1 Samuel 20 - Bibl Koad 21: Ar Bibl e Brezhoneg evit ar Vretoned

Pennad 20

¹ David a dec'has eus Najod e-kichen Rama hag a zeuas da gavout Jonatan, hag e lavaras dirazañ: Petra am eus graet, pehini eo va direizhder, pehini eo va fec'hed dirak da dad, ma klask va buhez?

² Eñ a lavaras dezhañ: N'eo ket! Ne varvi ket. Setu, ne ra va zad netra, na bras na bihan, hep henn lavarout din. Perak e kuzhfe va zad ouzhin an dra-mañ? N'emañ ket evel-se.

³ David a douas c'hoazh o lavarout: A-dra-sur e oar da dad em eus kavet trugarez dirak da zaoulagad, hag en devo lavaret: Ra ne ouio ket Jonatan kement-mañ, gant aon na vefe glac'haret. Met an AOTROU a zo bev ha da ene a zo bev, ur c'hammed 'zo etrezon-me hag ar marv.

⁴ Jonatan a lavaras da Zavid: Petra a fell dit e rafen? Hag en rin evidout.

⁵ David a lavaras da Jonatan: Setu emañ al loar nevez warc'hoazh, hag e tlein azezañ gant ar roue da zebriñ. Met va lez da vont kuit da guzhat er parkeier betek abardaez an trede deiz.

⁶ Mar goulenn da dad diwar va fenn, e responti: David en deus goulennet ouzhin mont en hast da Vetlehem e gêr, dre ma ra e holl diegezh un aberzh-bloaz eno.

⁷ Mar lavar: Mat eo! Mont a ra mat pep tra evit da servijer, met mar bez fuloret, e ouezi ez eo an droug divizet eus e berzh.

⁸ Bez madelezhus gant da servijer, pa ec'h eus lakaet da servijer da vont en un emglev ganit dirak an AOTROU . Mard eus ennon un direizhder bennak, va laka d'ar marv da-unan, rak perak am c'hasfes da'z tad?

⁹ Jonatan a lavaras: Pell diouzhit ar soñj-se! Rak ma teufen da c'houzout en defe divizet va zad an droug diwar da benn, perak ne rofen ket dit da c'houzout?

¹⁰ David a lavaras da Jonatan: Piv a roio din da c'houzout ha respont a raio da dad dit un dra bennak garv?

¹¹ Jonatan a lavaras da Zavid: Deus ha deomp d'ar parkeier. Hag ez ejont o-daou d'ar parkeier.

¹² Jonatan a lavaras da Zavid: Dre an AOTROU Doue Israel, e furchin va zad warc'hoazh war-dro d'an eur-mañ, pe goude warc'hoazh. Ha setu, mar bez tuet mat e-keñver David, ma ne gasan ket da'z kavout ha ma ne roan ket did da c'houzout,

¹³ ra raio an AOTROU da Jonatan hervez an diwezhañ rustoni! Ha mar plij da'm zad ober droug dit, e roin ivez dit da c'houzout, hag ez lezin da vont, hag ez i e peoc'h, ha ra vo an AOTROU ganit evel m'eo bet gant va zad!

¹⁴ Met ivez, mar befen c'hoazh bev, e vi madelezhus em c'heñver eus madelezh an AOTROU , en doare ma ne varvin ket,

¹⁵ ha ma ne denni ket da vadelezh eus va zi, da viken, zoken p'en devo dilamet an AOTROU holl enebourien David diwar-c'horre an douar.

¹⁶ Ha Jonatan a reas emglev gant ti David hag a lavaras: Ra denno an AOTROU veñjañs eus enebourien David!

¹⁷ Jonatan a lakaas c'hoazh David da douiñ dre ar garantez a zouge dezhañ. Rak karout a rae anezhañ evel e ene.

¹⁸ Jonatan a lavaras dezhañ: Warc'hoazh emañ al loar nevez, hag e vo goulennet diwar da benn, rak da lec'h a vo goullo.

¹⁹ Met goude warc'hoazh e tiskenni buan, hag e teui war-zu al lec'h ma oas kuzhet da zeiz an afer-se, hag e chomi e-tal maen Ezel.

²⁰ Hag e tennin tri bir a-gostez, evel ma tennfen war ur pal bennak.

²¹ Ha setu e kasin un den yaouank en ur lavarout dezhañ: Kae da gavout ar biroù. Mar lavaran d'ar paotr: Setu, emañ ar biroù en tu-mañ dit, kemer-int! neuze deus, mat eo an traoù evidout, n'eus netra da zoujañ. An AOTROU a zo bev!

