2 Korintiz 4 - Bibl Koad 21: Ar Bibl e Brezhoneg evit ar Vretoned

Pennad 4 Un teñzor e listri douar

¹ Dre-se, o kaout ar ministrerezh-mañ hervez an drugarez a zo bet graet deomp, ne gollomp ket kalon.

² Taolet hon eus kuit an traoù mezhus a guzher, o tremen hep bevañ dre droidell hag hep falsañ ger Doue, hag en em erbedomp hon-unan da bep koustiañs den dirak daoulagad Doue en ur ziskuliañ ar wirionez.

³ Mar d-eo hon Aviel kuzhet, ez eo kuzhet evit ar re a ya da goll,

⁴ evit ar re ziskredik a zo bet dallet o c’hlevidigezh gant doue ar c’hantved-mañ, evit na vefent ket sklêrijennet gant ar gouloù eus Aviel glorius Krist, eñ hag a zo skeudenn Doue.

⁵ Ne brezegomp ket ac’hanomp hon-unan, met Krist Jezuz evel an Aotrou, hag ez omp ho servijerien abalamour da Jezuz.

⁶ Rak Doue, hag en deus lavaret: Ra sklêrijenno ar gouloù eus an deñvalijenn, a sklêrijenn hor c’halonoù evit lakaat anaoudegezh gloar Doue da lugerniñ war dremm Jezuz-Krist.

⁷ Met an teñzor-se hon eus e listri douar evit ma vefe meurded ar galloud roet da Zoue ha nann deomp-ni.

⁸ Gwasket omp eus pep kostez met n’omp ket kaset da netra, ankeniet omp met n’omp ket hep esperañs,

⁹ heskinet omp met n’omp ket dilezet, diskaret omp met n’omp ket distrujet,

¹⁰ dougen a reomp atav en hor c’horf marv an Aotrou Jezuz, evit ma vo ivez buhez Jezuz diskuliet en hor c’horf.

¹¹ Rak ni, ar re vev, a zo bepred roet d’ar marv abalamour da Jezuz, evit ma vo ivez buhez Jezuz diskuliet en hor c’hig marvel,

¹² en hevelep doare ma labour ar marv ennomp hag ar vuhez ennoc’h.

¹³ Met hon eus an hevelep spered a feiz, hervez ma’z eo skrivet: Kredet em eus, setu perak em eus komzet. Ni ivez a gred ha setu perak e komzomp,

¹⁴ oc’h anavezout penaos an hini en deus savet an Aotrou Jezuz a varv a savo ac’hanomp ivez a varv dre Jezuz, hag a lakaio ac’hanomp d’en em ziskouez ganeoc’h.

¹⁵ Rak an holl draoù-se a zo evidoc’h, evit ma teuio ar c’hras-se, en ur greskiñ, da fonnañ ar pedennoù a drugarez eus kalz evit gloar Doue.

¹⁶ Dre-se ne gollomp ket kalon. Ha petra bennak en em zistruj hon den a-ziavaez, hon den a-ziabarzh en em nevesa a zeiz da zeiz.

¹⁷ Rak hor glac’har skañv eus an amzer a-vremañ a ro ur pouez a c’hloar peurbadus ha meurbet gwelloc’h,

¹⁸ pa’z eo gwir na sellomp ket ouzh an traoù gwelus met ouzh an traoù diwelus. Rak an traoù gwelus n’int nemet evit un amzer, met ar re ziwelus a zo peurbadus.