2 Rouned 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Naaman, penn arme roue Siria, a oa un den a-bouez hag enoret e-kichen e aotrou, rak an AOTROU en doa dieubet ar Siriz drezañ. Met an den kadarn ha kalonek-mañ a oa un den lovr.

² Hogen ur bagad a oa aet er-maez eus Siria, ha degaset o doa ur brizoniadez eus bro Israel, ur plac'h vihan, a oa e servij gwreg Naaman.

³ Lavarout a reas d'he mestrez: Mar befe va aotrou dirak ar profed a zo e Samaria, e parefe anezhañ raktal eus e lorgnez!

⁴ Hag ez eas eta d'e zisklêriañ d'an aotrou o lavarout: Ar plac'h yaouank eus bro Israel he deus lavaret evel-henn hag evel-hont.

⁵ Roue Siria a lavaras: Kae! Kae hag e kasin ul lizher da roue Israel. Hag ez eas, en ur gemer en e zorn dek talant arc'hant, c'hwec'h mil pezh aour ha dek dilhad nevez.

⁶ Hag e teuas da gavout roue Israel gant al lizher, e-lec'h ma oa lavaret: Bremañ, pa en em gavo al lizher-mañ ganit, e ouezi em eus kaset dit Naaman va servijer, evit ma yac'hai anezhañ eus e lorgnez.

⁷ Adalek ma lennas roue Israel al lizher, e rogas e zilhad hag e lavaras: Hag ez on Doue evit ober mervel pe vevañ, evit ma tegas hemañ etrezek ennon da yac'haat un den eus e lorgnez? Dre-se, gouezit ha gwelit ne glask nemet un digarez a-enep din.

⁸ Pa ouezas Elizea den Doue, en doa roget roue Israel e zilhad, e kasas da lavarout d'ar roue: Perak ec'h eus roget da zilhad? Ra zeuio bremañ da'm c'havout, hag e ouezo ez eus ur profed en Israel.

⁹ Naaman a zeuas eta gant e gezeg hag e garr, hag en em zalc'has ouzh dor ti Elizea.

¹⁰ Elizea a gasas ur c'hannad da lavarout dezhañ: Kae, en em walc'h seizh gwech er Jordan, ha da gig a zistroio dit hag e vi glan.

¹¹ Naaman a fuloras, hag ez eas kuit en ur lavarout: Setu e soñje ennon va-unan: Dont a raio etrezek ennon, en em zerc'hel a raio aze, gervel a raio anv an AOTROU e Zoue, astenn a raio e zorn war ar gouli, hag e pareo al lovreg.

¹² Ha n'eo ket gwelloc'h stêrioù Damask, an Abana hag ar Parpar, eget holl zoureier Israel? Ha ne c'hellfen en em walc'hiñ enno ha dont da vezañ glan? Evel-se e tistroe, ha droug bras ennañ.

¹³ Met e servijerien a dostaas hag a lavaras dezhañ: Va zad, mar en defe ar profed lavaret dit un dra diaes, na'z pefe ket graet? Pegement muioc'h pa lavar dit: En em walc'h hag e vi glan.

¹⁴ Neuze e tiskennas hag en em soubas seizh gwech er Jordan, hervez komz den Doue, hag e gig a zistroas dezhañ heñvel ouzh kig ur bugel bihan, hag e voe glan.

¹⁵ Neuze e tistroas da gavout den Doue, gant an holl re a oa gantañ, hag en em zalc'has dirazañ hag e lavaras: Setu ec'h ouzon bremañ n'eus Doue ebet war an douar holl, nemet en Israel. Bremañ mar plij ganit, degemer un donezon a-berzh da servijer.

¹⁶ Elizea a respontas: An AOTROU en em zalc'han dirazañ a zo bev! Ne gemerin netra. Naaman a zalc'has anezhañ da gemer, met ne fellas ket dezhañ.

¹⁷ Naaman a lavaras: Da bediñ a ran, ra vo roet eus an douar-mañ da'z servijer, ur samm evit daou vul. Da servijer ne raio ken loskaberzh nag aberzh da zoueoù all, nemet d'an AOTROU.

¹⁸ Ra fello d'an AOTROU pardoniñ kement-mañ da'z servijer: pa'z aio va mestr da di Rimmon evit stouiñ eno, ha ma en em harpo war va dorn, me a stouo e ti Rimmon. Ra fello d'an AOTROU pardoniñ da'z servijer, pa stouin e ti Rimmon.

¹⁹ Elizea a lavaras dezhañ: Kae e peoc'h! Naaman a yeas kuit hag a reas ur pennad hent.

²⁰ Neuze Gehazi, servijer Elizea den Doue, a lavaras: Setu, va mestr en deus espernet Naaman ar Siriad, ha n'en deus ket degemeret eus e zorn ar pezh en doa degaset. An AOTROU a zo bev! Me a redo war e lerc'h, hag em bo un dra bennak digantañ.

²¹ Gehazi a redas war-lerc'h Naaman. Naaman, o welout e rede war e lerc'h, a ziskennas diwar e garr d'e gavout hag a lavaras: Mont a ra mat pep tra?

²² Hag e respontas: Mont a ra mat pep tra! Va mestr am c'has da lavarout dit: Setu, deuet eo en eur-mañ, eus menez Efraim, daou zen yaouank a-douez mibien ar brofeded. Ro dezho, mar plij, un talant arc'hant ha daou zilhad nevez.

²³ Naaman a lavaras: Plij ganit kemer daou dalant. Hag e talc'has anezhañ da gemer, hag e lakaas daou dalant arc'hant e daou sac'h, gant daou zilhad nevez. Hag e roas anezho da zaou servijer, d'o dougen dirak Gehazi.

²⁴ Pa voe deuet d'ar grec'hienn, o c'hemeras eus o daouarn hag o lakaas en ti. Goude e kasas an dud-se a zistroas.

²⁵ Hag e teuas d'en em zerc'hel dirak e vestr. Elizea a lavaras: A-belec'h e teuez, Gehazi? Hag e respontas: Da servijer n'eo aet nag amañ nag aze.

²⁶ Met lavarout a reas dezhañ: Va c'halon, ha ne oa ket aet aze, el lec'h ma tiskennas an den-se diwar e garr da'z kavout? Hag emañ an amzer da gemer arc'hant, da gemer dilhad, gwez-olivez, gwini, deñved, ejened, servijerien ha servijerezed?

²⁷ Lorgnez Naaman a stago ouzhit hag ouzh da lignez da viken. Gehazi a yeas kuit a-zirazañ, gwenn gant al lorgnez evel erc'h.