Ar Varnerien 11 - Bibl Koad 21: Ar Bibl e Brezhoneg evit ar Vretoned

Pennad 11 Jefte

¹ Jefte ar Galaadad a oa ur brezelour kadarn. Mab d'ur c'hast e oa, ha Galaad a oa tad da Jefte.

² Gwreg Galaad he doa ganet dezhañ mibien, ha pa voe deuet bras mibien ar wreg-se, e kasjont Jefte kuit o lavarout dezhañ: Ne'z po ket a hêrezh e ti hon tad, rak mab ur vaouez all ez out.

³ Jefte a dec'has a-zirak e vreudeur, hag ez eas da chom e tiriad Tob. Peorien-gaezh en em zastumas en-dro da Jefte, hag e raent troioù gantañ.

⁴ Un nebeud amzer goude, mibien Ammon a vrezelas a-enep Israel.

⁵ Evel ma vrezele mibien Ammon a-enep Israel, henaourien Galaad a yeas da gerc'hat Jefte da vro Dob.

⁶ Lavarout a rejont da Jefte: Deus da vezañ hor c'habiten, hag e stourmimp ouzh mibien Ammon.

⁷ Jefte a lavaras da henaourien Galaad: Ha n'hoc'h eus ket kasaet ac'hanon ha va c'haset kuit eus ti va zad? Perak e teuit da'm c'havout, pa ez oc'h bremañ er glac'har?

⁸ Henaourien Galaad a lavaras da Jefte: Setu perak e tistroomp da'z kavout bremañ, evit ma teui ganeomp ha ma stourmi a-enep mibien Ammon, ha ma vi hor rener, hini holl annezidi Galaad.

⁹ Jefte a lavaras da henaourien Galaad: Mar kasit ac'hanon ganeoc'h evit stourm a-enep mibien Ammon ha mar laka an AOTROU anezho etre va daouarn, e vin ho rener.

¹⁰ Henaourien Galaad a lavaras da Jefte: Ra vo test an AOTROU etrezomp, ma ne reomp ket evel ma ec'h eus lavaret.

¹¹ Jefte a yeas eta gant henaourien Galaad, hag ar bobl a lakaas anezhañ warno da rener ha kabiten, ha Jefte a adlavaras dirak an AOTROU e Mizpa an holl gomzoù en doa lavaret.

¹² Jefte a gasas kannaded da roue mibien Ammon evit lavarout: Petra a zo etre te ha me, ma'z out deuet a-enep din d'ober brezel em bro?

¹³ Roue mibien Ammon a lavaras da gannaded Jefte: Rak Israel, pa bigne eus an Ejipt, en deus kemeret va bro adalek an Arnon betek Jabok hag ar Jordan. Ha bremañ ro din an douaroù-se en-dro dre gaer.

¹⁴ Jefte a gasas a-nevez kannaded da roue mibien Ammon

¹⁵ evit lavarout: Evel-henn e komz Jefte: Israel n'en deus ket kemeret douaroù eus Moab nag eus mibien Ammon.

¹⁶ Pa bignas Israel eus an Ejipt, e kerzhas dre ar gouelec'h betek ar Mor Ruz, hag ec'h erruas e Kadesh.

¹⁷ Israel a gasas kannaded da roue Edom evit lavarout dezhañ: Va lez da dremen dre da vro; met roue Edom ne lezas ket. Hag e kasas ivez da roue Moab, met ne fellas ket dezhañ. Hag Israel a chomas e Kadesh.

¹⁸ Neuze e kerzhas dre ar gouelec'h, hag e reas tro bro Edom ha bro Voab, hag ec'h erruas ouzh sav-heol bro Voab, da gampiñ en tu all d'an Arnon, hep mont war douaroù Moab, rak an Arnon a oa harz Moab.

¹⁹ Israel a gasas kannaded da Sihon roue an Amoreaned ha roue Hesbon, hag Israel a lavaras dezhañ: Va lez da dremen dre da vro, betek va lec'h.

²⁰ Met Sihon ne fizias ket en Israel evit e lezel da dremen dre e vro. Sihon a zastumas e holl bobl, hag e kampjont e Jahaz, hag e stourmjont ouzh Israel.

