2 Korintiz 9 - Bibl Koad 21: Ar Bibl e Brezhoneg evit ar Vretoned

Pennad 9

¹ N’eo ket ret din skrivañ deoc’h diwar-benn ar servij e-keñver ar sent,

² rak anavezout a ran ho kred hag e tennan gloar ac’hanoc’h diwar e benn dirak ar Vakedoniz, o vezañ ma’z eo prest Akaia abaoe warlene. Ho kred en deus bountet an niver brasañ.

³ Kaset em eus ar vreudeur evit na vo ket hor gloar ac’hanoc’h en aner e-keñver-se hag evit ma viot prest evel ma em eus lavaret,

⁴ gant aon, mar deufe Makedoniz ganin, na vefec’h ket kavet prest ha na drofe kement-se d’hor mezh, evit tremen hep lavarout d’hoc’h hini, war an dra-se hon eus tennet gloar anezhi.

⁵ Rett em eus kavet eta pediñ ar vreudeur da vont a-raok d’ho kavout ha da echuiñ da gempenn al largentez ho poa dija prometet, evit ma vo prest, nann evel frouezh ar bizhoni met evel ul largentez.

⁶ A-hend-all: An hini a had gant pizhoni a vedo gant pizhoni, hag an hini a had gant fonnder a vedo gant fonnder ivez.

⁷ Ra roio pep hini hervez ar pezh ma en deus soñjet en e galon, nann gant keuz na dre ret, rak Doue a gar an hini a ro gant levenez.

⁸ Ha Doue a zo galloudek evit ho leuniañ a bep seurt grasoù, evit, pa ho po e pep amzer hag e pep tra kement a zo ret, ma kreskot en holl oberoù mat,

⁹ hervez ma’z eo skrivet: Skuilhet en deus, roet en deus d’ar beorien, e reizhder a chom da virviken.

¹⁰ Hogen an hini a ro an had d’an hader ha bara dezhañ da zebriñ, a roio deoc’h hag a gresko deoc’h an had, hag e lakaio da greskiñ frouezh ho reizhder

¹¹ evit ma viot pinvidikaet e pep doare ha ma c’hellot ober pep seurt largentez, a lakaio ac’hanomp da rentañ trugarekadennoù da Zoue.

¹² Rak servij ar prof-se a bourvez da ezhommoù ar sent, hag ouzhpenn c’hoazh eo leun a drugarekadennoù a vo rentet da Zoue gant meur a hini.

¹³ Reiñ a raint eta gloar da Zoue evit ar sentidigezh a ziskouezoc’h e-keñver Aviel Krist dre brouenn ar sikour-se hag evit gwirionded ho tonezon en o c’heñver hag e-keñver an holl.

¹⁴ Pediñ a reont evidoc’h, o karout ac’hanoc’h kalz abalamour d’ar c’hras c’hwek en deus graet Doue deoc’h.

¹⁵ Ra vo rentet trugarekadennoù da Zoue evit e zonezon dilavarus!