2 Rouned 25 - Bibl Koad 21: Ar Bibl e Brezhoneg evit ar Vretoned

Pennad 25

¹ D'an navet bloaz eus e ren, d'an dekvet miz, d'an dekvet eus ar miz, e teuas Nebukadnezar roue Babilon gant e holl arme a-enep Jeruzalem, hag e kampjont a-enep dezhi, hag e savjont tosennoù en-dro dezhi.

² Ha kêr a voe sezizet betek an unnekvet bloaz eus ar roue Sedesia.

³ D'an navet deiz eus ar pevare miz, e voe rust an naonegezh e kêr, ha ne oa ken a vara enni evit pobl ar vro.

⁴ Neuze un toull-freuz a voe graet da gêr, hag an holl dud a vrezel a dec'has da noz dre hent an nor etre an div voger e-kichen liorzh ar roue, e-pad ma oa ar Galdeiz en-dro da gêr, hag ez ejont etrezek ar blaenenn.

⁵ Met arme ar Galdeiz a redas war-lerc'h ar roue hag e tapjont anezhañ e plaenennoù Jeriko. Hag e holl arme a stlabezas pell digantañ.

⁶ Kemer a rejont eta ar roue, hag e lakajont anezhañ da bignat etrezek roue Babilon e Ribla, e-lec'h ma voe barnet.

⁷ Mibien Sedesia a voe lazhet dirak e zaoulagad. Neuze e voe toullet e zaoulagad da Sedesia, hag e voe ereet gant chadennoù arem, ha kaset da Vabilon.

⁸ D'ar seizh eus ar pempvet miz, en naontekvet bloaz eus Nebukadnezar roue Babilon, Nebuzaradan penn ar warded ha servijer roue Babilon a zeuas e-barzh Jeruzalem.

⁹ Deviñ a reas ti an AOTROU, ti ar roue hag holl diez Jeruzalem. An holl diez bras a voe devet dre an tan.

¹⁰ Hag holl arme ar Galdeiz, a oa gant penn ar warded, a ziskaras ar mogerioù a oa en-dro da Jeruzalem.

¹¹ Nebuzaradan penn ar warded a harluas an nemorant eus an dud a oa chomet e kêr, ar re a oa en em rentet da roue Babilon, hag an nemorant eus an engroez.

¹² Koulskoude penn ar warded a lezas hiniennoù a-douez ar re baourañ eus ar vro, evel gwinierien ha labourerien-douar.

¹³ Hag ar Galdeiz a lakaas a-dammoù ar c'holonennoù arem a oa e ti an AOTROU, ar sichennoù hag ar mor arem a oa e ti an AOTROU, hag e kasjont an holl arem ganto da Vabilon.

¹⁴ Kemer a rejont ivez ar c'haoterioù, ar palioù, ar mougerigoù, al loaioù, hag an holl listri arem implijet evit ar servij.

¹⁵ Penn ar warded a gasas ivez gantañ an ezañsoueroù, an hanafoù, ar pezh a oa en aour hag ar pezh a oa en arc'hant.

¹⁶ Diwar-benn an div golonenn, ar mor hag ar sichennoù, en doa graet ar roue Salomon evit ti an AOTROU, ne oa ket anavezet pouez arem an holl draoù-se.

¹⁷ Diwar-benn ar c'holonennoù, uhelder pep kolonenn a oa triwec'h ilinad. Bez' e oa dreist un dogenn arem. Uhelder an dogenn a oa pemp ilinad, war an dogenn e oa ur roued ha greunadez tro-dro, holl en arem. An eil kolonenn gant he roued a oa heñvel.

¹⁸ Penn ar warded a gemeras an aberzhour-meur Seraja, an eil-aberzhour Sofonia, ha tri diwaller an treuzoù.

¹⁹ Hag eus kêr e kemeras ur spazhad a oa karget eus an dud a vrezel, ha pemp den eus ar re a wele dremm ar roue hag en em gave e kêr, ha penn-skrib an arme a engouestle pobl ar vro, ha tri-ugent den a-douez pobl ar vro en em gave e kêr.

²⁰ Nebuzaradan penn ar warded a dapas anezho hag o c'hasas da roue Babilon da Ribla.

²¹ Roue Babilon a skoas warno hag o lazhas e Ribla, e bro Hamad. Evel-se Juda a voe kaset er-maez eus e vro.

²² Diwar-benn ar bobl a oa manet e bro Juda, bet lezet eno gant Nebukadnezar roue Babilon, roet e voe dezho evit gouarnour Gedalia mab Ahikam mab Shafan.

²³ Holl bennoù an dud a vrezel hag o zud a glevas en doa roue Babilon lakaet Gedalia mab Ahikam da c'houarnour. Neuze e teujont da gavout Gedalia e Mizpa: Ismael mab Netania, Johanan mab Kareak, Seraja mab Tanumed an Netofatad, Jaazania mab ur Maakatian, int hag o zud.

²⁴ Gedalia a douas dezho ha d'o zud, o lavarout: N'ho pet ket aon da vezañ servijerien ar Galdeiz, chomit er vro ha servijit roue Babilon, hag ez aio mat an traoù ganeoc'h.

²⁵ D'ar seizhvet miz, Ismael mab Netania mab Elishama, a lignez roueel, ha dek den gantañ, a zeuas hag a skoas d'ar marv war C'hedalia, hag e lazhjont ivez ar Yuzevien hag ar Galdeiz a oa gantañ e Mizpa.

²⁶ Neuze an holl bobl, adalek ar bihanañ betek ar brasañ, ha pennoù ar strolladoù, a savas hag a yeas d'an Ejipt, dre m'o doa aon rak ar Galdeiz.

²⁷ D'ar seizhvet bloaz ha tregont eus harlu Jojakin roue Juda, d'an daouzekvet miz, d'ar seizhvet warn-ugent eus ar miz, Evilmerodak roue Babilon, er bloaz ma teuas da roue, a adsavas penn Jojakin roue Juda, hag a dennas anezhañ eus an toull-bac'h.

²⁸ Komz a reas outañ gant madelezh, hag e lakaas e dron a-us da dron ar rouaned a oa gantañ e Babilon.

²⁹ Goude ma voe cheñchet e zilhad prizonier dezhañ, e tebras dalc'hmat dirazañ e-pad holl amzer e vuhez.

³⁰ Peadra e vuhez pemdeziek a voe roet dezhañ a-berzh ar roue, bemdez, e-pad holl amzer e vuhez.