Efeziz 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Bezit eta heñvelerien ouzh Doue, evel bugale karet-mat,

² kerzhit er garantez, evel m’en deus Krist ivez hor c’haret hag eo en em ginniget e-unan da Zoue evidomp e prof hag en aberzh a c’hwezh vat.

³ Ra ne vo ket klevet anv en ho touez, nag eus gadaliezh, nag eus hudurniezh ebet, nag eus droukc’hoant, evel ma tere d’ar sent,

⁴ na komz dizonest, na reoù foll, na farserezh, a zo traoù divalav, met ra vo klevet kentoc’h trugarekadennoù.

⁵ Rak anavezout a rit kement-mañ, penaos den gadal ebet, pe hudur, pe gwallc’hoantek hag a zo un idolour, n’en deus lod en hêrezh rouantelezh Krist ha Doue.

⁶ Ra ne dromplo den ac’hanoc’h dre gomzoù aner, rak abalamour d’an traoù-se e teu fulor Doue war ar vugale disent.

⁷ N’ho pez ket eta a lod ganto.

⁸ Rak gwechall e oac’h teñvalijenn, met bremañ oc’h sklêrijenn en Aotrou. Kerzhit eta evel bugale ar sklêrijenn,

⁹ rak frouezh ar Spered en em zalc’h e pep seurt madelezh, reizhder ha gwirionez.

¹⁰ Eveshait ouzh ar pezh a zo kavet mat gant an Aotrou,

¹¹ n’ho pez lod ebet en oberoù difrouezh an deñvalijenn, met kentoc’h kondaonit anezho.

¹² Rak mezhus eo zoken lavarout ar pezh a reont e kuzh,

¹³ met kement a zo lakaet d’ar sklêrijenn a zo diskuliet sklaer, rak kement a zo bet diskuliet a zo sklêrijenn.

¹⁴ Dre-se eo lavaret: Dihun, te a zo kousket, sav a-douez ar re varv, ha Krist a lugerno warnout.

¹⁵ Lakait evezh eta ouzhoc’h hoc’h-unan d’en em ren gant eeunder, nann evel tud diskiant met evel tud fur,

¹⁶ adprenit an amzer rak an deizioù a zo fall.

¹⁷ Dre-se na vezit ket hep poell, met komprenit petra eo bolontez an Aotrou.

¹⁸ N’en em vezvit ket gant gwin a gundu d’an diroll, met bezit leuniet gant ar Spered,

¹⁹ komzit etrezoc’h dre salmoù, meulganoù, kanaouennoù speredel, o kanañ hag o salmiñ a galon meuleudioù d’an Aotrou.

²⁰ Trugarekait bepred evit an holl draoù Doue an Tad, en anv hon Aotrou Jezuz-Krist.

²¹ Plegit an eil d’egile e doujañs Doue.

Ezhec’h ha gwragez

²² Gwragez, plegit d’hoc’h ezhec’h hoc’h-unan evel d’an Aotrou,

²³ abalamour an ozhac’h eo penn ar wreg, evel ma’z eo Krist ivez penn an Iliz, hag a zo e gorf hag a zo bet salvet drezañ.

²⁴ Hag evel ma pleg an Iliz da Grist, ra blego ivez ar gwragez d’o ezhec’h o-unan en holl draoù.

²⁵ Ezhec’h, karit ho kwragez evel m’en deus ivez Krist karet an Iliz hag eo en em roet e-unan eviti,

²⁶ evit he santelaat hag he glanaat dre ur walc’hadenn en dour gant ar ger,

²⁷ evit he lakaat dirazañ evel an Iliz leun a c’hloar, hep saotr na roufenn na netra eus ar seurt-se, met santel ha divlam.

²⁸ Evel-se e tle an ezhec’h karout o gwragez evel o c’horfoù o-unan. An hini a gar e wreg en em gar e-unan,

²⁹ rak den ebet n’en deus kasaet biskoazh e gorf e-unan, met e vagañ hag e zerc’hel a ra evel ma ra ivez an Aotrou e-keñver an Iliz,

³⁰ dre ma’z omp an izili eus e gorf, eus e c’hig hag eus e eskern.

³¹ Dre-se an den a guitaio e dad hag e vamm hag en em unano gant e wreg, hag an daou ne vint nemet ur c’hig.

³² Ar mister-se a zo bras, henn lavarout a ran diwar-benn Krist hag an Iliz.

³³ Evel-se, ra garo pep hini ac’hanoc’h e wreg eveltañ e-unan ha ra zoujo ar wreg hec’h ozhac’h.