2 Danevelloù 2 - Bibl Koad 21: Ar Bibl e Brezhoneg evit ar Vretoned

Pennad 2

¹ Salomon a zivizas sevel un ti evit anv a AOTROU, hag un ti roueel evitañ.

² Ha Salomon a niveras dek mil den ha tri-ugent evit dougen ar bec'hioù, ha pevar-ugent mil evit benañ ar vein er menez, ha tri mil c'hwec'h kant evit eveshaat anezho.

³ Salomon a gasas da gavout Huram roue Tir, da lavarout dezhañ: Gra evidon evel ma ec'h eus graet evit David va zad, o kas dezhañ sedrez da sevel un ti evit chom ennañ.

⁴ Setu, emaon o vont da sevel un ti da anv an AOTROU va Doue, evit e ouestlañ dezhañ, evit ma vo lakaet da vogediñ dirazañ an ezañs a c'hwezh-vat, evit ma vo kinniget dalc'hmat dezhañ ar baraoù a ginnig, evit al loskaberzhoù d'ar mintin ha d'an abardaez, d'an deizioù sabad, d'al loarioù nevez ha da ouelioù an AOTROU hon Doue, ar pezh a vo graet da viken gant Israel.

⁵ An ti ez an da sevel a vo bras, rak hon Doue a zo brasoc'h eget an holl zoueoù.

⁶ Met piv en defe ar galloud da sevel dezhañ un ti, pa ne c'hellont ket e genderc'hel an neñvoù ha neñvoù an neñvoù? Ha piv on-me evit sevel dezhañ un ti, ma ne vefe nemet da lakaat da vogediñ dirazañ?

⁷ Bremañ kas eta din un den ampart d'al labourioù en aour, en arc'hant, en arem, en houarn, e tane, e ruz-bev, e limestra, hag a oar kizellañ engravadurioù, evit ma vo gant tud ampart am eus ganin e Juda hag e Jeruzalem, ar re en deus kempennet David va zad.

⁸ Kas din ivez eus al Liban koad sedrez, sapin ha santal, rak gouzout a ran e oar da servijerien troc'hañ koad al Liban. Setu, va servijerien a vo gant da re.

⁹ Ra vo kempennet din koad e-leizh, rak an ti ez an da sevel a vo bras hag hollgaer.

¹⁰ Hag e roin da'z servijerien a droc'ho pe a ziskaro ar c'hoad, ugent mil kor gwinizh dornet, ugent mil kor heiz, ugent mil bat gwin, ugent mil bat eoul.

¹¹ Huram roue Tir a respontas en ur skrid a gasas da Salomon: Dre ma kar an AOTROU e bobl eo en deus da lakaet da roue warno.

¹² Hag Huram a lavaras: Benniget ra vo an AOTROU Doue Israel, en deus graet an neñvoù hag an douar, en deus roet d'ar roue David ur mab fur gant skiant-varn ha meiz, a ya da sevel un ti d'an AOTROU hag un ti roueel evitañ.

¹³ Kas a ran dit eta un den ampart ha skiantek: Huram-Abi,

¹⁴ mab da ur vaouez eus merc'hed Dan, hag e dad a oa un den eus Tir. Mailh eo d'al labourioù en aour, en arc'hant, en arem, en houarn, e mein, e koad, e tane, e limestra, e lin fin, e ruz-bev, hag e oar kizellañ a bep seurt engravadurioù, hag ijinañ a bep seurt oberennoù arz a vo roet dezhañ d'ober. Labourat a raio gant da dud ampart ha gant tud ampart va aotrou David da dad.

¹⁵ Ha bremañ ra gaso va aotrou d'e servijerien ar gwinizh, an heiz, an eoul hag ar gwin en deus lavaret.

¹⁶ Ha ni a droc'ho koad eus al Liban, kement ha ma vo ezhomm, hag o c'hasimp dit war radelloù dre vor betek Jafo, ha te o zreuzdougo betek Jeruzalem.

¹⁷ Salomon a niveras an holl ziavaezidi a oa e bro Israel goude an niveradeg en doa graet David e dad. Kavet e voe kant tri mil hag hanter-kant c’hwec’h kant.

¹⁸ Hag e lakaas dek mil ha tri-ugent da zougen bec'hioù, pevar-ugent mil evit benañ ar vein er menez, ha tri mil c'hwec'h kant da eveshaat ar bobl o labourat.