1 Rouaned 3 - Bibl Koad 21: Ar Bibl e Brezhoneg evit ar Vretoned

Pennad 3

¹ Salomon a zeuas e kerentiezh Faraon roue an Ejipt. Kemer a reas merc'h Faraon da wreg, hag e tegasas anezhi da gêr David, ken n'en doe echu da sevel e di ha ti an AOTROU, kenkoulz hag ar voger en-dro da Jeruzalem.

² Ar bobl a aberzhe war an uhellec'hioù hepken, rak betek neuze ne oa bet savet ti ebet en anv an AOTROU.

³ Salomon a gare an AOTROU hag a gerzhe hervez reolennoù David e dad. Hag ec'h aberzhe hag e lakae da vogediñ war an uhellec'hioù hepken.

⁴ Ar roue a yeas da C'habaon evit aberzhiñ, eno e oa an hini brasañ eus an uhellec'hioù. Salomon a ginnigas mil loskaberzh war an aoter.

⁵ E Gabaon, an AOTROU en em ziskouezas en un huñvre da Salomon e-pad an noz, ha Doue a lavaras dezhañ: Goulenn ar pezh a roin dit.

⁶ Salomon a lavaras: Diskouezet ec'h eus ur vadelezh vras e-keñver da servijer David va zad, dre m'en deus kerzhet dirazout er fealded, er reizhder hag en eeunder a galon ez keñver. Miret ec'h eus dezhañ ar vadelezh vras-se, ha roet dezhañ ur mab a zo azezet war e dron, evel hiziv.

⁷ Ha bremañ, AOTROU va Doue, lakaet ec'h eus da servijer da ren e lec'h David va zad, ha n'on nemet un denig yaouank, n'ouzon ket penaos en em ren.

⁸ Da servijer a zo e-kreiz ar bobl ac'h eus dibabet, ar bobl vras-se na c'hell ket bezañ niveret na kontet en abeg d'he niver bras.

⁹ Ro da'z servijer ur galon boellek evit barn da bobl, evit merzout etre ar mad hag an droug. Rak piv a c'hellfe barn da bobl, hag a zo ken bras?

¹⁰ Ar c'homzoù-se a blijas d'an AOTROU, dre m'en doa graet Salomon ar goulenn-se.

¹¹ Ha Doue a lavaras dezhañ: Peogwir ec'h eus graet ar goulenn-se ouzhin, ha ne'c'h eus ket goulennet ur vuhez hir, na pinvidigezhioù, na marv da enebourien, met goulennet ec'h eus poell evit barn gant reizhder,

¹² setu, e ran hervez da gomzoù. Setu ma roin dit ur galon fur ha poellek, e doare ma ne vo ket bet unan heñvel ouzhit a-raok dit, ha ne vo ket unan heñvel ouzhit ez koude.

¹³ Reiñ a rin dit zoken ar pezh na'c'h eus ket goulennet, pinvidigezhioù ha gloar, e doare ma ne vo ket unan heñvel ouzhit e-touez ar rouaned e-pad da holl zeizioù.

¹⁴ Mar kerzhez war va hentoù, o virout va reolennoù ha va gourc'hemennoù evel m'en deus kerzhet warno David da dad, me a gresko da zeizioù.

¹⁵ Neuze Salomon a zihunas, ha setu e oa un huñvre. Hag e teuas da Jeruzalem, hag en em zalc'has dirak arc'h emglev an AOTROU. Kinnig a reas loskaberzhoù hag aberzhoù a drugarekadennoù, hag e reas ur fest d'e holl servijerien.

¹⁶ Neuze div vaouez a vuhez fall a zeuas da gavout ar roue, hag en em zalc'hjont dirazañ.

¹⁷ Unan eus ar maouezed a lavaras: Va aotrou, ar vaouez-mañ ha me a oa o chom en hevelep ti, ha gwilioudet em eus en he c'hichen en ti.

¹⁸ Tri deiz goude ma em boa gwilioudet, ar vaouez-mañ a wilioudas ivez, hag e oamp a-gevret. Den all ebet ne oa ganeomp en ti, ne oa nemet hon div en ti.

¹⁹ Mab ar vaouez-mañ a varvas e-pad an noz, dre m'he doa gourvezet warnañ.

²⁰ Savet eo e-kreiz an noz, tapet he deus ar mab em boa em c'hichen e-pad ma kouske da servijerez, lakaet he deus anezhañ war he barlenn, ha lakaet he deus he mab marv war va barlenn.

²¹ Diouzh ar mintin, pa'z on savet da reiñ da zenañ da'm mab, setu e oa marv. Met sellet em eus outañ gant evezh diouzh ar mintin, ne oa ket eñ va mab am boa ganet.

²² Ar vaouez all a lavaras: Nann, an hini bev eo va mab, met an hini marv eo da vab. Met an hini gentañ a lavaras: Nann, an hini marv eo da vab, met an hini bev eo va mab. Hag e komzent evel-se dirak ar roue.

²³ Ar roue a lavaras: Unan a lavar: An hini bev eo va mab, met an hini marv eo da vab; hag eben a lavar: Nann, an hini marv eo da vab, met an hini bev eo va mab.

²⁴ Ar roue a lavaras: Degasit ur c'hleze din. Hag ur c'hleze a voe degaset dirak ar roue.

²⁵ Ar roue a lavaras: Daouhanterit ar bugel a vev, ha roit un hanter da unan hag un hanter d'eben.

²⁶ Hag a vaouez ma oa bev he mab, he diabarzh o vezañ fromet diwar-benn he mab, a lavaras d'ar roue: Va aotrou, ro dezhi ar bugel a vev, n'e laka d'ar marv! Met eben a lavare: Ne vo na din na dit, troc'h-eñ!

²⁷ Neuze ar roue a respontas o lavarout: Roit da honnezh ar bugel a vev, ha n'e lakait ket d'ar marv: hi eo e vamm.

²⁸ Hag holl Israel a anavezas ar varn en doa graet ar roue. Hag e voe doujañs e-keñver ar roue, rak gwelout a rejont e oa ennañ furnez Doue evit barn gant reizhder.