Ar Varnerien 3 - Bibl Koad 21: Ar Bibl e Brezhoneg evit ar Vretoned

Pennad 3 Ar broadoù a lezas an AOTROU e Kanaan. Otniel, Ehud, Shamgar

¹ Setu amañ ar broadoù a lezas an AOTROU evit amprouiñ Israel, ar re holl n'o doa ket anavezet brezelioù Kanaan,

² evit ma'c'h anavezo ha ma tesko rummadoù mibien Israel petra eo ar brezel, da vihanañ ar re n'o doa ket e anavezet diagent:

³ Pemp priñs ar Filistined, an holl Gananeiz, ar Sidoniz, an Hevianed a oa o chom e menez al Liban adalek menez Baal-Hermon betek digor Hamad.

⁴ Ar re-se a oa evit amprouiñ Israel, evit gwelout hag-eñ e sentfent ouzh ar gourc'hemennoù en doa roet an AOTROU dre Voizez d'o zadoù.

⁵ Hag e voe o chom mibien Israel e-touez ar C'hananeiz, an Hitited, an Amoreaned, ar Ferezianed, an Hevianed hag ar Jebuziz.

⁶ Kemer a rejont o merc'hed da wragez, hag e rojont o merc'hed d'o mibien, hag e servijjont o doueoù.

⁷ Mibien Israel a reas an droug dirak daoulagad an AOTROU, hag ec'h ankounac'hajont an AOTROU o Doue, hag e servijjont ar Baaloù.

⁸ Fulor an AOTROU en em danas a-enep Israel, hag e werzhas anezho etre daouarn Kushan-Rishataim roue Mezopotamia. Hag e voe mibien Israel sujet da Gushan-Rishataim e-pad eizh vloaz.

⁹ Mibien Israel a grias etrezek an AOTROU, hag an AOTROU a savas dezho un dieuber a zieubas anezho, Otniel mab Kenaz, breur yaouankañ Kaleb.

¹⁰ Spered an AOTROU a voe warnañ, hag e varnas Israel, hag ez eas d'ar brezel. An AOTROU a lakaas Kushan-Rishataim roue Mezopotamia etre e zaouarn, hag e zorn a voe galloudus a-enep Kushan-Rishataim.

¹¹ Hag ar vro a voe sioul e-pad daou-ugent vloaz. Hag Otniel mab Kenaz a varvas.

¹² Mibien Israel a reas adarre an droug dirak daoulagad an AOTROU, hag an AOTROU a nerzhekaas Eglon roue Moab a-enep Israel, dre m'o doa graet an droug dirak daoulagad an AOTROU.

¹³ Eñ a zastumas en-dro dezhañ mibien Ammon hag Amalek, hag ez eas da stourm ouzh Israel, hag e tapjont kêr ar palmez.

¹⁴ Mibien Israel a voe sujet da Eglon roue Moab e-pad triwec'h vloaz.

¹⁵ Mibien Israel a grias etrezek an AOTROU, hag an AOTROU a savas dezho un dieuber, Ehud mab Gera, ur Benjaminad, na rae ket gant e zorn dehou. Mibien Israel a gasas drezañ ur prof da Eglon roue Moab. 16 Graet en doa ur c'hleze a daou droc'h, un ilinad hed, hag e c'hourizas anezhañ dindan e zilhad war e vorzhed dehou.

¹⁶ Graet en doa ur c'hleze a daou droc'h, un ilinad hed, hag e c'hourizas anezhañ dindan e zilhad war e vorzhed dehou.

¹⁷ Hag e kinnigas ar prof da Eglon roue Moab. Eglon a oa un den gwall lart.

¹⁸ Pa voe echuet gantañ kinnig ar prof, e kasas kuit an dud o doa degaset ar prof.

¹⁹ Hag e tistroas war e giz eus ar skeudennoù kizellet e-kichen Gilgal, hag e lavaras: O roue, un dra bennak kuzhet am eus evidout! Eñ a lavaras: Peoc'h! Hag ar re holl a oa en e gichen a yeas kuit.

²⁰ Ehud a dostaas outañ. Azezet e oa ar roue e-unan en e gambr fresk, hag Ehud a lavaras: Ur gomz am eus a-berzh Doue evidout. Ar roue a savas diwar e gador.

²¹ Ehud, oc'h astenn e zorn kleiz, a dennas ar c'hleze diwar e vorzhed dehou, hag a sankas anezhañ en e gof.

²² Hag an dornell zoken a yeas e-barzh war-lerc'h al laonenn, hag al lard a adserras war al laonenn. Ne dennas ket ar c'hleze eus e gof, hag e teuas kaoc'h er-maez.

²³ Ehud a yeas kuit dre ar porched, a serras dorojoù ar gambr war e lerc'h hag a vorailhas anezho.

²⁴ Pa voe aet kuit, ar servijerien a zeuas hag a sellas, ha setu, dorojoù ar gambr a oa morailhet. Hag e lavarjont: Moarvat emañ o c'holeiñ e dreid er gambr fresk.

²⁵ Gortoz a rejont betek m'o doa mezh, hag evel na zigore ket dorojoù ar gambr, e kemerjont an alc'hwez hag e tigorjont. Ha setu ma oa o mestr marv, astennet d'an douar.

²⁶ Met Ehud a dec'has e-pad ma argredent, hag e tremenas ar skeudennoù kizellet hag e tec'has da Seira.

²⁷ Adalek ma voe erru, e sonas gant ar shofar er menez Efraim. Mibien Israel a ziskennas gantañ eus ar menez, hag eñ en o fenn.

²⁸ Lavarout a reas dezho: Heuilhit-me, rak an AOTROU en deus lakaet etre ho taouarn ar Voabited, hoc'h enebourien! Diskenn a rejont war e lerc'h, hag o tapout roudouzioù ar Jordan a-dal da Voab, ne lezjont den da dremen.

²⁹ Kannañ a rejont d'ar mare-se war-dro dek mil den eus Moab, holl nerzhus, holl galonek, hag hini anezho ne dec'has.

³⁰ En deiz-se e voe izelaet Moab dindan dorn Israel. Hag ar vro a voe sioul e-pad pevar-ugent vloaz.

³¹ War e lerc'h e voe Shamgar mab Anath. Kannañ a reas c'hwec'h kant Filistin gant ur broud ejen, hag eñ ivez a zieubas Israel.