Ermaeziadeg 16 - Bibl Koad 21: Ar Bibl e Brezhoneg evit ar Vretoned

Pennad 16 Ar c'hoailhed hag ar mann

¹ Holl vodadenn mibien Israel, o vezañ aet kuit eus Elim, a zeuas da c'houelec'h Sin, a zo etre Elim ha Sinai, d'ar pemzekvet deiz eus an eil miz goude ma oant aet kuit eus bro Ejipt.

² Holl vodadenn mibien Israel a c'hrozmolas er gouelec'h-se a-enep Moizez hag a-enep Aaron.

³ Mibien Israel a lavaras: Perak n'omp ket bet marvet dre zorn an AOTROU e bro Ejipt, pa oamp azezet e-kichen podadoù kig, pa zebremp bara hor gwalc'h? Rak hon degaset hoc'h eus er gouelec'h-mañ evit lakaat da vervel an holl vodadenn-mañ gant an naon.

⁴ Neuze an AOTROU a lavaras da Voizez: Setu, ez an da lakaat bara da gouezhañ eus an neñv; ar bobl a zeuio er-maez hag e tastumint bemdez ar pezh a zo ret evit un devezh, hag ec'h amprouin hag-eñ e kerzhint em lezenn pe nann.

⁵ Met d'ar c'hwec'hvet deiz, e fichint ar pezh o devo degaset hag e vo an daougementad eus ar pezh a zastumint bep devezh.

⁶ Moizez hag Aaron eta a lavaras da holl vibien Israel: Fenoz e ouiot ez eo an AOTROU en deus tennet ac'hanoc'h eus bro Ejipt,

⁷ ha da veure e welot gloar an AOTROU , peogwir en deus klevet ho krozmoloù a-enep an AOTROU . Petra omp-ni, ma c'hrozmolit a-enep deomp?

⁸ Moizez a lavaras: Pa roio an AOTROU deoc'h fenoz kig da zebriñ ha da veure bara ho kwalc'h, eo en deus klevet an AOTROU ar grozmoloù hoc'h eus graet a-enep dezhañ. Rak petra omp-ni? Ho krozmoloù n'emaint ket a-enep deomp, met a-enep an AOTROU .

⁹ Moizez a lavaras da Aaron: Lavar da holl vodadenn mibien Israel: Tostait dirak an AOTROU , rak klevet en deus ho krozmoloù.

¹⁰ Evel ma komze Aaron da holl vodadenn mibien Israel, e tistrojont etrezek ar gouelec'h, ha setu, gloar an AOTROU en em ziskouezas er goabrenn.

¹¹ An AOTROU a gomzas da Voizez o lavarout:

¹² Klevet em eus grozmoloù mibien Israel. Komz outo ha lavar: Etre an daou abardaez e tebrot kig ha da veure e viot gwalc'het a vara, hag e ouiot penaos on an AOTROU ho Toue.

¹³ D'abardaez koailhed a savas hag a c'holoas ar c'hamp, ha da veure e voe ur gwisk glizhenn en-dro d'ar c'hamp.

¹⁴ Ar gwisk glizhenn a vihanaas ha setu, e oa war-c'horre ar gouelec'h un dra vihan, perlezet, bihan evel ar rev gwenn war an douar.

¹⁵ Mibien Israel a welas, hag e lavarjont an eil d'egile: Petra eo? Rak ne ouient ket petra e oa. Ha Moizez a lavaras: Ar bara eo a ro an AOTROU deoc'h da zebriñ.

¹⁶ Setu amañ ar pezh en deus gourc'hemennet an AOTROU: Dastumit dioutañ pep hini ar c'hementad ha ma c'hello debriñ, un omer dre benn, hervez an niver eus ho tud. Pep hini ac'hanoc'h a gemero evit ar re a zo en e deltenn.

¹⁷ Mibien Israel a reas eta evel-se hag e tastumjont dioutañ unan muioc'h hag unan all nebeutoc'h.

¹⁸ Muzuliet e veze gant an omer. An hini en doa dastumet kalz n'en doa ket re, hag an hini en doa dastumet nebeut ne vanke ket dezhañ. Dastum a raent pep hini hervez ar pezh a zebre.

¹⁹ Moizez a lavaras: Ra ne lezo den tamm dioutañ betek ar beure.

²⁰ Ha ne sentjont ket ouzh Moizez, hiniennoù a lezas betek ar beure, hag e teuas preñved enno ha c'hwezh-fall ganto. Moizez a yeas droug ennañ a-enep dezho.

²¹ Dastum a rejont eta bep beure pep hini hervez ma tebre, ha pa oa tomm an heol, e teuze.

²² D'ar c'hwec'hvet deiz, e tastumjont bara en daougementad, daou omer evit pep hini. Holl renerien ar vodadenn a zeuas d'e lavarout da Voizez.

²³ Hag eñ a respontas: Kement-se eo en deus lavaret an AOTROU: Warc’hoazh emañ diskuizh ar sabad santelaet evit an AOTROU . Lakait da boazhañ ar pezh hoc'h eus da lakaat da boazhañ, lakait da virviñ ar pezh hoc'h eus da lakaat da virviñ, ha dastumit an nemorant evit e virout betek ar beure.

²⁴ E lezel a rejont betek ar beure evel m'en doa gourc'hemennet Moizez, ha ne voe ket a c'hwezh-fall gantañ ha ne voe ket preñved ennañ.

²⁵ Moizez a lavaras: Debrit anezhañ hiziv, rak hiziv eo sabad an AOTROU , ha ne gavot ket dioutañ er parkeier.

²⁶ E-pad c'hwec'h devezh e tastumot anezhañ, met er seizhvet devezh, ar sabad, ne vo ket dioutañ.

²⁷ Er seizhvet devezh, hiniennoù eus ar bobl a yeas evit dastum anezhañ met ne gavjont ket dioutañ.

²⁸ Neuze an AOTROU a lavaras da Voizez: Betek pegeit na fello ket deoc'h mirout va gourc'hemennoù ha va lezennoù?

²⁹ Gwelit penaos an AOTROU en deus roet deoc'h ar sabad, setu perak e ro deoc'h er c'hwec'hvet devezh bara evit daou zevezh. Ra chomo pep hini ac'hanoc'h eta en e lec'h ha ra ned aio den er-maez eus e lec'h ar seizhvet devezh.

³⁰ Ar bobl eta a ziskuizhas er seizhvet devezh.

³¹ Ti Israel a c'halvas kement-se mann. Bez' e oa evel had koriandrez, gwenn, hag e doa ur blaz a vignez gant mel.

³² Moizez a lavaras: Setu ar pezh en deus gourc'hemennet an AOTROU: Ra vo leuniet un omer dioutañ, da virout a rummadoù da rummadoù, ma welint ar bara am eus graet deoc'h debriñ er gouelec'h, pa em eus ho tennet eus bro Ejipt.

³³ Moizez a lavaras da Aaron: Kemer ur pod, laka ennañ un omer leun a vann, ha laka anezhañ dirak an AOTROU da vezañ miret a rummadoù da rummadoù.

³⁴ Evel m'en doa gourc'hemennet an AOTROU da Voizez, Aaron en lakaas dirak an Testeni evit ma vije miret.

³⁵ Mibien Israel a zebras ar mann e-pad daou-ugent vloaz, betek ma voent deuet da ur vro a c'helled chom enni. Debriñ a rejont ar mann betek ma voent deuet da harzoù bro Ganaan.

³⁶ An omer a zo an dekvedenn eus an efa.