2 Timote 3 - Bibl Koad 21: Ar Bibl e Brezhoneg evit ar Vretoned

Pennad 3 Dizoujañs Doue an devezhioù diwezhañ

¹ Ret eo dit gouzout e vo amzerioù diaes en devezhioù diwezhañ.

² Rak an dud en em garo o-unan, a garo an arc’hant, a vo fougeüs, otus, mallozherien, disent ouzh o zadoù hag o mammoù, dizanaoudek, disantel,

³ hep karantez naturel, didruez, droukkomzerien, diroll, garv, enebourien d’an dud vat,

⁴ treitour, taer, c’hwezhet a ourgouilh, a garo ar blijadur kentoc’h eget Doue,

⁵ o devo an diavaez a zoujañs-Doue met o devo dinac’het ar pezh a ra he nerzh. En em bella diouzh an dud-se.

⁶ En o zouez emañ ar re a ya en tiez hag a c’hounit paour-kaezh merc’hed karget a bec’hedoù, hejet gant pep seurt youloù fall,

⁷ atav o teskiñ hep gallout biken dont a-benn da anavezout ar wirionez.

⁸ Evel m’o deus Jannez ha Jambrez enebet ouzh Moizez, evel-se ivez ar re-mañ a eneb ouzh ar wirionez, tud a skiant hudur ha kollet e-keñver ar feiz.

⁹ Met ne d-aint ket pelloc’h, rak o follentez a vo anavezet gant an holl evel ma voe ivez hini an daou-se.

Alioù Paol da Dimote

¹⁰ Evidout, heuliet ec’h eus va deskadurezh, va c’hundu, va menoz, va feiz, va fasianted, va c’harantez, va dalc’husted,

¹¹ va heskinoù, va glac’haroù, evel ar re a zo erruet ganin en Antioch, en Ikoniom, e Listra. Pebezh heskinoù am eus gouzañvet! Hag an Aotrou en deus va dieubet anezho holl.

¹² Ya, kement hini a fell dezhañ bevañ hervez an doujañs-Doue e Jezuz-Krist a vo heskinet.

¹³ Met an dud fall hag an douellerien a yelo en ur washaat, o touellañ hag o vezañ touellet.

¹⁴ Evidout, chom start en traoù ac’h eus desket hag anavezet evel asur, o c’houzout gant piv ec’h eus o desket.

¹⁵ Abaoe da vugaleaj ec’h anavezez ar Skriturioù Santel a c’hell da zeskiñ evit ar silvidigezh dre ar feiz a zo e Jezuz-Krist.

¹⁶ An holl Skritur a zo awenet gant Doue ha mat da zeskiñ, da gendrec’hiñ, da zifaziañ, da gelenn er reizhder,

¹⁷ evit ma vo an den a Zoue peurc’hraet ha prest da bep oberenn vat.