²² Met mar lavaran d'ar paotr yaouank: Setu, emañ ar biroù en tu all dit! Neuze tec'h, rak an AOTROU az kas kuit.

²³ Ha diwar-benn ar ger omp en em roet te ha me, setu, an AOTROU a zo test etre te ha me, da viken.

²⁴ Mont a reas eta David da guzhat er parkeier. Hag al loar nevez o vezañ deuet, ec'h azezas ar roue evit kemer e bred.

²⁵ Ar roue a azezas war e gador evel er gwechoù all, war ar gador ouzh ar voger. Jonatan a savas, hag Abner a azezas e-kichen Saül. Met lec'h David a oa goullo.

²⁶ Ha ne lavaras Saül netra en deiz-se, dre ma lavaras ennañ e-unan: Un dra bennak a zo c'hoarvezet gantañ, ha n'eo ket glan, a-dra-sur n'eo ket glan.

²⁷ Met an deiz war-lerc'h al loar nevez, an eil deiz, lec'h David a oa c'hoazh goullo, hag e lavaras Saül da Jonatan e vab: Perak n'eo ket deuet mab Jese da zebriñ, na dec'h na hiziv?

²⁸ Jonatan a respontas da Saül: David en deus goulennet start ouzhin mont da Vetlehem,

²⁹ ha lavaret en deus: Mar plij, va lez da vont, rak bez' ez eus un aberzh-tiegezh e kêr, ha gourc'hemennet en deus din va breur en em gavout eno; bremañ eta, mar em eus kavet trugarez dirak da zaoulagad, ez in da welout va breudeur. En abeg da-se eo n'eo ket deuet ouzh taol ar roue.

³⁰ Neuze kounnar Saül a entanas a-enep Jonatan, hag e lavaras dezhañ: Mab an drougiezh hag an diroll, daoust ha n'ouzon ket mat ec'h eus dibabet mab Jese, evit da vezh hag evit mezh da vamm?

³¹ Rak e-keit ha ma vevo mab Jese war an douar, ne vi biken divrall, na te na da rouantelezh. Bremañ eta kas d'e gerc'hat ha degas-eñ din, rak din eo a varv.

³² Jonatan a respontas da Saül e dad hag a lavaras dezhañ: Perak e vefe lakaet d'ar marv? Petra en deus graet?

³³ Saül a stlapas e c'hoaf outañ evit skeiñ warnañ. Neuze e ouezas Jonatan e felle d'e dad lakaat David d'ar marv.

³⁴ Jonatan a savas diouzh taol, droug bras ennañ, ha ne gemeras ket e bred en eil deiz eus al loar nevez, rak glac'haret e oa abalamour da Zavid, dre m'en doa e zismegañset e dad.

³⁵ Diouzh ar beure ez eas Jonatan d'ar parkeier el lec'h ma oa en em glevet gant David, hag e tegasas gantañ ur paotrig bihan.

³⁶ Hag e lavaras d'ar paotr: Red da gavout din ar biroù ez an da dennañ. Ar paotr a redas, ha Jonatan a dennas ur bir en tu all dezhañ.

³⁷ Pa zeuas ar paotr betek ar bir en doa tennet Jonatan, e krias Jonatan dezhañ war e lerc'h o lavarout: Ar bir, ha n'emañ ket en tu all dit?

³⁸ Hag e krias Jonatan war-lerc'h ar paotr: Hast buan, na chom ket a-sav! Hag a paotr a zastumas buan ar bir, hag e teuas da gavout e vestr.

³⁹ Met ar paotr ne ouie netra, nemet David ha Jonatan a anaveze an afer.

⁴⁰ Jonatan a roas e armoù d'ar paotr a oa gantañ hag a lavaras dezhañ: Kae, kas-int da gêr.

⁴¹ Ar paotr a yeas kuit. David a savas ouzh tu ar c'hreisteiz hag en em daolas, e zremm d'an douar, hag e stouas teir gwech. Goude e pokjont an eil d'egile hag e oueljont o-daou, ha zoken David a ouelas gwall galz.

⁴² Jonatan a lavaras da Zavid: Kae e peoc'h, hervez ar pezh hon eus touet hon daou en anv an AOTROU o lavarout: An AOTROU a vo etre me ha te, hag etre va lignez ha da lignez, da viken.

⁴³ David a savas eta hag a yeas kuit, ha Jonatan a zistroas e kêr.