1 Rouaned 13 - Bibl Koad 21: Ar Bibl e Brezhoneg evit ar Vretoned

Pennad 13

¹ Setu, un den Doue a zeuas eus Juda da Vetel, a-berzh komz an AOTROU, e-pad ma en em zalc'he Jeroboam ouzh an aoter evit lakaat da vogediñ.

² Hag e krias a-enep an aoter, a-berzh komz an AOTROU, hag e lavaras: Aoter, aoter, evel-henn e komz an AOTROU: Setu, ur mab a vo ganet e ti David, e anv a vo Jozia, lazhañ a raio warnout aberzhourien an uhellec'hioù a laka da vogediñ warnout, ha devet e vo warnout eskern tud.

³ Hag e roas en deiz-se un arouez o lavarout: Setu un arouez ez eo an AOTROU en deus komzet: Setu, an aoter a faouto, hag al ludu a zo warni a vo skuilhet.

⁴ Pa glevas ar roue komzoù an den Doue a grie a-enep aoter Betel, Jeroboam a astennas e zorn dreist an aoter o lavarout: Krogit ennañ! Hag an dorn en doa astennet etrezek ennañ a zeuas disec'het, ha ne oa ket evit e zistreiñ d'e gavout.

⁵ An aoter a faoutas, hag al ludu a oa warni a voe skuilhet, hervez an arouez en doa roet an den Doue a-berzh komz an AOTROU.

⁶ Hag e stagas da gomz ar roue o lavarout d'an den Doue: Galv, mar plij, an AOTROU da Zoue, ha ped evidon evit ma c'hello va dorn dont en-dro din. Hag an den Doue a c'halvas an AOTROU, ha dorn ar roue a c'hellas distreiñ dezhañ, evel ma voe diagent.

⁷ Ar roue a lavaras d'an den Doue: Deus ganin en ti, hag en em greñva; ha me a raio ur prof dit.

⁸ Met an den Doue a lavaras d'ar roue: Pa rofes din un hanter eus da di, n'in ket ganit, ha ne zebrin ket bara ha n'evin ket dour el lec'h-mañ.

⁹ Rak bet em eus ar gourc'hemenn-mañ digant komz an AOTROU: Ne zebri ket bara, n'evi ket dour, ne zistroi ket dre an hent ma vi aet drezañ.

¹⁰ Mont a reas eta kuit dre un hent all, ha ne zistroas ket dre an hent ma oa deuet drezañ da Vetel.

¹¹ Bez' e oa ur profed kozh o chom e Betel. E vibien a zeuas da gontañ dezhañ an holl draoù en doa graet an den Doue en deiz-se e Betel, hag ar c'homzoù en doa lavaret d'ar roue. P'o doa kontet an traoù-se d'o zad,

¹² hemañ a lavaras dezho: Dre beseurt hent ez eo aet kuit? E vibien o doa gwelet an hent ma oa aet drezañ an den Doue deuet eus Juda.

¹³ Hag e lavaras d'e vibien: Dibrit din an azen. Hag e tibrjont an azen dezhañ, hag e pignas warnañ.

¹⁴ Mont a reas war-lerc'h an den Doue, a gavas azezet dindan un dervenn, hag e lavaras dezhañ: Ha te eo an den Doue deuet eus Juda? Eñ a lavaras dezhañ: Me eo.

¹⁵ Hag e lavaras dezhañ: Deus ganin da'm zi hag e tebri bara.

¹⁶ Eñ a lavaras: Ne c'hellan ket distreiñ ganit na mont e-barzh da di, ne zebrin ket bara ha n'evin ket dour ganit el lec'h-se,

¹⁷ rak lavaret eo bet din dre gomz an AOTROU: Ne zebri ket bara eno, n'evi ket dour eno, ne zistroi ket dre an hent ma vi aet drezañ.

¹⁸ Hag e lavaras dezhañ: Me ivez a zo profed eveldout, hag un ael en deus komzet ouzhin a-berzh an AOTROU o lavarout: Degas hemañ ganit da'z ti, ma tebro bara ha ma evo dour. Gaou a lavare dezhañ.

¹⁹ Neuze e tistroas gantañ, hag e tebras bara hag ec'h evas dour en e di.

²⁰ Evel ma oant azezet ouzh taol, komz an AOTROU a voe disklêriet d'ar profed en doa e zegaset,

²¹ hag e krias d'an den Doue deuet eus Juda o lavarout: Evel-henn e komz an AOTROU: Dre ma'z out bet disent ouzh urzh an AOTROU, ha ma ne'c'h eus ket miret an urzh en doa roet dit an AOTROU da Zoue,

²² met ma'z out distroet, ma ec'h eus debret bara hag evet dour el lec'h em boa lavaret dit: Ne zebri ket bara eno, n'evi ket dour eno, da gorf marv ned aio ket e bez da dadoù.

²³ Goude m'en doe debret bara hag evet, e reas dibrañ an azen evit ar profed en doa degaset.

²⁴ Hemañ a yeas kuit, hag ul leon a gavas anezhañ war an hent hag en lazhas. E gorf a oa astennet war an hent, an azen en em zalc'he e-kichen ar c'horf, hag al leon ivez en em zalc'he e-kichen ar c'horf.

²⁵ Ha setu, tremenidi bennak a welas ar c'horf astennet war an hent, hag al leon en em zalc'he e-kichen ar c'horf. Dont a rejont d'henn lavarout er gêr ma oa ar profed kozh o chom enni.

²⁶ Pa glevas kement-se ar profed en doa e zegaset eus an hent, e lavaras: An den Doue eo, an hini a zo bet disent ouzh urzh an AOTROU. An AOTROU en deus e roet d'al leon, hag hemañ en deus e roget ha lazhet, hervez ar gomz en doa lavaret an AOTROU dezhañ.

²⁷ Hag e komzas ouzh e vibien o lavarout: Dibrit din an azen. Hag e tibrjont an azen dezhañ.

²⁸ Mont a reas hag e kavas ar c'horf astennet war an hent, hag an azen hag al leon en em zalc'he e-kichen ar c'horf. Al leon n'en doa ket debret ar c'horf na diframmet an azen.

²⁹ Ar profed a savas korf an den Doue hag a lakaas anezhañ war e azen d'e zegas gantañ. Ar profed kozh a zeuas e kêr evit ober kañv anezhañ hag e sebeliañ.

³⁰ Lakaat a reas e gorf en e vez, hag e oueljont warnañ o lavarout: Siwazh, va breur!

³¹ Goude bezañ e sebeliet e komzas ouzh e vibien o lavarout: Pa vin marv, va sebeliañ a reot er bez ma eo sebeliet an den Doue ennañ; lakait va eskern e-kichen e eskern,

³² rak sevenet e vo a-dra-sur ar gomz en deus kriet, a-berzh an AOTROU, a-enep an aoter a zo e Betel hag a-enep an holl diez uhellec'hioù a zo e kêrioù Samaria.

³³ Koulskoude Jeroboam ne zistroas ket diouzh e hent fall, met a-nevez e lakaas da aberzhourien evit an uhellec'hioù tud a-douez an holl bobl. Lakaat a rae da aberzhour eus an uhellec'hioù an hini a felle dezhañ.

³⁴ Hag an dra-se a zeuas da vezañ ur pec'hed evit ti Jeroboam, a voe diverket ha distrujet diwar c'horre an douar.