2 Samuel 14 - Bibl Koad 21: Ar Bibl e Brezhoneg evit ar Vretoned

Pennad 14

¹ Neuze Joab mab Zeruja, o c'houzout e oa douget kalon ar roue etrezek Absalom,

² a gasas da Dekoa hag a lakaas da zont ac'hane ur vaouez fin bras, hag e lavaras dezhi: Mar plij, en em laka e kañv, gwisk da zilhad kañv, na laka c'hwezh-vad ebet, met bez evel ur vaouez a ouelfe abaoe pell zo war unan marv.

³ Kae da gavout ar roue, ha komz outañ en doare-mañ. Joab a lakaas en he genoù ar c'homzoù he doa da lavarout.

⁴ Maouez Tekoa a gomzas eta ouzh ar roue, hag a gouezhas, he dremm d'an douar, a stouas, hag a lavaras: O roue, ro din sikour!

⁵ Ar roue a lavaras dezhi: Petra ac'h eus? Hag e respontas: Me a zo ur vaouez intañvez, va fried a zo marv.

⁶ Da servijerez he doa daou vab a zo en em gannet er parkeier, ha ne oa den evit o herzel. Unan en deus skoet war egile hag en deus e lazhet.

⁷ Ha setu, an holl diegezh a zo savet a-enep da servijerez en ur lavarout: Ro deomp an hini en deus skoet war e vreur, ma lakaimp anezhañ d'ar marv en abeg da ene e vreur en deus lazhet, hag e tistrujimp ivez an hêr. Hag e fell dezho mougañ ar c'hlaouenn vev a van ganin, evit na chomo gant va fried nag anv na diskennad war an douar.

⁸ Ar roue a lavaras d'ar vaouez: Kae da'z ti, me a roio urzhioù diwar da benn.

⁹ Hag ar vaouez eus Tekoa a lavaras d'ar roue: O roue va aotrou, ra vo warnon an direizhder ha war di va zad, ha ra vo ar roue hag e dron didamall!

¹⁰ Ar roue a respontas: Degas din an hini a gomzo ez enep, ha biken ne stoko ouzhit a-nevez.

¹¹ Hag hi a lavaras: Me az ped m'en devo ar roue soñj eus an AOTROU e Zoue, evit na vo ket kresket gant ar veñjer-gwad an distruj, ha na vo ket lazhet va mab. Hag e respontas: An AOTROU a zo bev! Ne gouezho ket d'an douar ur vlevenn eus da vab.

¹² Ar vaouez a lavaras: Me az ped ma vo lavaret ur ger c'hoazh gant da servijerez d'ar roue va aotrou. Hag e respontas: Komz!

¹³ Ar vaouez a lavaras: Perak ec'h eus soñjet en un dra evel-se a-enep pobl Doue? Rak o lavarout ar c'homzoù-se, en em zisklêr ar roue kablus, pa ne ra ket gervel an hini en deus kaset kuit.

¹⁴ Rak a-dra-sur e varvimp, hag omp heñvel ouzh an doureier a red war an douar ha ne vez ket dastumet. Ha Doue ne lam ket e vuhez digantañ, met fellout a ra dezhañ tremen hep kas pell dioutañ an hini kaset kuit.

¹⁵ Bremañ, mard on deuet da lavarout an traoù-mañ d'ar roue va aotrou, eo ma o deus va spontet ar bobl. Ha da servijerez he deus lavaret: Komz a rin bremañ ouzh ar roue; marteze e raio ar roue ar pezh a lavaro dezhañ e servijerez.

¹⁶ Rak ar roue a selaouo e servijerez evit he dieubiñ eus dorn an hini a fell dezhañ hol lazhañ eus hêrezh Doue, me ha va mab a-gevret.

¹⁷ Ha da servijerez he deus lavaret: Ra roio komz ar roue va aotrou diskuizh deomp; rak ar roue va aotrou a zo evel un ael a-berzh Doue evit anavezout ar mad hag ar fall. Ra vo an AOTROU da Zoue ganit!

