1 Samuel 25 - Bibl Koad 21: Ar Bibl e Brezhoneg evit ar Vretoned

Pennad 25

¹ Samuel a varvas, hag holl Israel en em zastumas hag a ouelas dezhañ, hag e voe sebeliet en e di e Rama. Ha David a savas hag a ziskennas betek gouelec'h Paran.

² E Maon e oa un den o kaout madoù e Karmel. Hag an den-mañ a oa pinvidik-meurbet, tri mil dañvad ha mil gavr a oa dezhañ. Hag e oa e Karmel evit touzañ e zeñved.

³ An den-mañ a oa anvet Nabal, hag e wreg a oa anvet Abigail. Ur vaouez a skiant vat e oa, he dremm a oa kaer da welout. Met an den a oa kalet ha drouk en e oberoù. Eus lignez Kaleb e oa.

⁴ David a glevas, er gouelec'h, e touze Nabal e zeñved.

⁵ David a gasas dek eus e dud en ur lavarout dezho: Pignit da Garmel, kit da gavout Nabal, saludit-eñ eus va ferzh,

⁶ ha lavarit dezhañ: Peoc'h dit evit da vuhez! Peoc'h da'z ti ha da gement a zo dit!

⁷ Ha bremañ em eus klevet e oa an douzerien du-se. Da vêsaerien a zo bet ganeomp, n'o deus bet kudenn ebet ganeomp, ha netra eus ar pezh a oa dezho n'eo bet kollet e-pad an holl amzer ma'z int bet e Karmel.

⁸ Goulenn kement-se digant da dud, hag e lavarint dit. Ra gavo eta va zud trugarez dirak da zaoulagad, pa'z omp deuet en un devezh mat. Ro mar plij da'z servijerien ha da'z mab David ar pezh a gavo dindan da zorn.

⁹ Tud David a zeuas eta hag a lavaras da Nabal an holl gomzoù-se a-berzh David, hag e chomjont sioul.

¹⁰ Nabal a respontas da servijerien David o lavarout: Piv eo David, ha piv eo mab Jese? Niverus eo hiziv ar servijerien a zilez o mistri!

¹¹ Hag e kemerfen va bara ha va dour ha va c'hig am eus fichet evit va zouzerien, hag e rofen anezho da dud hag a zeu n'ouzon ket a-belec'h?

¹² Neuze tud David a zistroas dre o hent. Deuet en-dro hag erruet, e lavarjont an holl gomzoù-se dezhañ.

¹³ David a lavaras d'e dud: Ra gemero pep hini ac'hanoc'h e gleze, hag e kemeras pep hini e gleze. David ivez a gemeras e gleze, hag e pignas war-lerc'h David war-dro pevar c'hant den, ha daou c'hant a chomas e-kichen an traoù.

¹⁴ Unan eus ar servijerien a gomzas ouzh Abigail gwreg Nabal o lavarout: Setu, David en deus kaset eus ar gouelec'h kannaded evit saludiñ hor mestr, met fuloret en deus en o enep.

¹⁵ Koulskoude an dud-se a zo bet gwall-vat en hor c'heñver, ha n'hon eus bet kudenn ebet ganto, ha netra eus ar pezh a oa deomp n'eo bet kollet e-pad an holl amzer ma'z omp bet ganto, pa oamp er parkeier.

¹⁶ Servijet o deus da voger deomp, en noz hag en deiz, e-pad an holl amzer ma'z omp bet ganto o peuriñ an tropelloù.

¹⁷ Bremañ gra da vennozh, hag anavez ar pezh ac'h eus d'ober, rak divizet eo an distruj a-enep hor mestr hag a-enep e holl di. Met ken drouk eo, ken na greder den komz outañ.

¹⁸ Neuze Abigail a hastas hag a gemeras daou c'hant bara, div sac'h-lêr gwin, pemp dañvad fichet, pemp sea (5 sea   40 l) greun rostet, kant pakad rezin sec'h, ha daou c'hant kestad fiez sec'h, hag o lakaas war an ezen.

¹⁹ Hag e lavaras d'he zud: Tremenit a-raok din, setu, e teuin war ho lerc'h. Met ne lavaras netra d'he gwaz Nabal.

²⁰ Pignet war an azen, e tiskennas eus ar menez dre un hent er goudor. Ha setu, David hag e dud a ziskenne a-dal dezhi, hag en em gavas ganto.

²¹ David en doa lavaret: En aner eo em eus diwallet kement en doa an den-se er gouelec'h, en doare ma n'en deus kollet netra eus ar pezh a zo dezhañ. Rentet en deus din an droug evit ar mad.

²² Ra raio Doue da enebourien David hervez an diwezhañ rustoni, ma ne lezan dezhañ un den zoken da vevañ, ac'hann da veure, eus kement en deus.

