2 Danevelloù 35 - Bibl Koad 21: Ar Bibl e Brezhoneg evit ar Vretoned

Pennad 35

¹ Jozia a reas Pask an AOTROU e Jeruzalem, hag e voe lazhet ar Pask d'ar bevarzekvet deiz eus ar miz kentañ.

² Lakaat a reas an aberzhourien en o c'hargoù, hag e kennerzhas anezho e servij ti an AOTROU.

³ Lavarout a reas d'al Levited a gelenne holl Israel hag a oa santel evit an AOTROU: Lakait an arc'h santel en ti en deus savet Salomon mab David, roue Israel. N'hoc'h eus ken da zougen anezhi war ho skoaz, bremañ servijit an AOTROU ho Toue, gant e bobl Israel.

⁴ En em zalc'hit prest, hervez ho tiegezhioù tadel, hervez ho kevrennoù, hervez skrid David roue Israel, hag hervez skrid Salomon e vab.

⁵ En em zalc'hit er santual, hervez kevrennoù tiegezhioù tadel ho preudeur, mibien ar bobl, hag hervez renkadur tiegezhioù tadel al Levited.

⁶ Lazhit ar Pask, en em santelait, kempennit anezhañ evit ho preudeur, evit ober hervez ar gomz en deus disklêriet an AOTROU dre Voizez.

⁷ Jozia a roas da dud ar bobl loened munut, oaned ha menned evit ar Pask, evit an holl re a oa eno, en niver a dregont mil, ha tri mil ejen. Ar re-se a voe kemeret diwar madoù ar roue.

⁸ Hag e bennoù a roas ur prof a-youl-vat d'ar bobl, d'an aberzhourien ha d'al Levited. Hilkija, Zakaria ha Jehiel, gouarnourien ti Doue, a roas d'an aberzhourien evit ar Pask daou vil c'hwec'h kant oan, ha tri c'hant ejen.

⁹ Konania, Shemaja ha Netaneel e vreudeur, hag Hashabia ha Jeiel ha Jozabad pennoù al Levited, a roas d'al Levited evit ar Pask pemp mil oan, ha pemp kant ejen.

¹⁰ Ar servij o vezañ kempennet, an aberzhourien en em zalc'has en o lec'h hag al Levired en o c'hevrennoù, hervez gourc'hemenn ar roue.

¹¹ Hag e voe lazhet ar Pask, hag an aberzhourien a rae sparfadur ar gwad degemeret digant daouarn al Levited, a zibezhie an aberzhoù.

¹² Lakaat a rejont a-du al loskaberzhoù, evit o reiñ da dud ar bobl hervez kevrennoù o ziegezhioù tadel, evit kinnig anezho d'an AOTROU, evel m'eo skrivet e levr Moizez; hag evel-se e rejont ivez evit an ejened.

¹³ Hag e lakajont ar Pask da rostañ en tan, hervez an urzh, hag e lakajont an traoù santel da boazhañ e kaoterioù, chaodouronoù ha palarennoù, hag e lodennjont a-dizh anezho da holl dud ar bobl.

¹⁴ Goude e prientjont ar pezh a oa evito o-unan hag evit an aberzhourien, rak an aberzhourien mibien Aaron a voe dalc'het betek an noz da ginnig al loskaberzhoù hag al lardoù. Setu perak al Levited a brientas evito o-unan hag evit an aberzhourien mibien Aaron.

¹⁵ Ar ganerien mibien Azaf en em zalc'he en o lec'h, hervez gourc'hemenn David, Azaf, Heman ha Jedutun gwelour ar roue, hag ar borzhierien a oa ouzh pep dor. N'o doe ket da guitaat o servij, rak o breudeur Levited a briente ar pezh a oa evito.

¹⁶ Evel-se holl servij an AOTROU a voe aozet en deiz-se evit ober ar Pask, hag evit kinnig loskaberzhoù war aoter an AOTROU, hervez gourc'hemenn ar roue Jozia.

¹⁷ Ober a reas ar Pask en amzer-se Mibien Israel en em gave eno, hag e lidjont gouel ar bara hep goell e-pad seizh devezh.

¹⁸ Ne oa ket bet graet ur Pask heñvel ouzh hemañ en Israel abaoe deizioù ar profed Samuel. Hini ebet eus rouaned Israel n'en doa graet ur Pask heñvel ouzh an hini a reas Jozia, gant an aberzhourien, al Levited, holl Juda hag Israel en em gave eno, ha tud Jeruzalem.

¹⁹ Ar Pask-se a voe graet d'an triwec'hvet bloaz eus ren Jozia.

²⁰ Goude kement-se, p'en doe dreset Jozia an ti, Neko roue an Ejipt a bignas d'ober brezel da Garkemish, war an Eufratez. Jozia a yeas en arbenn dezhañ.

²¹ Neko a gasas dezhañ kannaded da lavarout: Petra 'zo etre te ha me, roue Juda? N'eo ket ouzhit em eus droug hiziv, met ouzh un ti a ra brezel din, ha Doue en deus lavaret din hastañ. Paouez eta da stourm ouzh Doue, hag a zo ganin, gant aon na zistrujfe ac'hanout.

²² Met Jozia ne fellas ket dezhañ distreiñ dioutañ, hag en em zic'hizas evit stourm outañ. Ne selaouas ket komzoù Neko, a zeue eus genoù Doue. Dont a reas evit stourm e plaenenn Megiddo.

²³ Ar waregerien a dennas war ar roue Jozia, hag ar roue a lavaras d'e servijerien: Kasit-me kuit, rak gwall-c'houliet on.

²⁴ E servijerien a gasas anezhañ kuit eus e garr, a lakaas anezhañ war ur c'harr all en doa, hag a gasas anezhañ da Jeruzalem, hag e varvas. Sebeliet e voe e bezioù e dadoù, hag holl Juda ha Jeruzalem a reas kañv war Jozia.

²⁵ Jeremiaz a reas ur werz war Jozia, hag an holl ganerien hag an holl ganerezed o deus komzet eus Jozia en o gwerzioù betek hiziv, ha graet o deus a gement-se ur reolenn en Israel. Ha setu, an traoù-se a zo skrivet er gwerzioù.

²⁶ Diwar-benn nemorant oberoù Jozia, hag e vadelezhioù hervez ar pezh a zo skrivet e lezenn an AOTROU,

²⁷ e oberoù kentañ ha diwezhañ, kement-se a zo skrivet e levr rouaned Israel ha Juda.