2 Danevelloù 25 - Bibl Koad 21: Ar Bibl e Brezhoneg evit ar Vretoned

Pennad 25

¹ Pemp bloaz warn-ugent e oa Amazia pa zeuas da roue, hag e renas nav bloaz warn-ugent e Jeruzalem. E vamm a oa anvet Joaddan eus Jeruzalem.

² Ober a reas ar pezh a zo reizh dirak daoulagad an AOTROU, met ne voe ket gant ur galon beurvat.

³ Pa voe startaet en e rouantelezh, e lakaas d'ar marv e servijerien o doa lazhet ar roue e dad.

⁴ Met ne lakaas ket o mibien d'ar marv, rak ober a reas evel ma'z eo skrivet el lezenn, e levr Moizez, e-lec'h m'en deus roet an AOTROU ar gourc'hemenn-mañ: Ne vo ket lakaet d'ar marv an tadoù evit o mibien, ha ne vo ket lakaet d'ar marv ar vibien evit o zadoù, met lakaet e vo da vervel pep hini evit e bec'hed.

⁵ Amazia a zastumas tud Juda, hag e renkas anezho dre diegezhioù tadel, dre bennoù a vilieroù hag a gantoù, evit holl Juda ha Benjamin, hag e reas an niveradeg adalek an oad a ugent vloaz hag uheloc'h. Hag e kavas tri c'hant mil den a zibab evit mont d'an arme, o tougen ar skoed hag ar goaf.

⁶ Hag e c'hopras ivez, eus Israel, kant mil brezelour kalonek, evit kant talant arc'hant.

⁷ Met un den a Zoue a zeuas d'e gavout hag a lavaras: O roue! Ra ne gerzho ket ganit arme Israel, rak n'emañ ket an AOTROU gant Israel, gant holl vibien Efraim-se.

⁸ Mard ez ganto, e c'hellez mont, bez kalonek en emgann, met Doue a lakaio ac'hanout da gouezhañ dirak an enebour, rak Doue en deus ar galloud da sikour ha da reiñ lamm.

⁹ Amazia a lavaras d'an den a Zoue: Met penaos ober diwar-benn ar c'hant talant am eus roet da strolladoù Israel? An den a Zoue a lavaras: An AOTROU a zo evit reiñ dit muioc'h kalz.

¹⁰ Amazia a zispartias ar strolladoù a oa deuet dezhañ eus Efraim, evit ma tistrofent d'ar gêr. Met o fulor a entanas a-enep Juda, hag e tistrojont d'ar gêr gant ur fulor bras.

¹¹ Amazia en em greñvaas, hag e renas e bobl, hag ez eas da draonienn an Holen, e-lec'h ma skoas war dek mil den a-douez mibien Seir.

¹² Ha mibien Juda a dapas dek mil den bev, hag e tegasjont anezho war-lein ur roc'h, a-belec'h e taoljont anezho d'an traoñ, hag e voent holl brevennet.

¹³ Tud ar strolladoù en doa kaset kuit Amazia evit na zeufent ket gantañ d'ar brezel, en em daolas war gêrioù Juda, adalek Samaria betek Bet-Horon, hag e lazhjont tri mil den hag e skrapjont ur preizh bras.

¹⁴ Goude ma voe distroet Amazia eus faezhidigezh an Edomiz, e tegasas doueoù mibien Seir, hag o lakaas da zoueoù, hag e stouas dirazo hag e kinnigas c'hwezh-vat dezho.

¹⁵ Neuze kounnar an AOTROU a entanas a-enep Amazia, hag e kasas etrezek ennañ ur profed a lavaras dezhañ: Perak ec'h eus klasket doueoù ar bobl-se, pa n'o deus ket gellet dieubiñ o fobl eus da zorn?

¹⁶ Hag evel ma komze ouzh ar roue, ar roue a lavaras dezhañ: Hag out bet lakaet da guzulier ar roue? En em denn! Perak e vefe skoet warnout? Ar profed en em dennas en ur lavarout: Gouzout a ran en deus divizet Doue da zistrujañ ac'hanout, dre ma ec'h eus graet-se ha ne'c'h eus ket selaouet va ali.

¹⁷ Goude bezañ dalc'het kuzul, Amazia roue Juda a gasas da gavout Joaz mab Joakaz, mab Jehu, roue Israel, da lavarout dezhañ: Deus, ma en em welimp a-dal!

¹⁸ Joaz roue Israel a gasas da lavarout da Amazia roue Juda: Spernenn al Liban en deus kaset da lavarout da sedrezenn al Liban: Ro da verc'h evel gwreg da'm mab. Met ul loen gouez eus al Liban a zo tremenet hag en deus mac'het ar spernenn.

¹⁹ Setu e lavarez ec'h eus pilet Edom, hag ez eo savet da galon evit tennañ gloar. Bremañ chom er gêr! Perak ez afes da gouezhañ er gwalleur, te ha Juda ganit?

²⁰ Met Amazia ne selaouas ket, rak kement-se a zeue a-berzh Doue, evit o lakaat etre daouarn Joaz, dre m'o doa klasket doueoù Edom.

²¹ Joaz roue Israel a bignas eta, heg en em weljont a-dal, eñ hag Amazia roue Juda, e Bet-Shemesh, a zo e Juda.

²² Ha Juda a voe kannet dirak Israel, hag e tec'has pep hini d'e deltenn.

²³ Ha Joaz roue Israel a dapas Amazia roue Juda, mab Joaz, mab Joakaz, e Bet-Shemesh. Kas a reas anezhañ da Jeruzalem, hag e reas un toull-freuz war bevar c'hant ilinad e moger Jeruzalem, adalek dor Efraim betek dor ar C'horn.

²⁴ Kemer a reas an holl aour hag an holl arc'hant, hag an holl listri a voe kavet e ti Doue, dindan evezh Obed-Edom, ha teñzorioù ti ar roue, hag ivez gouestlidi, hag e tistroas da Samaria.

²⁵ Amazia mab Joaz, roue Juda, a vevas pemzek vloaz goude marv Joaz mab Joakaz, roue Israel.

²⁶ Diwar-benn nemorant oberoù Amazia, ar re gentañ hag ar re ziwezhañ, kement-se ha n'eo ket skrivet e levr rouaned Juda hag Israel?

²⁷ Adalek ar mare ma tistroas Amazia a-ziouzh an AOTROU, e voe graet un irienn a-enep dezhañ e Jeruzalem, hag e tec'has da Lakish. Met kaset e voe war e lerc'h da Lakish, hag e voe lazhet eno.

²⁸ Hag e voe douget war gezeg, hag e voe sebeliet gant e dadoù e kêr Juda.