2 Rouned 22 - Bibl Koad 21: Ar Bibl e Brezhoneg evit ar Vretoned

Pennad 22

¹ Eizh vloaz e oa Jozia pa zeuas da roue, hag e renas ur bloaz ha tregont e Jeruzalem. E vamm a oa anvet Jedida merc'h Adaja, eus Bozkad.

² Ober a reas ar pezh a zo reizh dirak daoulagad an AOTROU, o kerzhout war holl hentoù David e dad, hep distreiñ nag a-zehou nag a-gleiz.

³ D'an triwec'hvet bloaz eus ar roue Jozia, ar roue a gasas Shafan mab Azalia mab Meshullam, ar skrib, da di an AOTROU, en ur lavarout:

⁴ Pign da gavout Hilkija an aberzhour-meur, ra gonto an arc'hant bet degaset e ti an AOTROU, hag a oa bet dastumet gant diwallerien an treuzoù digant ar bobl.

⁵ Lakaet e vo etre daouarn ar re o deus ar garg eus al labour hag a evesha ti an AOTROU. Hag int a roio anezhañ d'ar re o deus ar garg eus al labour a zo graet e ti an AOTROU, evit adaozañ ha dresañ an ti,

⁶ d'ar gilvizien, d'ar saverien ha d'ar vañsonerien, evit prenañ koad ha mein-ben, a-benn dresañ an ti.

⁷ Ra ne vo ket goulennet kontoù diganto evit an arc'hant a vo lakaet en o daouarn, rak labourat a reont gant lealded.

⁸ Neuze Hilkija an aberzhour-meur a lavaras da Shafan ar skrib: Kavet em eus levr al lezenn e ti an AOTROU! Hag Hilkija a roas al levr da Shafan, hag hemañ a lennas anezhañ.

⁹ Shafan ar skrib a zeuas da gavout ar roue, hag e tisklêrias an traoù-mañ d'ar roue o lavarout: Da servijerien o deus roet an arc'hant a zo bet kavet en ti, ha lakaet o deus anezhañ etre daouarn ar re o deus ar garg eus al labour hag a evesha ti an AOTROU.

¹⁰ Ar skrib Shafan a lavaras ivez d'ar roue: An aberzhour Hilkija en deus roet din ul levr. Ha Shafan a lennas ennañ dirak ar roue.

¹¹ Hag adal ma klevas ar roue komzoù al lezenn, e rogas e zilhad,

¹² hag e roas an urzh-mañ d'an aberzhour Hilkija, da Ahikam mab Shafan, da Akbor mab Mikaja, da Shafan ar skrib, ha da Asaja servijer ar roue, o lavarout:

¹³ Kit, goulennatait an AOTROU evidon, evit ar bobl hag evit Juda a-bezh, diwar-benn komzoù al levr a zo bet kavet. Rak bras eo kounnar an AOTROU a zo entanet a-enep deomp, dre ma n'o deus ket sentet hon tadoù ouzh komzoù al levr-mañ, evit ober hervez kement a zo skrivet evidomp.

¹⁴ Hilkija an aberzhour, Ahikam, Akbor, Shafan hag Asaja a yeas da gavout Hulda ar brofedez, gwreg Shallum mab Tikva mab Harhaz, diwaller an dilhad. Hi a oa e chom e Jeruzalem, en eil karter. Hag e komzjont outi.

¹⁵ Homañ a lavaras dezho: Evel-henn e komz an AOTROU Doue Israel: Lavarit d'an den en deus ho kaset davedon:

¹⁶ Evel-henn e komz an AOTROU: Setu ez an da gas ur gwalleur war al lec'h-mañ ha war e dud, kement a zo lavaret el levr en deus lennet roue Juda.

¹⁷ Dre m'o deus va dilezet ha m'o deus lakaet da vogediñ da zoueoù all, evit va c'hounnariñ gant holl oberoù o daouarn, va fulor a zo entanet a-enep al lec'h-mañ, ha ne vo ket mouget.

¹⁸ Ha diwar-benn roue Juda en deus kaset ac'hanoc'h da c'houlennata an AOTROU, e lavarot dezhañ: Evel-henn e komz an AOTROU Doue Israel diwar-benn ar c'homzoù ach eus klevet:

¹⁹ Dre ma'z eo bet tener da galon, ma ec'h eus en em izelaet dirak an AOTROU pa ec'h eus klevet ar pezh am eus disklêriet a-enep al lec'h-mañ hag a-enep e dud a vo glac'haret ha milliget, dre ma ec'h eus roget da zilhad, ha ma ec'h eus gouelet dirazon, me ivez am eus klevet, eme an AOTROU.

²⁰ Setu perak ez an da zastum ac'hanout gant da dadoù, hag e vi dastumet e peoc'h ez pez, ha da zaoulagad ne welint ket an holl zroug ez an da lakaat da vont war al lec'h-mañ. Hag e tegasjont ar gomz-se d'ar roue.