Efeziz 6 - Bibl Koad 21: Ar Bibl e Brezhoneg evit ar Vretoned

Pennad 6 Bugale ha kerent

¹ Bugale, sentit ouzh ho tud, en Aotrou, rak un dra reizh eo.

² Enor da dad ha da vamm, ar c’hentañ gourc’hemenn eo hag ez eus ur bromesa gantañ:

³ Evit ma vi eürus ha ma vevi pell war an douar.

⁴ Ha c’hwi tadoù, na hegit ket ho pugale met savit anezho e kenurzh hag e kelennadur an Aotrou.

Mevelien ha mistri

⁵ Mevelien, sentit gant doujañs ha krenadenn ouzh ho mistri hervez ar c’hig, en eeunder a galon, evel ouzh Krist,

⁶ o servijañ anezho nann zoken dindan o daoulagad, evel ma klaskfec’h plijout d’an dud, met oc’h ober a galon vat bolontez Doue, evel servijerien Krist,

⁷ o servijañ gant karantez an Aotrou ha nann an dud,

⁸ o c’houzout penaos pep hini, pe sklav, pe frank, a resevo digant an Aotrou hervez ar mad en devo graet.

⁹ Ha c’hwi mistri, grit en hevelep doare en o c’heñver ha dilezit ar gourdrouzoù, o c’houzout hoc’h eus ivez evelto ur Mestr en neñv, ha dirazañ n’eus van ebet eus diavaezioù an dud.

Harnez Doue

¹⁰ A-hend-all, va breudeur, en em greñvait en Aotrou ha dre e nerzh holl c’halloudek.

¹¹ Gwiskit harnez Doue en e bezh, evit ma c’hellot derc’hel start a-enep troidelloù an diaoul.

¹² Rak n’eo ket a-enep ar c’hig nag ar gwad hon eus da stourm, met a-enep ar priñselezhioù, a-enep ar nerzhioù, a-enep mestroù an deñvalijenn eus ar bed-mañ, a-enep speredoù ar fallentez el lec’hioù uhel.

¹³ Dre-se kemerit ganeoc’h harnez Doue en e bezh, evit ma c’hellot chom start en deizioù fall hag, o vezañ kendrec’het pep tra, e talc’hot start.

¹⁴ Dalc’hit start eta, ho tivgroazell gourizet gant ar wirionez, gwiskit sae-houarn ar reizhder,

¹⁵ en ho treid kemerit gred an Aviel a beoc’h,

¹⁶ krogit dreist-holl skoed ar feiz da c’hellout mougañ holl daolioù loskus an hini drouk,

¹⁷ kemerit ivez tog-houarn ar silvidigezh ha kleze ar Spered, da lavarout eo ger Doue,

¹⁸ o pediñ e pep amzer dre bep seurt pedennoù hag aspedennoù dre ar Spered, o veilhañ war gement-se gant dalc’husted hag o pediñ evit an holl sent,

¹⁹ hag evidon-me ivez, evit ma vo roet din da gomz gant frankiz hag hardizhegezh, evit reiñ da anavezout mister an Aviel

²⁰ ma’z on ar c’hannad anezhañ er chadennoù, hag evit ma komzin anezhañ gant hardizhegezh evel ma tlean henn ober.

Saludoù da glozañ

²¹ Evit ma ouiot ivez ar pezh a sell ouzhin hag ar pezh a ran, Tichik, ar breur karet-mat ha ministr feal en Aotrou, a roio da anavezout deoc’h pep tra.

²² Kaset em eus anezhañ deoc’h evit-se, evit ma ouiot petra a c’hoarvez war-dro deomp ha ma tic’hlac’haro ho kalonoù.

²³ Ra vo ar peoc’h roet d’ar vreudeur, hag ar garantez ivez gant ar feiz, a-berzh Doue an Tad hag an Aotrou Jezuz-Krist!

²⁴ Ra vo ar c’hras gant ar re holl a gar hon Aotrou Jezuz-Krist gant ur garantez digemmus! Amen.