2 Rouned 12 - Bibl Koad 21: Ar Bibl e Brezhoneg evit ar Vretoned

Pennad 12

¹ Er seizhvet bloaz eus Jehu, e teuas Joaz da roue, hag e renas daou-ugent vloaz e Jeruzalem. E vamm a oa anvet Zibia eus Beer-Sheba.

² Joaz a reas ar pezh a zo reizh dirak daoulagad an AOTROU, e-pad holl vuhez an aberzhour Jehojada, a gelenne anezhañ.

³ Met an uhellec'hioù ne voent ket lamet kuit. Ar bobl a aberzhe c'hoazh hag a lakae da vogediñ war an uhellec'hioù.

⁴ Joaz a lavaras d'an aberzhourien: An holl arc'hant santel a vez degaset da di an AOTROU, an arc'hant a bep den a dremen, an arc'hant a zle pep hini hervez ar prizadur bet graet, hag an arc'hant a zegas pep hini a-youl-vat e ti an AOTROU,

⁵ ra gemero an aberzhourien anezhañ, pep hini digant a re a anavez, evit dresañ toulloù-freuz an ti, e pep lec'h ma vo kavet toulloù-freuz.

⁶ Met e c'hoarvezout a reas d'an trede bloaz warn-ugent eus ar roue Joaz, ma n'o doa ket dreset an aberzhourien toulloù-freuz an ti.

⁷ Neuze ar roue Joaz a c'halvas an aberzhour Jehojada hag an aberzhourien all, hag a lavaras dezho: Perak n'hoc'h eus ket dreset toulloù-freuz an ti? Bremañ eta ne gemerot ken arc'hant digant ar re a anavezit, met e roiot anezhañ evit toulloù-freuz an ti.

⁸ An aberzhourien a asantas tremen hep kemer arc'hant ar bobl, ha chom hep bezañ karget da dresañ toulloù-freuz an ti.

⁹ An aberzhour Jehojada a gemeras ur c'hef hag a reas un toull er golo, hag e lakaas anezhañ e-kichen an aoter, en tu dehou pa'z aed e-barzh ti an AOTROU. An aberzhourien a ziwalle an treuzoù a lakae ennañ an holl arc'hant a veze degaset e ti an AOTROU.

¹⁰ Pa welent e oa kalz a arc'hant er c'hef, skrib ar roue a bigne gant an aberzhour-meur, hag e tastument hag e niverent an arc'hant en em gave e ti an AOTROU.

¹¹ Hag e lakaent an arc'hant-se, niveret mat, etre daouarn ar re a oa karget eus al labour, ar re a c'hourselle ti an AOTROU. Hag e paeent ar gilvizien hag ar saverien a laboure e ti an AOTROU,

¹² ar vañsonerien hag ar venerien, ar prenadennoù koad ha mein-ben evit dresañ toulloù-freuz ti an AOTROU, ha kement dispign evit dresañ an ti.

¹³ Eus an arc'hant-se a veze degaset da di an AOTROU, ne voe ket graet kirinoù arc'hant evit ti an AOTROU, na mougerigoù, na hanafoù, na trompilhoù, na listri en aour, na listri en arc'hant,

¹⁴ met roet e oa d'ar re a oa karget eus al labour, d'ar re a zrese ti an AOTROU.

¹⁵ Ne veze ket graet kont d'ar re a zegemere an arc'hant-se etre o daouarn evit e lodennañ d'ar vicherourien, rak gant reizhder e labourent.

¹⁶ Arc'hant an aberzhoù a gablusted hag arc'hant an aberzhoù-dic'haouiñ ne veze ket degaset da di an AOTROU, rak evit an aberzhourien e oa.

¹⁷ Neuze Hazael roue Siria a bignas hag a reas brezel a-enep Gad, hag he zapas. Hag Hazael a zroas evit pignat a-enep Jeruzalem.

¹⁸ Joaz roue Juda a gemeras an holl draoù santelaet, ar pezh en doa santelaet Jozafad, Joram hag Akazia, e dadoù rouaned Juda, hag an traoù en doa santelaet e-unan, an holl aour en em gave e teñzorioù ti an AOTROU ha ti ar roue, hag e kasas anezho da Hazael roue Siria, en em dennas eus Jeruzalem.

¹⁹ Diwar-benn nemorant oberoù Joaz ha kement a reas, kement-se ha n'eo ket skrivet e levr danevelloù rouaned Juda?

²⁰ E servijerien, o vezañ en em savet, a rejont un irienn hag a skojont war Joaz e ti Milho, e traonienn Silla.

²¹ Jozakar mab Shimead ha Jozabad mab Shomer, e servijerien, a skoas warnañ, hag e varvas. Hag e voe sebeliet gant e dadoù e kêr David. Hag Amazia e vab a renas en e lec'h.