Agge 2 - Bibl Koad 21: Ar Bibl e Brezhoneg evit ar Vretoned

Pennad 2

¹ D'ar seizhvet miz, d'an deiz kentañ warn-ugent eus ar miz, komz an AOTROU a voe disklêriet dre Agge ar profed o lavarout:

² Komz eta ouzh Zorobabel mab Salatiel, gouarnour Juda, hag ouzh Jozue mab Jozadak, an aberzhour-meur, hag ouzh an nemorant eus ar bobl, ha lavar dezho:

³ Piv a chom en ho touez eus ar re o deus gwelet an ti-mañ en e c'hloar kentañ? Ha penaos e welit anezhañ bremañ? Evel ma'z emañ, ha n'eo ket evel netra dirak ho taoulagad?

⁴ Met bremañ, kalon dit Zorobabel! eme an AOTROU. Kalon dit Jozue mab Jozadak, aberzhour-meur! Kalon deoc'h-c'hwi holl bobl ar vro! eme an AOTROU. Ha labourit, rak me a zo ganeoc'h, eme AOTROU an armeoù,

⁵ hervez an emglev am eus graet ganeoc'h pa'z oc'h aet er-maez eus an Ejipt, ha va Spered a chom en ho kreiz. N'ho pet ket aon!

⁶ Rak evel-henn e komz AOTROU an armeoù: Ur wech c'hoazh, a-benn nebeut, e vrañsellin an neñvoù hag an douar, ar mor hag ar sec'h.

⁷ Hag e vrañsellin an holl vroadoù, hag e teuio teñzorioù an holl vroadoù, hag e leugnin an ti-mañ a c'hloar, eme AOTROU an armeoù.

⁸ An arc'hant a zo din, hag an aour a zo din, eme AOTROU an armeoù.

⁹ Gloar an ti diwezhañ-mañ a vo brasoc'h eget hini ar c'hentañ, eme AOTROU an armeoù. Hag e lakain ar peoc'h el lec'h-mañ, eme AOTROU an armeoù.

¹⁰ D'ar pevare deiz warn-ugent eus ar navet miz, en eilvet bloaz eus ar roue Dariuz, komz an AOTROU a voe disklêriet dre Agge ar profed o lavarout:

¹¹ Evel-henn e komz AOTROU an armeoù: Kinnig eta d'an aberzhourien ur goulenn diwar al lezenn, o lavarout:

¹² Mar doug unan bennak kig santelaet e pleg e vantell, ha ma stok gant ar vantell-se ouzh bara, pe ouzh ur meuz poazhet, pe gwin, pe eoul, pe ur boued bennak, daoust hag-eñ e teu an dra-se da vezañ santel? An aberzhourien a respontas o lavarout: Ne zeu ket.

¹³ Agge a lavaras: Mar stok an hini a zo dic'hlan evit unan marv ouzh an traoù-se, daoust hag-eñ e vint dic'hlan an draoù-se? An aberzhourien a respontas o lavarout: Dic'hlan e vint.

¹⁴ Agge a respontas o lavarout: Evel-se eo ar bobl-mañ, evel-se eo ar vroad-mañ dirazon, eme an AOTROU, hag evel-se eo holl labour o daouarn, ar pezh a ginnigont aze a zo dic'hlan.

¹⁵ Taolit evezh eta, adalek an deiz-se hag en ur sevel en amzer dremenet, a-raok ma oa bet lakaet maen war vaen e templ an AOTROU,

¹⁶ neuze, pa deuec'h d'ur bern a ugent muzuliad, ne oa nemet dek, pa zeuec'h d'ar veol evit tennañ hanter-kant muzul eus ar waskell, ne oa nemet ugent.

¹⁷ Skoet em eus warnoc'h dre an dev, dre ar mergl, dre ar grizilh en holl labour ho taouarn. Ha n'oc'h ket distroet ouzhin, eme an AOTROU.

¹⁸ Taolit evezh eta, adalek an deiz-mañ hag evit an dazont, adalek ar pevare deiz warn-ugent eus an navet miz, adalek an deiz-mañ m'eo bet diazezet templ an AOTROU, taolit evezh:

¹⁹ Hag-eñ ez eus c'hoazh greun er solieroù? Ha zoken ar winienn, ar fiezenn, ar c'hreunadezenn, an olivezenn o deus roet netra. Met adalek an deiz-mañ, me a vennigo.

²⁰ Komz an AOTROU a voe disklêriet evit an eil gwech da Agge, d'ar pevare deiz warn-ugent eus ar miz, o lavarout:

²¹ Komz ouzh Zorobabel gouarnour Juda o lavarout: Brañsellat a rin an neñvoù hag an douar,

²² Diskar a rin tron ar rouantelezhioù, distrujañ a rin nerzh rouantelezhioù ar broadoù, diskar a rin ar c'hirri hag ar re a bign warno. Ar c'hezeg hag ar re a bign warno a vo taolet d'an traoñ, an eil dre gleze egile.

²³ En deiz-se, eme AOTROU an armeoù, e kemerin ac'hanout, Zorobabel mab Salatiel, va servijer, eme an AOTROU, hag e talc'hin ac'hanout evel ur siell, rak da zibabet em eus, eme AOTROU an armeoù.