²¹ An AOTROU Doue Israel a lakaas Sihon hag e holl bobl etre daouarn Israel a zisc'hreas anezho. Evel-se e perc'hennas Israel holl vro an Amoreaned a oa o chom er vro-se.

²² Kemer a rejont eta holl vro an Amoreaned adalek an Arnon betek Jabok, hag adalek ar gouelec'h betek ar Jordan.

²³ Ha bremañ, p'en deus an AOTROU Doue Israel kaset kuit an Amoreaned dirak e bobl Israel, daoust hag e vefe te an hini a berc'hennfe o bro?

²⁴ Ha ne berc'hennez ket ar pezh en deus roet dit da berc'hennañ Kemosh da zoue? Ni a berc'henno ar vro eus an holl re en deus kaset kuit an AOTROU hon Doue dirazomp.

²⁵ A-hend-all, daoust hag e talvezez muioc'h eget Balag mab Zippor, roue Moab? Ha n'en deus ket stourmet a-enep Israel, ha graet ar brezel outañ?

²⁶ Setu tri c'hant vloaz abaoe m'emañ Israel o chom en Hesbon hag en he c'hêrioù, en Aroer hag en he c'hêrioù, hag en holl gêrioù a zo a-hed an Arnon, perak n'hoc'h eus ket o lamet digantañ e-keit-se?

²⁷ Ne'm eus ket pec'het ouzhit, met e trougc'hraez em c'heñver oc'h ober brezel ouzhin. Ra varno hiziv an AOTROU, hag a zo ar Barner, etre mibien Israel ha mibien Ammon!

²⁸ Met roue mibien Ammon ne fellas ket dezhañ selaou ar c'homzoù en doa graet Jefte lavarout dezhañ.

²⁹ Spered an AOTROU a voe war Jefte. Hemañ a dremenas Galaad ha Manase, a yeas betek Mizpe Galaad, hag eus Mizpe Galaad a yeas war-zu mibien Ammon.

³⁰ Jefte a reas ur gouestl d'an AOTROU o lavarout: Mar lakaez mibien Ammon em dorn,

³¹ ar pezh a zeuio er-maez eus dor va zi a-raok din, pa zistroin e peoc'h eus mibien Ammon, a vo d'an AOTROU; e ginnig a rin e loskaberzh.

³² Jefte a yeas war-zu mibien Ammon evit stourm outo, hag an AOTROU o lakaas en e zorn.

³³ Hag e trec'has anezho adalek Aroer betek Minnid, e-lec'h ma oa ugent kêr, ha betek plaenenn ar gwini; ul lazhadeg vras a reas anezho. Mibien Ammon a voe izelaet dirak mibien Israel.

³⁴ Hag e tistroas Jefte da Vizpa, d'e di, ha setu e verc'h a zeuas en arbenn dezhañ, gant taboulinoù ha dañsoù. Bez' e oa e vugel nemetañ, n'en doa na mab na merc'h all.

³⁵ Kerkent ha ma welas anezhi e rogas e zilhad hag e lavaras: Siwazh va merc'h! Bec'hiet on, ya bec'hiet on, peurvantret on abalamour dit, rak digoret em eus va genoù d'an AOTROU ha ne c'hellin ket dislavarout.

³⁶ Hi a lavaras dezhañ: Va zad, digoret ec'h eus da c'henoù d'an AOTROU? Gra din evel m'eo deuet eus da c'henoù, p'en deus an AOTROU veñjet ac'hanout eus da enebourien, mibien Ammon.

³⁷ Hag e lavaras d'he zad: Ro din kement-mañ: Lez ganin daou viz, mont a rin, diskenn a rin dre ar menezioù, hag e ouelin war va gwerc’hded gant va mignonezed.

³⁸ Hag e lavaras dezhi: Kae! Hag he lezas da vont evit daou viz. Mont a reas eta gant he mignonezed da ouelañ war he gwerc’hded war ar menezioù.

³⁹ A-benn daou viz e tistroas da gavout he zad, hag e reas ganti ar gouestl en doa graet. N'he doa anavezet den ebet. Ac'hane e teu ar c'hiz en Israel,

⁴⁰ penaos a vloaz da vloaz merc'hed Israel a ya da glemm diwar-benn merc'h Jefte ar Galaadad, e-pad pevar devezh bep bloaz.