²³ Pa welas Abigail eta David, e hastas diskenn diwar hec'h azen d'en em deurel war he dremm dirak David, hag e stouas d'an douar.

²⁴ Kouezhañ a reas d'e dreid hag e lavaras: Ra vo ar fazi warnon, va aotrou! Met ra gomzo da servijerez dirazout, ha selaou komzoù da servijerez.

²⁵ Ra ne daolo ket evezh va aotrou ouzh an den drouk-se, ouzh Nabal, rak evel e anv eo, anvet eo Nabal ha sotoni 'zo ennañ. Met me da servijerez, ne'm eus ket gwelet an dud en deus kaset va aotrou.

²⁶ Bremañ va aotrou, an AOTROU a zo bev ha da ene a zo bev! An AOTROU en deus harzet ouzhit da skuilhañ ar gwad ha d'en em veñjiñ gant da zorn da-unan. Ha ra vo da enebourien hag ar re a glask noazout d'an aotrou evel Nabal.

²⁷ Ha bremañ setu an donezon he deus degaset da servijerez da'm aotrou, evit ma vo roet d'an dud a gerzh war-lerc'h va aotrou.

²⁸ Pardon mar plij fazi da servijerez, rak an AOTROU ne vanko ket da reiñ da'm aotrou un ti dalc'hus, dre ma ren va aotrou brezelioù an AOTROU , ha ma n'eus bet kavet drougiezh ebet ennout da vuhez-pad.

²⁹ Mar sav unan bennak evit da drubuilhañ hag evit klask da vuhez, ene va aotrou a vo staget ouzh torkad ar vuhez e-kichen an AOTROU da Zoue. Ha teurel a raio pell, evel gant ur vatalm, ene da enebourien.

³⁰ P'en devo graet an AOTROU da'm aotrou an holl vad en deus lavaret diwar da benn, ha p'en devo da lakaet rener war Israel,

³¹ kement-mañ ne vo ket ur maen-kouezh evidout, ha kalon va aotrou n'he devo ket keuz da vezañ skuilhet ar gwad hep abeg, ha da vezañ en em veñjet e-unan. P'en devo graet vad an AOTROU da'm aotrou, te az po soñj eus da servijerez.

³² Neuze David a lavaras da Abigail: Benniget ra vo an AOTROU Doue Israel, en deus da gaset hiziv a-raok din!

³³ Benniget ra vo da skiant vat, ha benniget ra vi da-unan, te ac'h eus harzet ouzhin hiziv da skuilhañ gwad ha d'en em veñjiñ dre va dorn va-unan!

³⁴ Met a-dra-sur eo bev an AOTROU Doue Israel, en deus harzet ouzhin d'ober droug dit! Ma ne vijes ket deuet buan a-raok din, ne vije manet da Nabal un den zoken, ac'hann da veure.

³⁵ David a gemeras eus he dorn ar pezh he doa degaset hag a lavaras dezhi: Adpign e peoc'h da'z ti. Sell, selaouet em eus ouzh da vouezh, ha da zegemeret mat.

³⁶ Abigail a zistroas da gavout Nabal, ha setu e rae ur fest en e di, evel fest ur roue. Kalon Nabal a oa laouen ennañ, hag e oa mezv-kenañ. Hi ne lavaras dezhañ an disterañ tra betek an deiz warlerc'h.

³⁷ Ha diouzh ar beure, pa oa distroet Nabal eus e vezventi, e wreg a lavaras dezhañ ar pezh a oa c'hoarvezet, hag e galon a voe stroñset marvel hag e teuas da vezañ evel ur maen.

³⁸ War-dro dek devezh goude, an AOTROU a skoas war Nabal, hag e varvas.

³⁹ Pa glevas David e oa marv Nabal, e lavaras: Benniget ra vo an AOTROU en deus difennet va gwir en dismegañs am eus graet dorn Nabal, hag en deus harzet ouzh e servijer d'ober droug. Met an AOTROU en deus lakaet droug Nabal da gouezhañ war e benn. Ha David a gasas da gomz da Abigail, evit he c'hemer da wreg dezhañ.

⁴⁰ Servijerien David a zeuas da gavout Abigail da Garmel hag a gomzas dezhi o lavarout: David en deus hon degaset da'z kavout, da'z kemer evitañ da wreg.

⁴¹ Neuze e savas, e stouas he dremm d'an douar, hag e lavaras: Setu, da servijerez a vo ur vatezh evit gwalc'hiñ treid servijerien va aotrou.

⁴² Abigail a savas buan hag a bignas war un azen, ha pemp eus he mitizhien a yeas war he lerc'h. Hag ec'h heulias kannaded David, hag e voe e wreg.

⁴³ David en doa kemeret ivez Akinoam eus Jizreel, hag o-div a voe e wragez.

⁴⁴ Rak Saül en doa roet e verc'h Mikal gwreg David da Balti mab Laish eus Gallim.