2 Rouned 15 - Bibl Koad 21: Ar Bibl e Brezhoneg evit ar Vretoned

Pennad 15

¹ Er seizhvet bloaz warn-ugent eus Jeroboam roue Israel, e teuas Azaria mab Amazia da roue war Juda.

² C'hwezek vloaz e oa pa zeuas da roue, hag e renas daou vloaz hag hanter-kant e Jeruzalem. E vamm a oa anvet Jekolia eus Jeruzalem.

³ Ober a reas ar pezh a zo reizh dirak daoulagad an AOTROU, a-grenn evel m'en doa graet Amazia e dad.

⁴ Met an uhellec'hioù ne voent ket lamet kuit. Ar bobl a aberzhe c'hoazh hag a lakae da vogediñ war an uhellec'hioù.

⁵ Met an AOTROU a skoas war ar roue a voe lovr betek deiz e varv, hag e chomas en un ti en distro. Ha Jotam mab ar roue a voe e penn ti ar roue, hag e varne pobl ar vro.

⁶ Diwar-benn nemorant oberoù Azaria ha kement a reas, kement-se ha n'eo ket skrivet e levr danevelloù rouaned Juda?

⁷ Azaria a c'hourvezas gant e dadoù, hag e voe sebeliet gant e dadoù e kêr David. Ha Jotam e vab a renas en e lec'h.

⁸ En eizhvet bloaz ha tregont eus Azaria roue Juda, e teuas Zakaria mab Jeroboam da roue war Israel e Samaria, evit c'hwec'h miz.

⁹ Ober a reas ar pezh a zo fall dirak daoulagad an AOTROU, evel m'o doa graet e dadoù, ne zistroas ket diouzh holl bec'hedoù Jeroboam mab Nebad, en doa lakaet Israel da bec'hiñ drezo.

¹⁰ Ha Shallum mab Jabez a iriennas a-enep dezhañ, a skoas warnañ dirak ar bobl, hag a lazhas anezhañ. Hag e teuas da roue en e lec'h.

¹¹ Diwar-benn nemorant oberoù Zakaria, kement-se a zo skrivet e levr danevelloù rouaned Israel.

¹² Honnezh eo ar gomz en doa disklêriet an AOTROU da Jehu o lavarout: Da vibien a vo azezet war dron Israel betek ar pevare rumm. Evel-se e voe.

¹³ Shallum mab Jabez a zeuas da roue en navet bloaz ha tregont eus Ozia roue Juda, hag e renas ur miz e Samaria.

¹⁴ Ha Menahem mab Gadi a bignas eus Tirza, a yeas e Samaria, a skoas war Shallum mab Jabez e Samaria, hag a lazhas anezhañ. Hag e teuas da roue en e lec'h.

¹⁵ Diwar-benn nemorant oberoù Shallum hag an irienn a reas, kement-se a zo skrivet e levr danevelloù rouaned Israel.

¹⁶ Neuze Menahem a skoas war Difsak ha war an holl re a oa gantañ, ha war e vro adalek Tirza. Dre ma n'he doa ket digoret he dorioù dezhañ, e skoas warni. Ha faoutañ a reas o c'hofoù d'hec'h holl zougerezed.

¹⁷ En navet bloaz eus Azaria roue Juda, e teuas Menahem mab Gadi da roue war Israel, evit dek vloaz e Samaria.

¹⁸ Ober a reas ar pezh a zo fall dirak daoulagad an AOTROU, ne zistroas ket, e-pad e holl zeizioù, diouzh pec'hedoù Jeroboam mab Nebad, en doa lakaet Israel da bec'hiñ drezo.

¹⁹ Pul roue Asiria a zeuas a-enep ar vro. Menahem a roas mil talant arc'hant da Bul, evit ma sikourje anezhañ da startaat ar rouantelezh etre e zaouarn.

²⁰ Menahem a dennas an arc'hant-se diwar Israel, digant an holl re a oa galloudek e pinvidigezhioù, evit reiñ da roue Asiria: digant pep hini hanter-kant sikl arc'hant. Evel-se roue Asiria a zistroas, ha ne chomas ket eno er vro.

²¹ Diwar-benn nemorant oberoù Menahem ha kement a reas, kement-se ha n'eo ket skrivet e levr danevelloù rouaned Israel?

²² Menahem a c'hourvezas gant e dadoù. Ha Pekakia e vab a renas en e lec'h.

²³ En hanterkantvet bloaz eus Azaria roue Juda, e teuas Pekakia da roue war Israel e Samaria, evit daou vloaz.

²⁴ Ober a reas ar pezh a zo fall dirak daoulagad an AOTROU, ne zistroas ket diouzh pec'hedoù Jeroboam mab Nebad, en doa lakaet Israel da bec'hiñ drezo.

²⁵ Ha Pekak mab Remalia, e ofiser, a iriennas a-enep dezhañ hag a skoas warnañ e Samaria, e palez ti ar roue, gant Argob hag Arie, hag hanter-kant den gantañ a-douez mibien ar C'halaadiz. Evel-se e lazhas anezhañ hag e renas en e lec'h.

²⁶ Diwar-benn nemorant oberoù Pekakia ha kement a reas, kement-se a zo skrivet e levr danevelloù rouaned Israel.

²⁷ En eilvet bloaz hag hanter-kant eus Azaria roue Juda, e teuas Pekak mab Remalia da roue war Israel e Samaria, evit ugent vloaz.

²⁸ Ober a reas ar pezh a zo fall dirak daoulagad an AOTROU, ne zistroas ket diouzh pec'hedoù Jeroboam mab Nebad, en doa lakaet Israel da bec'hiñ drezo.

²⁹ En amzer Pekak roue Israel, Tiglad-Pilezer roue Asiria a zeuas hag a dapas Ijon, Abel-Bed-Maaka, Janoak, Kedesh, Hazor, Galaad, ar Galilea, hag holl vro Neftali, hag e harluas ar bobl da Asiria.

³⁰ Hag Ozea mab Ela a iriennas a-enep Pekak mab Remalia, a skoas warnañ, hag en lazhas. Dont a reas da roue en e lec'h en ugentvet bloaz eus Jotam mab Ozia.

³¹ Diwar-benn nemorant oberoù Pekak ha kement a reas, kement-se a zo skrivet e levr danevelloù rouaned Israel.

³² En eilvet bloaz eus Pekak mab Remalia roue Israel, e teuas da roue Jotam mab Ozia roue Juda.

³³ Pemp bloaz warn-ugent e oa pa zeuas da roue, hag e renas c'hwezek vloaz e Jeruzalem. E vamm a oa anvet Jerusha merc'h Zadok.

³⁴ Ober a reas ar pezh a zo reizh dirak daoulagad an AOTROU, a-grenn evel m'en doa graet Ozia e dad.

³⁵ Met an uhellec'hioù ne voent ket lamet kuit. Ar bobl a aberzhe c'hoazh hag a lakae da vogediñ war an uhellec'hioù. Eñ eo an hini a savas an nor Uhelañ e ti an AOTROU.

³⁶ Diwar-benn nemorant oberoù Jotam ha kement a reas, kement-se ha n'eo ket skrivet e levr danevelloù rouaned Juda?

³⁷ En deizioù-se e krogas an AOTROU da gas a-enep Juda Rezin roue Siria ha Pekak mab Remalia.

³⁸ Jotam a c'hourvezas gant e dadoù, hag e voe sebeliet gant e dadoù e kêr David. Hag Akaz e vab a renas en e lec'h.