2 Rouned 7 - Bibl Koad 21: Ar Bibl e Brezhoneg evit ar Vretoned

Pennad 7

¹ Elizea a lavaras: Selaouit komz an AOTROU: Evel-henn e komz an AOTROU: Warc'hoazh d'an eur-mañ, ur sea flour bleud a vo evit ur sikl, ha daou sea heiz evit ur sikl, e-tal dor Samaria.

² An ofiser ma en em harpe ar roue war e zorn, a respontas da zen Doue o lavarout: Pa rafe an AOTROU prenestroù en neñvoù, hag e c'hoarvezo kement-se? Elizea a lavaras: Setu, e welout a ri gant da zaoulagad, met ne zebri ket diouto.

³ Bez' e oa ouzh dor kêr pevar den lovr, a lavarjont an eil d'egile: Perak e chomfemp amañ betek ma varvimp?

⁴ Mar lavaromp: Deomp e kêr, an naonegezh a zo e kêr hag e varvimp eno. Mar chomomp amañ, e varvimp ivez. Deuit eta hag e ruzimp e kamp ar Siriz. Mar hol lezont da vevañ, e vevimp, ha mar hol lakaont d'ar marv, e varvimp.

⁵ E deroù an noz e savjont evit mont da gamp ar Siriz, hag e teujont betek penn kamp ar Siriz, ha setu, ne oa den eno.

⁶ Rak an AOTROU en doa lakaet da glevout e kamp ar Siriz un trouz kirri hag un trouz kezeg, trouz un arme vras, e doare m'o deus lavaret an eil d'egile: Setu, roue Israel en deus paeet rouaned an Hitited ha rouaned an Ejipsianed da zont a-enep deomp.

⁷ Hag e oant savet ha tec'het kuit e deroù an noz, hag o doa lezet o zeltennoù, o c'hezeg, o ezen, hag ar c'hamp evel ma oa, hag e oant tec'het kuit evit saveteiñ o buhez.

⁸ Al lovreien-mañ a zeuas eta da benn ar c'hamp, a yeas en un deltenn, a zebras, a evas, a gemeras arc'hant, aour ha dilhad, hag a yeas d'o c'huzhat. Goude-se e teujont adarre hag ez ejont d'un deltenn all, hag eno ivez e kemerjont traoù, hag ez ejont d'o c'huzhat.

⁹ Neuze e lavarjont an eil d'egile: Ne reomp ket brav. An deiz-mañ a zo un deiz a geloù mat, hag e chomomp dilavar! Mar gortozomp betek ma vo deuet an deiz, an direizhder hon tapo. Deuit bremañ, deomp da zisklêriañ ar c'heloù-se da di ar roue.

¹⁰ Mont a rejont eta hag e c'halvjont porzhierien kêr evit disklêriañ ar c'heloù-se dezho o lavarout: Aet omp da gamp ar Siriz, ha setu, ne oa den eno na mouezh den e-barzh. N'eus nemet kezeg hag ezen stag, hag an teltennoù evel ma oant.

¹¹ Neuze ar borzhierien a grias hag a zisklêrias ar c'heloù-se da di ar roue en diabarzh.

¹² Ar roue a savas en noz hag a lavaras d'e servijerien: Setu ar pezh o deus graet ar Siriz deomp: gouzout a reont ez omp marnaoniet, hag ez int aet kuit eus ar c'hamp da guzhat er maezioù en ur lavarout: Pa vint deuet er-maez eus kêr, e tapimp anezho bev hag ez aimp e kêr.

¹³ Unan eus e servijerien a lavaras: Ra vo kemeret pemp eus ar c'hezeg a zo manet a nemorant, setu emaint evel holl engroez Israel a zo manet, ya evel holl engroez Israel a zo bet kuzumet. Kasomp da welout.

¹⁴ Kemer a rejont eta daou garr gant o c'hezeg, hag ar roue a gasas anezho war-lerc'h arme ar Siriz, hag a lavaras dezho: Kit ha gwelit.

¹⁵ Mont a rejont war o lerc'h betek ar Jordan, ha setu, an holl hent a oa goloet a zilhad hag a draoù o doa taolet kuit ar Siriz en o buander. Hag ar gannaded a zistroas da zisklêriañ ar c'heloù-se d'ar roue.

¹⁶ Neuze ar bobl a yeas er-maez hag a breizhas kamp ar Siriz, e doare ma voe ur sea flour bleud evit ur sikl ha daou sea heiz evit ur sikl, hervez komz an AOTROU.

¹⁷ Ar roue en doa lakaet an ofiser ma en em harpe war e zorn da ziwall an nor. Ar bobl a frikas anezhañ e-tal an nor, hag e varvas, evel m'en doa lavaret den Doue, pa gomze ouzh ar roue a oa diskennet d'e gavout.

¹⁸ P'en doa komzet den Doue ouzh ar roue o lavarout: Warc'hoazh d'an eur-mañ, daou sea heiz a vo evit ur sikl, hag ur sea flour bleud evit ur sikl, e-tal dor Samaria,

¹⁹ an ofiser en doa respontet da zen Doue o lavarout: Pa rafe an AOTROU prenestroù en neñvoù, hag e c'hoarvezo kement-se? Hag Elizea en doa lavaret: Setu, e welout a ri gant da zaoulagad, met ne zebri ket diouto.

²⁰ Evel-se e c'hoarvezas gantañ: ar bobl a frikas anezhañ e-tal an nor, hag e varvas.