell ket din mont kuit frank,

⁶ neuze e tegaso e vestr anezhañ dirak Doue, en lakaio da dostaat ouzh an nor pe ouzh ar post, hag e vestr a doullo e skouarn dezhañ gant ur minaoued. Servijañ a raio anezhañ da viken.

⁷ Mar gwerzh unan bennak e verc'h evit bezañ sklavez, ned aio ket kuit evel ma'z a ar sklaved.

⁸ Mar displij d'ar mestr en doa he c'hemeret evitañ, e raio he dasprenañ. N'en devo ket ar galloud d'he gwerzhañ da ziavaezidi goude bezañ bet disleal ganti.

⁹ Mar tonk anezhi d'e vab, e raio eviti hervez droed ar merc'hed.

¹⁰ Mar kemer unan all, ne lamo netra digant an hini gentañ eus ar boued, eus an dilhad, nag eus an droed-pried.

¹¹ Ha ma ne ra ket eviti an tri zra-se, e yelo houmañ kuit evit netra, hep arc'hant.

Muntroù ha goulioù

¹² An hini a skoio un den d'ar marv a vo kastizet a varv.

¹³ Ma n'en deus ket stignet pechoù dezhañ, met en deus e lakaet Doue dindan e zorn, me a lakaio dit ul lec'h evitañ da gavout repu eno.

¹⁴ Met mard eo unan bennak en em savet a-enep e nesañ evit e lazhañ dre douellerezh, e tapi anezhañ, diouzh va aoter zoken, evit ma vo lakaet d'ar marv.

¹⁵ An hini a skoio e dad pe e vamm a vo lakaet d'ar marv.

¹⁶ An hini a laero un den hag en gwerzho, hag an hini a vo kavet hemañ etre e zaouarn, a vo lakaet d'ar marv.

¹⁷ An hini a villigo e dad pe e vamm a vo lakaet d'ar marv.

¹⁸ Mar tabut tud hag e sko unan war egile gant ur maen pe gant ar meilh-dorn, e doare na varv ket met ma vefe ret dezhañ en em lakaat en e wele,

¹⁹ mar sav hag e kerzh er-maez, harpet gant e vazh, an hini en devo skoet gantañ a vo didamall. Koulskoude e paeo e ehan-labour hag e raio e yac'haat holl.

²⁰ Mar sko un den e vevel pe e vatezh gant ur vazh ha ma varv dindan e zorn, ne dremeno ket hep bezañ kastizet.

²¹ Met mar bev un deiz pe daou goude, ne vo ket kastizet, rak e arc'hant eo.

²² Mar tabut tud hag e stokont ouzh ur wreg dougerez e doare ma wilioud, hep m'en em gavfe gwalleur all, barnet e vint da baeañ an digoll divizet gant pried ar wreg, hag e roio kement-se dirak ar varnerien.

²³ Met mar c'hoarvez gwalleur, e roi buhez evit buhez,

²⁴ lagad evit lagad, dant evit dant, dorn evit dorn, troad evit troad,

²⁵ poazhadur evit poazhadur, gouli evit gouli, bloñsadenn evit bloñsadenn.

²⁶ Mar sko un den war lagad e vevel pe war lagad e vatezh ha mar koll anezhañ, o lezo da vont kuit frank evit o lagad.

²⁷ Mar laka da gouezhañ un dant d'e vevel pe d'e vatezh, o lezo da vont kuit frank evit o dant.

²⁸ Mar sko un ejen gant e gerniel ur gwaz pe ur wreg hag e varv a-se, an ejen a vo meinataet, ne vo ket debret e gig ha perc'henn an ejen a vo didamall.

²⁹ Met mar en doa diagent an ejen ar c'hiz da vrochañ gant e gerniel, hag e oa bet kemennet ar perc'henn ha n'en doa ket diwallet outañ, mar lazh ur gwaz pe ur wreg, an ejen a vo meinataet hag e berc'henn a vo ivez lakaet d'ar marv.

³⁰ Ma'z eo lakaet ur priz dezhañ evit en em brenañ, e roio evit dasprenañ e vuhez kement a vo goulennet dioutañ.

³¹ Mar broch an ejen gant e gerniel ur paotr pe ur plac'h, e vo barnet hervez an hevelep lezenn-se.

³² Mar broch an ejen gant e gerniel ur sklav pe ur sklavez, roet e vo tregont sikl arc'hant d'o mestr hag an ejen a vo meinataet.

³³ Mar digor un den ur puñs pe mar kleuz un den ur puñs ha na c'holo ket anezhañ, hag e kouezh ennañ un ejen pe un azen,

³⁴ perc'henn ar puñs a baeo se; reiñ a raio arc'hant d'o ferc'henn, met al loen marv a vo dezhañ.

³⁵ Mar broch ejen un den ejen un den all ha mar marv a-se, e werzhint an ejen bev hag e taouhanterint an arc'hant etrezo, hag e taouhanterint ivez an hini marv.

³⁶ Mard eo anavezet penaos diagent an ejen en doa ar c'hiz da vrochañ gant e gerniel ha n'en doa ket diwallet e vestr outañ, e taskoro ejen evit ejen met an hini marv a vo dezhañ.