2 Samuel 21 - Bibl Koad 21: Ar Bibl e Brezhoneg evit ar Vretoned

Pennad 21

¹ Bez' e voe en amzer David un naonegezh a badas tri bloaz lerc'h-ha-lerc'h. David a glaskas dremm an AOTROU, hag an AOTROU a respontas: En abeg da Saül ha d'e di gwadsec'hedik eo, dre m'en deus lakaet d'ar marv tud Gabaon.

² Ar roue a c'halvas ar C'habaoniz evit komz outo. Met ar C'habaoniz ne oant ket eus mibien Israel, un nemorant eus an Amoreaned e oant, ha mibien Israel a oa en em ereet en o c'heñver dre le. Koulskoude Saül a glaskas o lakaat da vervel en abeg d'e c'hred evit mibien Israel ha Juda.

³ David a lavaras d'ar C'habaoniz: Petra a rin evidoc'h? Gant petra e rin an dic'haou, evit ma vennigot hêrezh an AOTROU?

⁴ Ar C'habaoniz a respontas dezhañ: N'eus anv ebet a arc'hant hag a aour gant Saül ha gant e di, ha n'eo ket deomp da lakaat den d'ar marv en Israel. Hag e lavaras: Petra a c'houlennit e rafen evidoc'h?

⁵ Hag e respontjont d'ar roue: Diwar-benn an den-se en deus hon distrujet, hag en deus ijinet hon distrujañ ken na chomje hini ac'hanomp e korn-bro ebet eus Israel,

⁶ ra vo roet deomp seizh den eus e vibien, hag o c'hrougimp dirak an AOTROU war grec'hienn Saül, an hini dibabet gant an AOTROU. Ar roue a lavaras: Me o roio.

⁷ Ar roue a espernas Mefiboshed mab Jonatan, mab Saül, en abeg d'al le o doa graet etrezo dirak an AOTROU, David ha Jonatan mab Saül.

⁸ Met ar roue a gemeras daou vab Rizpa merc'h Aya, he doa ganet da Saül, Armoni ha Mefiboshed, ha pemp mab Mikal merc'h Saül, he doa ganet da Adriel mab Barzilhai eus Mehola.

⁹ Hag e roas anezho etre daouarn ar C'habaoniz, hag e voent krouget ganto war ar menez dirak an AOTROU. Ar seizh-se a voe lazhet a-gevret; lakaet e voent d'ar marv en deizioù kentañ an eost, e penn-kentañ eost an heiz.

¹⁰ Neuze Rizpa merc'h Aya a gemeras ur sac'h a astennas eviti war ar roc'h, abaoe penn-kentañ an eost betek ma kouezhas glav an neñv warno. Ha ne lezas ket laboused an neñv da ehanañ warno war an deiz na loened ar parkeier d'an noz.

¹¹ Lavaret e voe da Zavid ar pezh a rae Rizpa merc'h Aya, serc'h Saül.

¹² David a yeas hag a gemeras eskern Saül hag eskern Jonatan e vab digant tud Jabez Galaad, o doa o c'hemeret eus leur Bet-Shan, e-lec'h m'o doa ar Filistined o divilhet, en deiz m'o doa pilet ar Filistiz Saül e Gilboa.

¹³ Kas a reas gantañ ac'hane eskern Saül hag eskern Jonatan e vab. Hag e voe dastumet ivez eskern ar re a voe bet krouget.

¹⁴ Sebeliet e voent gant eskern Saül ha Jonatan e vab, e bro Benjamin, e Zela, e bez Kish tad Saül. Graet e voe kement en doa gourc'hemennet ar roue. Ha goude-se, Doue a voe sioulaet e-keñver ar vro.

¹⁵ Bez' e voe brezel etre ar Filistined hag Israel. David a ziskennas gant e servijerien, hag e stourmjont a-enep ar Filistined. David a oa gwall-skuizh.

¹⁶ Jishbi-Benob, unan eus mibien Rafa hag en doa ur goaf a boueze tri c'hant sikl arem, a oa gourizet a-nevez hag en doa c'hoant da skeiñ war Zavid.

¹⁷ Met Abishai mab Zeruja a zeuas war sikour David hag a skoas war ar Filistin hag en lazhas. Neuze tud David a douas o lavarout: Ne zeui ken ganeomp d'an emgann, gant aon na vougfes goulaouenn Israel.

¹⁸ Goude-se e voe brezel c'hoazh e Gob a-enep ar Filistined; eno Sibbekai an Hushaiad a lazhas Saf, unan eus mibien Rafa.

¹⁹ Hag e voe brezel c'hoazh e Gob a-enep ar Filistined, hag Elkanan mab Jaare-Oregim eus Betlehem a lazhas Goliad ar Gettiad, a oa koad e c'hoaf evel ur granenn eus ur stern-gwiader.

²⁰ Hag e voe brezel c'hoazh e Gad. Eno en em gavas un den mentet uhel, en doa c'hwec'h biz war e zaouarn ha c'hwec'h biz war e dreid, pevar warn-ugent en holl. Hemañ ivez a oa diskennet eus Rafa.

²¹ An den-mañ a zismegañsas Israel, met Jonatan mab Shimea, breur David, a lazhas anezhañ.

²² Ar pevar-se a oa diskennet eus Rafa, hag e voent lazhet gant dorn David ha gant dorn e servijerien.