Actou an Ebestel 23 - Bibl Koad 21: Ar Bibl e Brezhoneg evit ar Vretoned

Pennad 23

¹ Paol, o sellout start ouzh ar sanedrin, a lavaras: Tud breudeur, bevet em eus betek vremañ dirak Doue e pep koustiañs vat.

² Ar beleg-meur Ananiaz a c’hourc’hemennas d’ar re a oa tost dezhañ skeiñ anezhañ war e c’henoù.

³ Neuze Paol a lavaras dezhañ: Doue a skoio ac’hanout moger wennaet! Azezet out evit va barn hervez al lezenn, hag e terrez al lezenn o c’hourc’hemenn va skeiñ.

⁴ Ar re a oa tost dezhañ a lavaras: Dismegañsiñ a rez beleg-meur Doue?

⁵ Paol a respontas: Breudeur, ne ouien ket e oa ar beleg-meur, rak skrivet eo: Ne zroukkomzi ket eus penn da bobl.

⁶ Met, o c’houzout penaos ul lodenn a oa sadukeidi hag ul lodenn all farizianed, Paol a grias er sanedrin: Tud breudeur, me a zo farizian, mab da ur farizian, hag abalamour d’an esperañs ha d’an adsavidigezh a-douez ar re varv eo e varner ac’hanon.

⁷ P’en doe lavaret kement-se, e savas un dizunaniezh etre ar farizianed hag ar sadukeidi, hag ar vodadenn en em rannas.

⁸ Rak ar sadukeidi a lavar n’eus nag adsavidigezh a varv, nag ael, na spered, met ar farizianed a anzav an eil hag egile.

⁹ Bez’ e voe un drouz vras war-se. Skribed kostez ar farizianed o sevel a dabutas hag a lavaras: Ne gavomp droug ebet en den-se. Mar en deus ur spered pe un ael komzet outañ, na reomp ket a vrezel a-enep Zoue.

¹⁰ Evel ma savas un tabut bras etrezo, ar c’habiten, o kaout aon na vefe diskolpet Paol ganto, a c’hourc’hemennas d’ar soudarded diskenn evit e lemel kuit eus o c’hreiz hag e gas d’ar c’hreñvlec’h.

¹¹ En noz war-lerc’h, an Aotrou a zeuas d’e gavout hag a lavaras: Paol, az pez kalon vat, rak, evel ma ec’h eus roet testeni e Jeruzalem diwar va fenn, e vo ret dit ivez reiñ testeni e Rom.

Irienn a-enep Paol

¹² Pa voe deuet an deiz, hiniennoù eus ar Yuzevien a reas un irienn hag en em ereas dre leoù, o lavarout na zebrjent ha na evjent ket ken n’o dije lazhet Paol.

¹³ Ar re o doa touet kement-se a oa anezho ouzhpenn daou-ugent.

¹⁴ Mont a rejont da gavout ar veleien vras hag an henaourien, hag e lavarjont: En em ereet hon eus dre leoù penaos na lonkimp netra ken n’hor bo lazhet Paol.

¹⁵ C’hwi eta bremañ gant ar sanedrin, lavarit d’ar c’habiten e lakaat da ziskenn warc’hoazh en ho kreiz, evel ma klaskfec’h anavezout gant brasoc’h evezh e dra. Ha ni a zo prest d’e lazhañ a-raok ma tostaio.

¹⁶ Mab c’hoar Paol, o vezañ klevet an irienn, a zeuas hag a yeas er c’hreñvlec’h da reiñ da c’houzout da Baol.

¹⁷ Paol a c’halvas unan eus ar gantenerien hag a lavaras: Kas an den yaouank-se da gavout ar c’habiten, rak un dra bennak en deus da lavarout dezhañ.

¹⁸ O vezañ e gemeret, e gasas d’ar c’habiten hag e lavaras: Ar prizoniad Paol, o vezañ va galvet, en deus goulennet da zegas dit an den yaouank-mañ, en deus un dra bennak da lavarout dit.

¹⁹ Ar c’habiten, o kregiñ e zorn hag o vezañ aet gantañ a-du, a c’houlennas digantañ: Petra ac’h eus da zisklêriañ din?

²⁰ Respont a reas: Ar Yuzevien o deus en em glevet da c’houlenn diganit da zegas Paol warc’hoazh dirak ar sanedrin, evel ma fellfe dezho anavezout gant brasoc’h evezh e dra.

²¹ Na fiz ket enno, rak ouzhpenn daou-ugent anezho a stign pechoù dezhañ hag o deus en em ereet dre leoù penaos na zebrjent ha na evjent ket ken n’o dije lazhet Paol. Ha bremañ int prest o c’hortoz da asant.

²² Neuze ar c’habiten a c’hasas kuit an den yaouank, o c’hourc’hemenn dezhañ: Na lavar da zen en doa disklêriet kement-se din.

Paol kaset da Gezarea

²³ Gervel a reas daou eus ar gantenerien hag e lavaras: Dalc’hit prest daou c’hant soudard, dek marc’heger ha tri-ugent ha daou c’hant gwareger, evit mont betek Kezarea d’an deirvet eur eus an noz.

²⁴ Prientit ivez loened evit lakaat Paol warno hag e gas e surentez d’ar gouarnour Feliks.

²⁵ Skrivañ a reas ul lizher er c’homzoù-mañ:

²⁶ Glaoda Lisiaz, d’ar gouarnour mat meurbet Feliks: Salud!

²⁷ Ar Yuzevien o deve kroget en den-mañ hag a yae d’e lazhañ, pa’z on deuet gant soudarded hag em eus e dennet diganto, o vezañ gouezet e oa Roman.

²⁸ O c’hoantaat anavezout an abeg eus an tamall a raent dezhañ, em eus e lakaet da ziskenn en o sanedrin.

²⁹ Kavet em eus e oa tamallet war gudennoù eus o lezenn, met ne oa karget eus tra ebet a zellezfe ar marv pe ar prizon.

³⁰ Evel ma’z eo bet disklêriet din ar pechoù o deus ar Yuzevien stignet dezhañ, em eus kerkent e gaset dit. Lavaret em eus d’e damallerien dont da lavarout dirazout ar pezh o deus a-enep dezhañ. Kenavo.

³¹ Ar soudarded a gemeras eta Paol, hervez an urzh o doa resevet, hag e gasas en noz da Antipatriz.

³² An deiz war-lerc’h, o vezañ lezet ar varc’hegerien da vont gantañ, e tistrojont d’ar c’hreñvlec’h.

³³ O vezañ erruet e Kezarea, e rojont al lizher d’ar gouarnour hag e lakajont ivez Paol dirazañ.

³⁴ Ar gouarnour a lennas al lizher hag a c’houlennas a beseurt rannvro e oa Paol. O vezañ gouezet e oa eus Kilisia,

³⁵ e lavaras dezhañ: Me a glevo ac’hanout pa vo deuet da damallerien. Hag e c’hourc’hemennas ma vije dalc’het e pretordi Herodez.