Efeziz 2 - Bibl Koad 21: Ar Bibl e Brezhoneg evit ar Vretoned

Pennad 2 Ar vuhez roet evit netra

¹ C’hwi a oa marv en ho faotoù hag en ho pec’hedoù,

² hoc’h eus kerzhet gwechall enno hervez giz ar bed-mañ, hervez priñs nerzh an aer, ar spered a labour bremañ e mibien an disentidigezh.

³ En o zouez e vevemp holl gwechall, hervez droukc’hoantoù hor c’hig, oc’h oberiañ hervez youloù ar c’hig hag an ene, hag e oamp dre hon natur bugale a fulor evel ar re all.

⁴ Met Doue, hag a zo pinvidik e trugarez, abalamour d’ar garantez vras en deus hor c’haret ganti,

⁵ pa oamp marv en hor pec’hedoù, en deus hon degaset asambles d’ar vuhez e Krist, dre c’hras eo oc’h bet salvet,

⁶ en deus hon adsavet a varv asambles, hag hol lakaet da azezañ asambles el lec’hioù neñvel e Jezuz-Krist,

⁷ evit diskouez er c’hantvedoù da zont ar pinvidigezhioù divent eus e c’hras dre e vadelezh en hor c’heñver e Jezuz-Krist.

⁸ Rak salvet oc’h dre ar c’hras, war-bouez ar feiz. Ha kement-se ne zeu ket ac’hanoc’h, donezon Doue eo.

⁹ N’eo ket dre an oberoù, evit na denno gloar den ebet.

¹⁰ Rak ni a zo e labour, o vezañ bet krouet e Jezuz-Krist evit an oberoù mat en deus Doue kempennet diaraok, evit ma kerzhimp enno.

Unanet e Krist

¹¹ Dre-se ho pet soñj penaos, o vezañ ma oac’h gwechall paganed er c’hig ha galvet diamdroc’h gant ar re a c’halver amdroc’hidi er c’hig dre zorn an den,

¹² c’hwi a oa en amzer-se hep Krist, diavaezidi da gumuniezh Israel, estrañjourien e-keñver emglevioù ar bromesa, hep esperañs hag hep Doue er bed.

¹³ Met bremañ, e Jezuz-Krist, c’hwi a oa gwechall pell, a zo bet degaset tost dre wad Krist.

¹⁴ Rak eñ eo hor peoc’h, eñ hag en deus graet unan hepken eus an daou en ur ziskar ar voger a zisparti,

¹⁵ o vezañ distrujet en e gig ar gasoni, lezenn ar gourc’hemennoù dalc’het en urzhioù, evit krouiñ ennañ e-unan eus an daou un den nevez hepken goude bezañ graet ar peoc’h,

¹⁶ hag evit unvaniñ gant Doue dre ar groaz an eil hag egile en ur c’horf hepken, en ur zistrujañ e-unan ar gasoni.

¹⁷ Deuet eo da brezeg ar peoc’h deoc’h-c’hwi a oa pell ha d’ar re a oa tost,

¹⁸ rak drezañ hon eus an eil hag egile un degemer digant an Tad en un hevelep Spered.

¹⁹ Evel-se eta, n’oc’h ken nag estrañjourien na tud a-ziavaez, met kenvourc’hizien d’ar sent hag eus ti Doue,

²⁰ o vezañ bet savet war diazez an ebestel hag ar brofeded, ez eo Jezuz-Krist e-unan ar maen-korn;

²¹ ennañ an holl vatis, urzhiet mat, a sav evit bezañ un templ santel en Aotrou,

²² ennañ ivez ez oc’h savet asambles evit bezañ ur chomlec’h da Zoue er Spered.