Ar Varnerien 10 - Bibl Koad 21: Ar Bibl e Brezhoneg evit ar Vretoned

Pennad 10 Tola ha Jair. Pec'hedoù Israel

¹ Goude Abimelek, Tola mab Pua mab Dodo, den eus Isakar, a savas evit dieubiñ Israel. Edo o chom e Shamir, war venez Efraim.

² Hag e varnas Israel tri bloaz warn-ugent, hag e varvas, hag e voe sebeliet e Shamir.

³ War e lerc'h e savas Jair eus Galaad, a varnas Israel daou vloaz warn-ugent.

⁴ Bez' en doa tregont mab, a yae war dregont azenig, hag o doa tregont kêr, a zo anvet c'hoazh hiziv kêrioù Jair. E bro C'halaad emaint.

⁵ Ha Jair a varvas hag a voe sebeliet e Kamon.

⁶ Neuze mibien Israel a reas adarre an droug dirak daoulagad an AOTROU, hag e servijjont ar Baaloù hag Ashtarod, doueoù Siria, doueoù Sidon, doueoù Moab, doueoù mibien Ammon ha doueoù ar Filistined. Hag e tilezjont an AOTROU ha ne servijjont ken anezhañ.

⁷ Fulor an AOTROU en em danas a-enep Israel, hag e lakaas anezho etre daouarn ar Filistined hag etre daouarn mibien Ammon.

⁸ Er bloaz-se e waskjont hag e vac'hjont mibien Israel, hag e-pad triwec'h vloaz holl vibien Israel a oa en tu all d'ar Jordan, e bro an Amoreaned a zo e Galaad.

⁹ Mibien Ammon a dremenas ar Jordan evit stourm ivez a-enep Juda, a-enep Benjamin hag a-enep ti Efraim. Hag e voe Israel en un estrenvan vras.

¹⁰ Mibien Israel a grias etrezek an AOTROU o lavarout: Pec'het hon eus a-enep dit ha servijet hon eus ar Baaloù.

¹¹ Met an AOTROU a lavaras da vibien Israel: Ha ne'm eus ket ho tieubet eus an Ejipsianed, eus an Amoreaned, eus mibien Ammon, eus ar Filistined,

¹² eus ar Sidoniz, eus an Amalekited, eus ar Vaoniz? Ha pa hoc'h eus kriet etrezek ennon, em eus ho tieubet eus o daouarn.

¹³ Met va dilezet hoc'h eus evit servijañ doueoù all, setu perak n'ho tieubin ken.

¹⁴ Kit da grial etrezek an doueoù hoc'h eus dibabet, ra zieubint ac'hanoc'h en amzer hoc'h estrenvan.

¹⁵ Mibien Israel a lavaras d'an AOTROU: Pec'het hon eus, gra en hor c'heñver evel ma kavi mat, met dieub ac'hanomp hepken hiziv.

¹⁶ Hag e lamjont eus o zouez an doueoù diavaeziek, evit servijañ an AOTROU. Truez en doe en e galon dirak glac'har Israel.

¹⁷ Mibien Ammon en em zastumas hag a gampas e Galaad, ha mibien Israel en em zastumas ivez hag a gampas e Mizpa.

¹⁸ Ar bobl ha pennoù Galaad a lavaras an eil d'egile: Piv eo an den a grogo da stourm a-enep mibien Ammon? Bez' e vo ar rener eus holl annezidi Galaad.