Actou an Ebestel 18 - Bibl Koad 21: Ar Bibl e Brezhoneg evit ar Vretoned

Pennad 18 Paol e Korint

¹ Goude-se, Paol a yeas kuit eus Aten hag a zeuas da Gorint.

² Eno e kavas ur Yuzev anvet Akilaz, genidik eus ar Pont, nevez deuet eus Italia gant Prisilha e wreg, abalamour m’en doa Glaoda gourc’hemennet d’an holl Yuzevien mont kuit eus Rom. Mont a reas d’o c’havout

³ hag, evel ma oa eus an hevelep micher, e chomas en o zi hag e labouras ganto: o micher a oa ober teltennoù.

⁴ Komz a reas er sinagogenn pep devezh sabad hag e lakaas Yuzevien ha Gresianed da grediñ.

⁵ Pa voe deuet Silaz ha Timote eus Makedonia, Paol, bountet gant ar Spered, a roas testeni gant hardizhegezh d’ar Yuzevien ez eo Jezuz ar C’hrist.

⁶ Met evel ma’c’h enebjont outañ ha ma vallozhjont, ec’h hejas e zilhad hag e lavaras dezho: Ra gouezho ho kwad war ho penn! Naet on anezhañ. Diwar vremañ ez in etrezek ar baganed.

⁷ O vezañ aet ac’hane, ez eas e ti un den anvet Justuz, un den a zouje Doue hag a oa e di stag ouzh ar sinagogenn.

⁸ Krispuz, penn ar sinagogenn, a gredas en Aotrou gant e holl diegezh. Ha kalz a Gorintiz, o vezañ selaouet, a gredas hag a voe badezet.

⁹ An Aotrou a lavaras da Baol en ur weledigezh e-pad an noz: Na’z pez ket aon, met komz ha na dav ket,

¹⁰ rak me a zo ganit ha den ne lakaio e zorn warnout d’ober droug dit, rak ur bobl vras am eus er gêr-mañ.

¹¹ Chom a reas eno ur bloaz ha c’hwec’h miz, o kelenn ger Doue en o zouez.

Paol dirak Gallion

¹² E-pad ma oa Gallion prokoñsul en Akaia, ar Yuzevien en em savas a-unvan a-enep Paol hag en degasas dirak al lezvarn,

¹³ o lavarout: Hemañ a ali an dud da servijañ Doue en un doare a zo a-enep al lezenn.

¹⁴ Evel ma’z ae Paol da zigeriñ e c’henoù, Gallion a lavaras d’ar Yuzevien: Ma vije meneg eus un dislealded pe eus ur gwallober bennak, o Yuzevien, me a selaoufe ac’hanoc’h evel ma’z eo dereat,

¹⁵ met mar d-eo un enebiezh diwar-benn gerioù, anvioù hag ho lezenn, e welot kement-se hoc’h-unan, rak ne fell ket din bezañ barner eus an traoù-se.

¹⁶ Hag e kasas anezho kuit eus al lezvarn.

¹⁷ Neuze an holl C’hresianed a gemeras Sosten penn ar sinagogenn hag a gannas anezhañ dirak al lezvarn, ha Gallion ne reas van ebet a gement-se.

Distro Paol da Antioch

¹⁸ Paol, goude bezañ c’hoazh chomet e Korint pell a-walc’h, a gimiadas diouzh ar vreudeur hag a yeas dre vor war-zu Siria gant Prisilha hag Akilaz. E Kenkre e lakaas e vlev da vezañ troc’het rak graet en doa ur gouestl.

¹⁹ Erruout a reas en Efez hag e lezas eno e genveajourien. O vezañ aet er sinagogenn, e komzas gant ar Yuzevien.

²⁰ Int a bedas anezhañ da chom ganto pelloc’h, met n’asantas ket

²¹ hag e kimiadas diouto, en ur lavarout: Ret eo din a dra-sur lidañ ar gouel a zeu e Jeruzalem. Distreiñ a rin d’ho kwelout, mar plij gant Doue. Hag ez eas kuit dre vor eus Efez.

²² O vezañ douaret e Kezarea, e pignas da saludiñ an Iliz hag e tiskennas da Antioch.

Trede beaj mision Paol

²³ O vezañ tremenet ur pennad amzer eno, ez eas kuit hag e treuzas rannvroioù Galatia ha Frigia, en ur greñvaat an holl ziskibien.

Apolloz en Efez hag e Korint

²⁴ Neuze ur Yuzev anvet Apolloz, un den helavar genidik eus Aleksandria, a erruas en Efez. Barrek e oa war ar Skriturioù.

²⁵ Desket e oa bet en hent an Aotrou. Birvidik a spered, e komze hag e kelenne gant evezh diwar-benn an traoù a sell ouzh an Aotrou, petra bennak ma n’anaveze nemet badeziant Yann.

²⁶ En em lakaat a reas da gomz gant hardizhegezh er sinagogenn. Akilaz ha Prisilha o vezañ e glevet, a gemeras anezhañ ganto hag a zisplegas dezhañ gant muioc’h a evezh hent Doue.

²⁷ Evel ma felle dezhañ mont da Akaia, ar vreudeur a alias anezhañ da vont hag a skrivas d’an diskibien e zegemer mat. Pa voe en em gavet, e sikouras kalz ar re o doa kredet dre c’hras,

²⁸ rak kendrec’hiñ a rae gant nerzh ar Yuzevien dirak an holl, o prouiñ dre ar Skriturioù ez eo Jezuz ar C’hrist.