1 Tesalonikiz 2 - Bibl Koad 21: Ar Bibl e Brezhoneg evit ar Vretoned

Pennad 2 Labour Paol e Tesalonike

¹ C’hwi hoc’h-unan a oar a-dra-sur, breudeur, penaos hon donedigezh en ho touez n’eo ket bet difrouezh.

² Petra bennak ma hor boa gouzañvet poanioù diagent ha resevet dismegañsoù e Filipi, evel ma ouzoc’h, hon eus kemeret hardizhegezh en hon Doue evit prezeg deoc’h Aviel Doue e-kreiz stourmoù bras.

³ Rak n’eus bet en hor prezegerezh nag errol, na tra lous ebet, na tromplerezh.

⁴ Met evel m’en deus Doue kavet mat fiziout ennomp an Aviel, evel-se e komzomp, nann evit plijout d’an dud, met da Zoue a amprou hor c’halonoù.

⁵ Rak n’hon eus biskoazh implijet komzoù lubanus, evel ma ouzoc’h, na labouret dre zroukc’hoant, Doue a zo test a gement-se.

⁶ N’hon eus ket klasket ar gloar a zeu eus an dud, nag en ho touez nag e-touez reoù all ebet, petra bennak ma c’hellemp pouezañ warnoc’h gant galloud evel ebestel Krist,

⁷ met omp bet dous en ho touez. Evel ma kemer ur vagerez ur preder tener eus he bugale,

⁸ evel-se, leun a evezh evidoc’h, hor bije karet reiñ deoc’h nann hepken Aviel Doue, met ivez hor buhez hon-unan, rak hor boa evidoc’h ur garantez vras.

⁹ Soñj hoc’h eus, breudeur, eus hol labour hag eus hor poan. En ur labourat noz-deiz evit na vijemp ket ur bec’h deoc’h eo hon eus prezeget deoc’h Aviel Doue.

¹⁰ Testoù oc’h ha Doue ivez, pegen santel, pegen reizh ha pegen didamall ez omp en em renet en ho keñver-c’hwi ar re a gred.

¹¹ Anavezout a rit ivez penaos hon eus aliet, kalonekaet hag aspedet start pep hini ac’hanoc’h, evel un tad e-keñver e vugale,

¹² evit m’en em renit en un doare dellezek eus Doue a c’halv ac’hanoc’h d’e rouantelezh ha d’e c’hloar.

Feiz an Desalonikiz ha mision Timote

¹³ Setu perak ne baouezomp ket da drugarekaat Doue evidoc’h rak, pa hoc’h eus resevet ger Doue disklêriet deoc’h ganeomp, hoc’h eus e zegemeret nann evel ger an dud, met evel ma’z eo e gwirionez, evel ger Doue. Hag e labour gant nerzh ennoc’h-c’hwi ar re a gred.

¹⁴ Rak c’hwi, breudeur, a zo deuet da vezañ an heñvelerien eus Ilizoù Doue a zo e Judea e Jezuz-Krist, rak hoc’h eus ivez gouzañvet a-berzh ar re eus ho pobl hoc’h-unan an hevelep traoù hag int a-berzh ar Yuzevien,

¹⁵ int hag o deus lakaet d’ar marv an Aotrou Jezuz hag o frofeded o-unan, o deus hon heskinet, na blijont ket da Zoue, hag a zo enebourien d’an holl dud,

¹⁶ o virout ouzhimp da gomz d’ar baganed evit ma vint salvet, hag o leuniañ dre-se bepred muioc’h muzul o fec’hedoù. Met fulor Doue a zo deuet warno a-benn ar fin.

¹⁷ Evidomp, breudeur, o vezañ bet pellaet diouzhoc’h abaoe ur pennad amzer a gorf ha nann a galon, hon eus bet kement muioc’h a c’hoant hag a hast d’ho kwelout a-nevez.

¹⁸ Fellet eo bet deomp ur wech ha zoken div mont d’ho kavout, da vihanañ me Paol, met Satan en deus miret ouzhimp d’henn ober.

¹⁹ Rak petra eo hon esperañs, hol levenez, hor c’hurunenn a c’hloar? Ha n’eo ket c’hwi, dirak hon Aotrou Jezuz-Krist en e zonedigezh?

²⁰ Ya, c’hwi eo hor gloar hag hol levenez.