2 Samuel 22 - Bibl Koad 21: Ar Bibl e Brezhoneg evit ar Vretoned

Pennad 22

¹ Ha David a lavaras d'an AOTROU komzoù ar ganaouenn-mañ p'en doe an AOTROU dieubet anezhañ eus dorn e holl enebourien hag eus dorn Saül.

² Lavarout a reas: An AOTROU a zo va roc'h, va c'hreñvlec'h, va dieuber!

³ O Doue, va roc'h a gavan bod enni! Va skoed hag an nerzh am dieub, va repu uhel ha va minic'hi! Va Salver, te a ziwall ac'hanon diouzh ar feulster.

⁴ Me a gri: Meulet ra vo an AOTROU! Hag ez on dieubet eus va enebourien.

⁵ Gwagoù ar marv o doa va goloet, froudoù an distruj o doa va spouronet,

⁶ ereoù lec'h ar marv o doa va gourizet, pechoù ar marv o doa va souprenet,

⁷ em estrenvan em eus aspedet an AOTROU ha kriet da'm Doue. Eus e balez en deus klevet va mouezh, hag aet eo va c'hriadenn betek e zivskouarn.

⁸ Neuze an douar a voe brañsellet hag a grenas, diazezoù an neñvoù a fiñvas hag a voe brañsellet, dre ma oa droug ennañ.

⁹ Ur vogedenn a bignas eus e fronelloù, hag un tan loskus eus e c'henoù; glaouennoù entanet a oa enaouet dioutañ.

¹⁰ Izelaet e voe an neñvoù gantañ hag e tiskennas, un deñvalijenn dindan e dreid.

¹¹ Pignet e oa war ur cherubin hag e nije, en em ziskouez a rae war eskell an avel.

¹² Ober a reas eus an deñvalijenn evel un deltenn, gant bernioù doureier ha koumoul du.

¹³ Eus ar splannder a oa dirazañ e teue glaouennoù tan o flammañ.

¹⁴ An AOTROU a gurunas eus an neñvoù, an Uhel-Meurbet a daolas e vouezh

¹⁵ Stlepel a reas biroù hag e stlabezas anezho, luc'hed hag o disparfoeltras.

¹⁶ Foñs ar mor en em ziskouezas, diazezoù ar bed a voe dizoloet, gant gourdrouz an AOTROU, gant c'hwezh avel e zivfron.

¹⁷ Astenn a reas e zorn eus krec'h, hag e kemeras ac'hanon, va zennañ a reas eus an doureier bras,

¹⁸ va dieubiñ a reas eus va enebour galloudus, eus ar re a gasae ac'hanon hag a oa nerzhusoc'h egedon.

¹⁹ Souprenet o doa ac'hanon en deiz va estrenvan, met an AOTROU a voe va skoazell.

²⁰ Va lakaet en deus er frankiz, va dieubet en deus, rak kavet en deus e blijadur ennon.

²¹ An AOTROU en deus graet din hervez va reizhder, rentet en deus din hervez purentez va daouarn,

²² rak miret em eus hentoù an AOTROU, ha n'on ket bet disleal da'm Doue.

²³ Rak e holl varnedigezhioù a zo dirazon, ha ne bellaan ket diouzh e reolennoù.

²⁴ Bet on eeun gantañ, hag on en em viret diouzh va direizhder.

²⁵ Neuze an AOTROU en deus rentet din hervez va reizhder, hervez va furentez dirak e zaoulagad.

²⁶ Gant an hini a zo mat ez out mat, gant an hini a zo eeun e rez dezhañ hervez e eeunder,

²⁷ gant an hini a zo glan ez out glan, met gant an hini a zo fallakr e rez dezhañ hervez e fallagriezh.

²⁸ Te a savete ar bobl c'hlac'haret, met da zaoulagad a izela ar re faeüs.

²⁹ Te eo va goulaouenn, o AOTROU! An AOTROU a laka va zeñvalijenn da lugerniñ.

³⁰ Rak ganit e kouezhan war ur strollad, gant va Doue e treuzan ur voger.

³¹ Hent Doue a zo peurvat, ger an AOTROU a zo amprouet. Ur skoed eo evit an holl re a laka o fiziañs ennañ.

³² Rak piv a zo Doue, nemet an AOTROU, ha piv a zo ur roc'h, nemet hon Doue?

³³ Doue eo an hini a zo va c'hreñvlec'h, hag a laka va hent da vezañ e savete,

³⁴ a ro da'm zreid da vezañ heñvel ouzh re an heizezed, a laka ac'hanon war va uheldirioù,

³⁵ a zoare va daouarn d'ar brezel, ha setu ma stegn va divrec'h ur wareg arem.

³⁶ Roet ec'h eus din skoed da silvidigezh, ha da vadelezh he deus va lakaet da vezañ bras.

³⁷ Frankaet ec'h eus an hent dindan va zreid, va seulioù n'o deus ket brañsellet.

³⁸ Redek a ran war-lerc'h va enebourien hag o distrujan, ne zistroan ket hep o echuiñ.

³⁹ O c'has da get hag o frikañ a ran, ha n'adsavont ken, kouezhañ a reont dindan va zreid.

⁴⁰ Rak va gourizet ec'h eus gant nerzh evit ar brezel, lakaat a rez da blegañ dindanon va enebourien.

⁴¹ Lakaat a rez va enebourien da dreiñ o c'hein dirazon, hag ar re am c'hasa a zistrujan.

⁴² Sellout a reont, met n'eus salver ebet; treiñ a reont etrezek an AOTROU, ha ne respont ket dezho.

⁴³ O frikañ a ran evel poultr an douar, o bruzunañ hag o mac'hañ a ran evel fank ar straedoù.

⁴⁴ Va saveteiñ a rez eus daeloù va fobl, va mirout a rez evit bezañ penn ar broadoù, ur bobl n'anavezen ket a servij ac'hanon.

⁴⁵ Mibien an diavaeziad a luban ac'hanon, adalek ma klev o divskouarn, e sentont ouzhin,

⁴⁶ mibien an diavaeziad a sempl, hag a ya er-maez eus o repu en ur grenañ.

⁴⁷ An AOTROU a zo bev! Benniget ra vo va roc'h! Uhelaet ra vo Doue va silvidigezh,

⁴⁸ an Doue a veñj ac'hanon, a renk ar pobloù dindanon,

⁴⁹ am zenn eus va enebourien, am uhela dreist ar re savet em enep, am dieub eus an den taer.

⁵⁰ Setu perak e veulin ac'hanout e-touez ar broadoù, o AOTROU, hag e kanin meuleudioù da'z anv!

⁵¹ Eñ eo an hini a ro un dieubidigezh veur d'e roue, a ra trugarez d'e Olevad, da Zavid ha d'e lignez da viken.