2 Korintiz 5 - Bibl Koad 21: Ar Bibl e Brezhoneg evit ar Vretoned

Pennad 5 Hor chomlec’h neñvel

¹ Gouzout a reomp a dra sur penaos mar d-eo distrujet hon tabernakl, hor chomlec’h douarel-mañ, hon eus en neñvoù un ti a zo eus Doue, un ti peurbadus n’eo ket graet gant dorn an den.

² Huanadiñ a reomp eno, o c’hoantaat gant bervder gwiskañ hor chomlec’h neñvel,

³ mar d-omp da vihanañ kavet gwisket ha nann en noazh.

⁴ E-pad ma’z emaomp en tabernakl-mañ, e huanadomp dindan ar bec’h, abalamour ma fell deomp, nann bezañ diwisket, met bezañ gwisket, evit ma vo ar pezh a zo marvel lonket gant ar vuhez.

⁵ Hag an hini en deus hor c’hrouet evit kement-se eo Doue, hag en deus roet deomp ivez arrez ar Spered.

⁶ Bez’ omp eta bepred leun a fiziañs hag gouzout a reomp penaos e-keit ha ma chomomp er c’horf-mañ emaomp pell diouzh an Aotrou,

⁷ rak kerzhout a reomp dre ar feiz ha nann dre ar gweled.

⁸ Bez’ omp leun a fiziañs, hag e karomp gwelloc’h kuitaat ar c’horf-mañ ha chom e-kichen an Aotrou.

⁹ Dre-se ivez e klaskomp bezañ kavet plijus gantañ, pe e chomfemp ennañ pe ez afemp er-maez anezhañ.

¹⁰ Rak ret eo deomp holl mont dirak lez-varn Krist, evit ma resevo pep hini hervez ar mad pe an droug en devo graet o vezañ en e gorf.

Ministrerezh an adunvanidigezh

¹¹ Oc’h anavezout eta an doujañs a dleer d’an Aotrou, e kendrec’homp an dud. Doue a anavez ac’hanomp hag ec’h esperan ec’h anavezit ivez ac’hanomp en ho koustiañsoù.

¹² N’en em erbedomp ket a-nevez dirazoc’h, met reiñ a reomp deoc’h lec’h da gavout gloar abalamour deomp, evit ma c’hellot respont d’ar re en em ro gloar en diavaez ha nann er galon.

¹³ Rak mar d-omp diskiant ez eo evit Doue, mar d-omp a skiant vat ez eo evidoc’h.

¹⁴ Karantez Krist a wask ac’hanomp, o vezañ ma kredomp penaos mar d-eo unan hepken marvet evit an holl, an holl eta a zo marv.

¹⁵ Eñ a zo marvet evit an holl, evit na vevo ken evito o-unan ar re a vev, met evit an hini a zo marvet hag adsavet a varv evito.

¹⁶ Dre-se n’anavezomp ken den hervez ar c’hig bremañ. Ha zoken mar hon eus anavezet Krist hervez ar c’hig, bremañ n’anavezomp ken anezhañ en doare-se.

¹⁷ Ha ma’z emañ unan bennak e Krist, hemañ a zo ur grouadenn nevez. An traoù kozh a zo tremenet, setu, an holl draoù a zo deuet da vezañ nevez.

¹⁸ An holl draoù-se a zeu eus Doue, en deus hon adunvanet gantañ dre Jezuz-Krist hag en deus roet deomp ministrerezh an adunvanidigezh,

¹⁹ rak Doue a oa e Krist, oc’h adunvaniñ ar bed gantañ, hep kontañ dezho o disentidigezh, hag o lakaat ennomp ar ger a adunvanidigezh.

²⁰ Kannaded evit Krist emaomp eta, evel ma vefe Doue oc’h aspediñ drezomp. Ho pediñ a reomp start en anv Krist, bezit adunvanet gant Doue!

²¹ Rak lakaet eo bet gantañ da vezañ pec’hed abalamour deomp an hini n’en deus ket anavezet ar pec’hed, evit ma teuimp da vezañ reizhder Doue ennañ.