Ermaeziadeg 18 - Bibl Koad 21: Ar Bibl e Brezhoneg evit ar Vretoned

Pennad 18 Jetro a zeu da gavout Moizez

¹ Jetro, aberzhour Madian ha tad-kaer Moizez, a anavezas kement en doa graet Doue da Voizez ha da Israel e bobl, ha penaos en doa tennet an AOTROU Israel eus an Ejipt.

² Jetro tad-kaer Moizez a gemeras Sefora, gwreg Moizez a oa bet kaset en-dro,

³ hag e daou vab, a oa anv unan Gershom rak en doa lavaret: Emaon o chom en ur vro estren,

⁴ hag egile Eliezer rak Doue va zad en deus va sikouret ha va dieubet a gleze Faraon.

⁵ Jetro tad-kaer Moizez a zeuas da gavout Moizez gant e vugale hag e wreg er gouelec'h ma kampe e-barzh, tost da venez Doue.

⁶ Lavarout a reas da Voizez: Me Jetro da dad-kaer, a zeu da'z kavout gant da wreg ha da zaou vab ganti.

⁷ Moizez a yeas a-raok d'e dad-kaer, a stouas hag a bokas dezhañ. Hag e c'houlennjont en eil digant madober egile, hag ez ejont en deltenn.

⁸ Moizez a gontas d'e dad-kaer kement en doa graet an AOTROU da Faraon ha d'an Ejipsianed e-keñver Israel, an holl boanioù a oa deuet warno en hent ha penaos en doa o dieubet an AOTROU .

⁹ Jetro a laouenaas eus an holl vad en doa graet an AOTROU da Israel, eus m'en doa e zieubet eus daouarn an Ejipsianed.

¹⁰ Jetro a lavaras: Benniget ra vo an AOTROU en deus dieubet ac'hanoc'h eus dorn an Ejipsianed hag eus dorn Faraon, en deus dieubet ar bobl eus galloud an Ejipsianed.

¹¹ Bremañ ec'h anavezan ez eo an AOTROU brasoc'h eget an holl zoueoù, rak pa'z int bet en em savet gant balc'hder, en deus trec'het warno.

¹² Jetro tad-kaer Moizez a gemeras ul loskaberzh hag aberzhoù evit o c'hinnig da Zoue. Aaron hag holl henaourien Israel a zeuas da zebriñ ar bara gant tad-kaer Moizez, dirak Doue.

¹³ An deiz war-lerc'h e c'hoarvezas ma azezas Moizez evit barn ar bobl, hag ar bobl en em zalc'has dirak Moizez adalek ar beure betek an noz.

¹⁴ Tad-kaer Moizez, o welout kement a rae evit ar bobl, a lavaras: Petra a rez e-keñver ar bobl-se? Perak ec'h azezez da-unan, ha ma en em zalc'h an holl bobl dirazout adalek ar beure betek an noz?

¹⁵ Moizez a respontas d'e dad-kaer: Ar bobl eo a zeu da'm c'havout evit goulenn kuzul digant Doue.

¹⁶ P'o deus un dra bennak, e teuont da'm c'havout. Me a varn etre an eil hag egile, hag e roan da anavezout reolennoù Doue hag e lezennoù.

¹⁷ Tad-kaer Moizez a lavaras: Ar pezh a rez n'eo ket mat.

¹⁸ A-dra-sur kouezhañ a ri hag ar bobl-mañ ganit, rak kement-se a zo re bounner evidout, ne c'helli ket henn ober te da-unan.

¹⁹ Bremañ selaou ouzh va mouezh: Me a alio ac'hanout, ha ra vo Doue ganit! Bez evit ar bobl dirak Doue ha kinnig an traoù da Zoue.

²⁰ Kelenn anezho er reolennoù hag el lezennoù, ha ro da anavezout dezho an hent a zleont kerzhout warnañ hag ar pezh a zleont ober.

²¹ Dibab a-douez ar bobl holl tud barrek o toujañ Doue, tud leal o kasaat ar gounid dizonest, ha laka anezho warno evel renerien a vilieroù, renerien a gantoù, renerien a hanter-kantoù ha renerien a zegoù.

²² Ra varnint ar bobl e pep amzer. Mar bez traoù bras, ra o disklêrint dit, met ra varnint o-unan an holl draoù bihan. Skañva da vec'h ha ra en dougint ganit.

²³ Ma rez kement-se ha ma ren Doue warnout, e c'helli derc'hel hag ar bobl-mañ en em gavo e peoc'h en e lec'h.

²⁴ Moizez a sentas ouzh e dad-kaer hag a reas kement en doa lavaret.

²⁵ Moizez a zibabas a-douez holl Israel tud barrek hag o lakaas renerien war ar bobl, renerien a vilieroù, renerien a gantoù, renerien a hanter-kantoù ha renerien a zegoù.

²⁶ Barn a raent ar bobl e pep amzer, o tisklêriañ da Voizez an traoù diaes hag o varn o-unan an holl draoù bihan.

²⁷ Neuze Moizez a lezas e dad-kaer da vont kuit. Mont a reas d'e vro.