2 Pêr 1 - Bibl Koad 21: Ar Bibl e Brezhoneg evit ar Vretoned

Pennad 1

¹ Simon-Pêr, servijer hag abostol Jezuz-Krist, d’ar re o deus resevet da lod ur feiz ken prizius hag hon hini, dre reizhder hon Doue ha Salver Jezuz-Krist:

² Ra vo kresket ar c’hras hag ar peoc’h ennoc’h dre anaoudegezh Doue hag hon Aotrou Jezuz!

E c’halloud doueel en deus roet deomp kement a sell ouzh ar vuhez

³ E c’halloud doueel en deus roet deomp kement a sell ouzh ar vuhez hag ouzh doujañs-Doue, dre anaoudegezh an hini en deus hor galvet dre e c’hloar hag e vertuz.

⁴ Dre ar re-mañ, en deus roet deomp promesaoù bras-meurbet ha prizius, evit ma teuot drezo da gemer perzh en natur doueel, o tec’hout diouzh ar breinadur a zo er bed dre an droukc’hoant.

⁵ E kement-se eta, degasit hoc’h holl aked evit unaniñ asambles gant ho feiz ar vertuz, gant ar vertuz ar c’houiziegezh,

⁶ gant ar c’houiziegezh an emvestroni, gant an emvestroni ar basianted, gant ar basianted an doujañs-Doue,

⁷ gant an doujañs-Doue ar vadelezh a vreur, gant ar vadelezh a vreur ar garantez.

⁸ Rak ma en em gav an traoù-se ennoc’h ha mar fonnont, ne lezint ac’hanoc’h na didalvez na difrouezh en anaoudegezh hon Aotrou Jezuz-Krist.

⁹ Met an hini n’emañ ket an traoù-se ennañ a zo dall, e weled a zo berr, hag ankounac’haet en deus glanidigezh e bec’hedoù tremenet.

¹⁰ Rak-se, breudeur, bezit muioc’h-muiañ aketus da greñvaat ho kalvedigezh hag ho tibaberezh, rak oc’h ober kement-se ne strebotot biken,

¹¹ hag evel-se e vo roet deoc’h gant largentez un donedigezh vat e rouantelezh peurbadus hon Aotrou ha Salver Jezuz-Krist.

Testoù diwar wel eus splannder Krist

¹² Setu perak ne vankin ket da zegas deoc’h dalc’hmat an traoù-se da soñj, petra bennak ma o anavezit ha ma’z oc’h kreñvaet er wirionez-se.

¹³ Krediñ a ran ez eo reizh din, keit ha ma vin en tabernakl-mañ, derc’hel ac’hanoc’h dihun dre alioù,

¹⁴ o c’houzout penaos e kuitain prest va zabernakl, evel ma en deus an Aotrou Jezuz-Krist roet din da anavezout.

¹⁵ Met preder am bo d’ober ar pezh a zo ret evit ma c’hellot atav kaout soñj eus an traoù-se goude ma vin aet kuit.

¹⁶ Rak n’eo ket oc’h heuliañ mojennoù savet gant ampartiz hon eus roet deoc’h da anavezout galloud ha donedigezh hon Aotrou Jezuz-Krist, met goude bezañ gwelet e splannder gant hon daoulagad hon-unan.

¹⁷ Rak resevet en deus digant Doue an Tad enor ha gloar, pa voe kaset dezhañ ar vouezh-mañ gant ar gloar uhelañ: Hemañ eo va mab karet-mat, ennañ em eus lakaet va holl levenez.

¹⁸ Ha klevet hon eus ar vouezh-se deuet eus an neñv pa oamp asambles gantañ war ar menez santel.

Profediezh ar Skritur

¹⁹ Bez’ hon eus ivez ger start-meurbet ar brofeded. Mat e rit en em stagañ outañ, evel ouzh ul lamp o lugerniñ en ul lec’h teñval betek ma sklaerio an deiz ha ma savo steredenn ar mintin en ho kalonoù.

²⁰ Gouezit da gentañ kement-mañ: profediezh ebet eus ar Skritur ne zeu eus santad an den e-unan,

²¹ rak ar brofediezh n’eo ket bet degaset gwechall dre volontez an den, met tud santel Doue o deus komzet renet gant ar Spered-Santel.