Ar Prezeger 4 - Bibl Koad 21: Ar Bibl e Brezhoneg evit ar Vretoned

Pennad 4

¹ Goude-se ez on en em lakaet da sellout ouzh an holl waskerezhioù a vez graet dindan an heol. Ha setu, ar re wasket a skuilh daeroù, ha n'o deus frealzer ebet. An nerzh a zo e tu ar re o gwask, met evito n'eus frealzer ebet.

² Setu perak e talv din muioc'h ar re varv a zo dija marv eget ar re vev a zo en o buhez,

³ hag e kavan eürusoc'h eget an eil re hag ar re all, an hini n'eo ket bet c'hoazh, ha n'en deus ket gwelet an oberoù fall a vez graet dindan an heol.

⁴ Gwelet em eus ivez pep labour ha pep ijin el labour, n'int nemet gwarizi eus an eil e-keñver egile. Kement-se ivez a zo avel ha poan spered.

⁵ An den diskiant a groaz e zaouarn hag en em zebr e-unan:

⁶ gwelloc'h eo leizh kleuz an dorn gant diskuizh, eget leizh palv an daou zorn gant labour ha poan spered.

⁷ En em lakaet on da sellout ouzh un avel all dindan an heol:

⁸ Un den a zo e-unan, hep eiler, n'en deus na mab na breur, ha koulskoude n'eus ket a diwezh d'e holl labour; e zaoulagad zoken n'o deus biken o gwalc'h a binvidigezh. Ne lavar ket: Evit piv e labouran hag e laman eurvad digant va ene? Kement-se ivez a zo avel ha labour poanius.

⁹ Gwelloc'h eo daou eget unan, dre ma ez eus evito muioc'h a c'hopr eus o labour.

¹⁰ Rak mar kouezh unan, egile a c'hell e adsevel; met gwalleur d'an hini a zo e-unan hag a gouezh! n'eus den d'e adsevel.

¹¹ En hevelep doare mar kousk daou a-gevret, e vo tomm dezho; met an hini a zo e-unan, penaos e vo tomm dezhañ?

¹² Mard eo un den kreñvoc'h eget unan hepken, daou a c'hello herzel outañ. Ar gordenn teir breunenn ne dorr ket buan.

¹³ Gwelloc'h eo ur bugel paour ha fur eget ur roue kozh ha diskiant, ha na oar ket kemer kuzul.

¹⁴ Rak un den a zeu er-maez eus an toull-bac'h da ren, hag un den bet ganet roue a zeu da vezañ paour.

¹⁵ Gwelet em eus an holl re vev a gerzh dindan an heol o vont war-lerc'h ar mab, an eil goude ar roue hag a yelo en e lec'h.

¹⁶ Ne oa ket a ziwezh d'an holl bobl, d'an holl re ma oa e penn anezho. Koulskoude ar re a zeuio da c'houde ne vint ket laouen diwar e benn. A-dra-sur kement-se ivez a zo avel ha poan spered.