2 Danevelloù 7 - Bibl Koad 21: Ar Bibl e Brezhoneg evit ar Vretoned

Pennad 7

¹ P'en doe echuet Salomon da bediñ, an tan a ziskennas eus an neñvoù hag a zevas al loskaberzh hag an aberzhoù, ha gloar an AOTROU a leunias an ti.

² An aberzhourien ne c'hellent ket mont e-barzh ti an AOTROU, rak gloar an AOTROU he doa leuniet ti an AOTROU.

³ Holl vibien Israel a welas an tan ha gloar an AOTROU o tiskenn war an ti, hag e plegjont, o dremm d'an douar war al leur, hag e stoujont, hag e veuljont an AOTROU, o lavarout: Rak mat eo, rak e drugarez a bad da viken!

⁴ Ar roue hag an holl bobl a ginnigas aberzhoù dirak an AOTROU.

⁵ Hag ar roue Salomon a ginnigas un aberzh a zaou vil ejen warn-ugent ha kant ugent mil dañvad. Evel-se ar roue hag an holl bobl a reas dedi ti Doue.

⁶ An aberzhourien en em zalc'he en o c'harg, kenkoulz hag al Levited gant binvioù an AOTROU en doa graet ar roue David evit meuliñ an AOTROU, pa veule David drezo, o lavarout: Rak e drugarez a bad da viken!. An aberzhourien ivez a sone trompilhoù dirazo, hag holl Israel en em zalc'he en o sav.

⁷ Salomon a santelaas kreiz al leurenn a oa dirak ti an AOTROU, rak kinnig a reas eno al loskaberzhoù ha lard an aberzhoù a drugarekadennoù, rak an aoter arem graet gant Salomon ne c'helle ket kenderc'hel al loskaberzhoù, an donezonoù hag al lard.

⁸ Salomon a lidas ar gouel en amzer-se e-pad seizh devezh, hag holl Israel gantañ. Bez' e oa ur vodadenn vras-meurbet, deuet adalek dor Hamad betek froud an Ejipt.

⁹ D'an eizhvet deiz e rejont ur vodadeg veur, rak graet o doa dedi an aoter e-pad seizh devezh hag ar gouel e-pad seizh devezh.

¹⁰ D'an trede deiz warn-ugent eus ar seizhvet miz, e kasas ar bobl kuit d'o zeltennoù, laouen ha seder en o c'halonoù, en abeg d'ar vad en doa graet an AOTROU da Zavid, da Salomon ha da Israel e bobl.

¹¹ Salomon a echuas eta ti an AOTROU ha ti ar roue. Hag e sevenas kement tra en doa bet c'hoant d'ober en e galon e ti an AOTROU hag en e hini.

¹² An AOTROU en em ziskouezas da Salomon e-pad an noz hag a lavaras dezhañ: Selaouet em eus da bedenn ha dibabet em eus al lec'h-mañ evit un ti-aberzh.

¹³ Pa serrin an neñvoù ha ne vo ket a c'hlav, pa c'hourc'hemennin d'ar c'hilheien-raden debriñ ar vro, pa gasin ar vosenn e-touez va fobl,

¹⁴ mar en em izela va fobl, a zo galvet va anv warni, mar pedont ha mar klaskont va dremm, mar distroont eus o hentoù fall, me a selaouo anezho eus an neñvoù, hag e pardonin o fec'hedoù, hag e yac'hain o bro.

¹⁵ Va zaoulagad a vo atav digor, ha va divskouarn a vo evezhiek ouzh ar bedenn graet el lec'h-mañ.

¹⁶ Bremañ em eus dibabet ha santelaet an ti-mañ evit ma vo va anv ennañ da viken. Va daoulagad ha va c'halon a vo ennañ da viken.

¹⁷ Ha te, mar kerzhez dirazon evel m'en deus kerzhet David da dad, oc'h ober kement a c'hourc'hemennan dit, mar mirez va reolennoù ha va barnedigezhioù,

¹⁸ e startain tron da rouantelezh, evel ma em eus prometet da Zavid da dad, o lavarout: Ne vanki ket da gavout ur warlerc'hiad da ren war Israel.

¹⁹ Met mar distroit, mar dilezit va reolennoù ha va gourc'hemennoù am eus lakaet dirazoc'h, ha mard it da servijañ doueoù all ha da stouiñ dirazo,

²⁰ me a ziframmo ac'hanoc'h eus va bro am eus roet deoc'h, me a daolo pell diouzhin an ti-mañ am eus santelaet da'm anv, hag e rin dezhañ bezañ ur vojenn hag ur goapaerezh e-touez an holl bobloù.

²¹ An ti-mañ a zo savet ken uhel ma vo souezhet piv bennak a dremeno en e gichen, hag e lavaro: Perak en deus graet an AOTROU evel-se d'ar vro-mañ ha d'an ti-mañ?

²² Hag e vo respontet: Dre m'o deus dilezet an AOTROU, Doue o zadoù, en deus lakaet anezho da zont kuit eus bro Ejipt, ha dre m'o deus en em staget ouzh doueoù all, ha stouet dirazo ha servijet anezho. En abeg da-se eo en deus lakaet an holl boanioù-se da zont warno.