¹⁸ Ar roue a respontas hag a lavaras d'ar vaouez: Na guzh ket ouzhin mar plij ar pezh ez an da c'houlenn diganit. Hag ar vaouez a respontas: Ra gomzo ar roue va aotrou.

¹⁹ Ar roue a lavaras: Ha n'eo ket Joab a ra dit ober kement-mañ? Ar vaouez a respontas o lavarout: Da ene a zo bev, o roue va aotrou! N'oufen treiñ nag a-zehou nag a-gleiz eus kement en deus lavaret ar roue va aotrou. Rak da servijer Joab eo en deus roet urzhioù din, hag en deus lakaet e genoù da servijerez an holl gomzoù-mañ.

²⁰ Da servijer Joab eo en deus graet din reiñ an doare-mañ da'm frezeg. Met va aotrou a zo fur evel un ael a-berzh Doue, evit gouzout kement a c'hoarvez er vro.

²¹ Neuze e lavaras ar roue da Joab: Setu bremañ, te eo ec'h eus renet an afer-mañ. Kae eta, ha laka an den yaouank Absalom da zistreiñ.

²² Joab a gouezhas, e zremm d'an douar, a stouas, hag a vennigas ar roue. Hag e lavaras Joab: Hiziv e oar da servijer en deus kavet gras dirazout, o roue va aotrou, rak ar roue en deus graet ar pezh a c'houlenne e servijer digantañ.

²³ Joab a savas eta hag a yeas etrezek Geshur, hag e tegasas Absalom da Jeruzalem.

²⁴ Hag ar roue a lavaras: Ra en em denno d'e di, ha ra chomo hep gwelout va dremm. Hag Absalom en em dennas d'e di hep gwelout dremm ar roue.

²⁵ Ha ne oa den ebet ken kaer hag Absalom en holl Israel, ar pezh a oa brudet bras. Adalek sol e dreid betek lein e benn, e oa dinamm.

²⁶ Pa droc'he e vlev, bep bloaz e troc'he e vlev rak re bounner e oant warnañ, pouez blev e benn a oa daou c'hant sikl, hervez pouez ar roue.

²⁷ Ganet e voe da Absalom tri mab hag ur verc'h, a voe anvet Tamar, hag a oa ur plac'h kaer-meurbet.

²⁸ Absalom a chomas e Jeruzalem daou vloaz leun, hep gwelout dremm ar roue.

²⁹ Hag Absalom a gasas da c'hervel Joab, evit e gas da gavout ar roue, met eñ ne fellas ket dezhañ dont. Gervel a reas anezhañ c'hazh evit an eil gwech, met ne fellas ket dezhañ dont.

³⁰ Neuze e lavaras d'e servijerien: Gwelout a rit park Joab a zo e-kichen va hini. Heiz a zo ennañ; kit ha c'hwezhit an tan ennañ. Ha servijerien Absalom a lakait an tan er park-se.

³¹ Neuze Joab a savas hag a zeuas da gavout Absalom, hag e lavaras dezhañ: Perak o deus da servijerien lakaet an tan em fark?

³² Absalom a respontas da Joab: Setu, kaset em eus da lavarout dit: Deus amañ, ha me az kaso da gavout ar roue evit ma lavari dezhañ: Perak ez on distroet eus Geshur? Gwelloc'h e vefe din bezañ c'hoazh eno. Bremañ eta, ra welin dremm ar roue; ha ma'z eus drougiezh ennon, em lakaio d'ar marv.

³³ Joab a zeuas da gavout ar roue hag a lavaras dezhañ kement-se. Ar roue a c'halvas Absalom, a zeuas da gavout ar roue, hag a stouas e zremm d'an douar dirak ar roue. Hag ar roue a bokas da Absalom.