2 Samuel 23 - Bibl Koad 21: Ar Bibl e Brezhoneg evit ar Vretoned

Pennad 23

¹ Setu amañ komzoù diwezhañ David. David mab Jese, an hini a zo bet savet uhel, an hini a zo bet olevad Doue Jakob, ar c'haner karet eus Israel, a lavaras:

² Spered an AOTROU en deus komzet drezon, e gomz a zo bet war va zeod.

³ Doue Israel en deus lavaret, Roc'h Israel en deus komzet drezon: An hini a ren e-touez an dud gant reizhder, an hini a ren gant doujañs-Doue,

⁴ a zo heñvel ouzh sklêrijenn ar mintin pa sav an heol, d'ur mintin hep koumoul. E sked a laka ar geot da zont eus an douar goude ar glav.

⁵ Ha n'eo ket evel-se va zi dirak Doue? Graet en deus ganin un emglev peurbadus, reizhet mat ha stabil. Va holl silvidigezh, kement a garan, ha n'o lakaio ket da vleuniañ?

⁶ Hag ar re zrouk a vo holl evel spern a daoler pell, rak n'o c'hemerer ket gant an dorn.

⁷ An hini a fell dezhañ stekiñ outo a ra gant un houarn pe gant koad ur goaf, hag e vezont devet en tan war al lec'h.

⁸ Setu amañ anvioù tud kadarn a oa gant David: Josheb-Basshebed an Takmonad a oa penn ar vrezelourien wellañ. Eñ eo an hini a savas e c'hoaf war eizh kant den, a lakaas da vervel en ur wech.

⁹ Goude hemañ e oa Eleazar mab Dodo an Akokiad, unan eus an tri den kadarn a oa gant David pa vezhekajont ar Filistined dastumet eno evit an emgann, ha ma en em denne re Israel war an uhelennoù.

¹⁰ Sevel a reas hag e skoas war ar Filistined betek ma voe skuizh e zorn ha ma chomas stag ouzh e gleze. En deiz-se an AOTROU a roas un dieubidigezh vras. Ar bobl a zistroas war-lerc'h Eleazar evit diwiskañ.

¹¹ Goude hemañ e oa Shamma mab Age an Harariad. Ar Filistined a oa en em zastumet en ur bagad, hag e oa eno un dachenn douar leun a fer. Ar bobl a dec'he dirak ar Filistined.

¹² Met eñ en em zalc'has e-kreiz an dachenn, hag he difennas hag e skoas war ar Filistined. Evel-se e roas an AOTROU un dieubidigezh vras.

¹³ Tri eus an tregont penn a ziskennas hag a zeuas, en amzer an eost, da gavout David, e kev Adullam, pa oa ur bagad Filistined o kampiñ e traonienn ar Refaim.

¹⁴ David a oa neuze er c'hreñvlec'h, hag e-keit-se e oa gwarnizon ar Filistined e Betlehem.

¹⁵ David a c'hoantaas un dra bennak o lavarout: Piv a raio din evañ dour eus ar puñs a zo ouzh dor Betlehem?

¹⁶ Neuze an tri den kadarn-se a yeas a-dreuz kamp ar Filistined hag a dennas dour eus ar puñs a zo e-kichen dor Betlehem, hag en degasjont d'e ginnig da Zavid. Met ne fellas ket dezhañ e evañ, hag e skuilhas anezhañ dirak an AOTROU.

¹⁷ Hag e lavaras: Pell diouzhin o AOTROU d'ober an dra-se! Ha n'eo ket gwad an dud-se a zo aet war var o buhez? Ha ne fellas ket dezhañ evañ anezhañ. Setu ar pezh a reas an tri den kadarn-se.

¹⁸ Abishai breur Joab mab Zeruja a oa penn an tri. Sevel a reas e c'hoaf war dri c'hant den, hag o lazhas, hag en devoe brud e-touez an tri.

¹⁹ E-touez an tri, eñ a voe an hini muiañ enoret, hag e voe o fenn. Met ne oa ket kevatal d'an tri c'hentañ.

²⁰ Benaja mab Jehojada, mab un den kadarn eus Kabzeel, en doa graet oberoù bras. Skeiñ a reas war zaou zen eus ar re c'halloudusañ eus Moab. Diskenn a reas ivez hag e skoas war ul leon e-kreiz ur poull, un devezh erc'h.

²¹ Skeiñ a reas war un Ejipsian a oa un den spontus. An Ejipsian-se en doa en e zorn ur goaf, met eñ a ziskennas d'e gavout gant ur vazh, hag e tiframmas ar goaf eus dorn an Ejipsian, hag e lazhas anezhañ gant e c'hoaf.

²² Setu ar pezh a reas Benaja mab Jehojada, hag e voe brudet e anv e-touez an tri den kadarn.

²³ Enoret e voe muioc'h eget an tregont, met ne oa ket kevatal d'an tri c'hentañ. David a lakaas anezhañ en e guzul.

²⁴ Asael breur Joab a oa e-touez an tregont, Elkanan mab Dodo eus Betlehem,

²⁵ Shamma an Harodiad, Elika an Harodiad,

²⁶ Helez ar Paltiad, Ira mab Ikkesh eus Tekoa,

²⁷ Abiezer an Anatodiad, Mebunnai an Hushaiad,

²⁸ Zalmon an Akokiad, Maharai an Netofatad,

²⁹ Heled mab Baana an Netofatad, Ittai mab Ribai eus Gibea eus mibien Benjamin,

³⁰ Benaja ar Piratoniad, Hiddai eus froudoù Gaash,

³¹ Abi-Albon an Arbatiad, Azmaved ar Barkumad,

³² Eliakba ar Shaalbonad, mibien Jashen, Jonatan,

³³ Shamma an Harariad, Akiam mab Sharar an Harariad,

³⁴ Elifeled mab Akasbai mab da ur Maakatian, Eliam mab Akitofel ar Gilonad,

³⁵ Hezerai eus Karmel, Paarai an Arbiad,

³⁶ Jigal mab Natan eus Zoba, Bani ar Gadiad,

³⁷ Zelek an Ammonad, Naharai ar Beerotiad a zouge armoù Joab mab Zeruja,

³⁸ Ira ar Jetrian, Gareb ar Jetrian,

³⁹ Uri an Hitit. An holl, seizh ha tregont.